តំណាងស្តីទីនៃការិយាល័យសិទ្ធិមនុស្សអង្គការសហប្រជាជាតិប្រចាំកម្ពុជា បានលើកឡើងថា ការអនុវត្តច្បាប់ស្តីពី «យុត្តិធម៌អនីតិជន» មិនបានពេញលេញ ធ្វើឱ្យកំណើនអ្នកជាប់ឃុំកាន់តែកើនឡើងនៅក្នុងពន្ធនាគារ។
ការលើកឡើងរបស់តំណាងស្តីទីនៃការិយាល័យសិទ្ធិមនុស្សអង្គការសហប្រជាជាតិប្រចាំកម្ពុជា លោកស្រី ខ្លៅឌៀ ដឺឡាហ្វ័នតេ (Claudia De La Fuente) បានធ្វើឡើងនៅក្នុងដំណើរទស្សនកិច្ចរួមគ្នាមួយជាមួយអង្គការ UNICEF ដើម្បីទទួលបានការយល់ដឹងកាន់តែប្រសើរឡើងអំពីហេដ្ឋារចនាសម្ព័ន្ធ និងផែនការរបស់មជ្ឈមណ្ឌលស្តារនីតិសម្បទាយុវជនថ្មីស្ថិតនៅក្នុងខេត្តកណ្តាលកាលពីថ្ងៃទី២១ ខែមេសានេះ។
អង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំកម្ពុជាបានសរសេរលើហ្វេសប៊ុកនាថ្ងៃសុក្រម្សិលមិញនេះថា អនីតិជនចំនួន ១ ៣៥៦ នាក់ ដែលកំពុងស្ថិតក្នុងការឃុំឃាំង ដោយភាគច្រើនស្ថិតក្នុងពន្ធនាគារដែលមានភាពចង្អៀតណែន។ ប្រភពដដែលបន្តថា ក្នុងចំណោមចំនួនអនីតិជនសរុប ដែលកំពុងជាប់ពន្ធនាគារនៅកម្ពុជានេះ មានចំនួនច្រើនជាងពាក់កណ្តាល កំពុងស្ថិតនៅក្នុងការឃុំខ្លួនបណ្តោះអាសន្ន ទាំងដែលពួកគេត្រូវបានសន្មត់ថា គ្មានទោសក៏ដោយ។
ជាមួយគ្នានេះ ច្បាប់ស្តីពីយុត្តិធម៌អនីតិជនរបស់ប្រទេសកម្ពុជា បានអនុញ្ញាតឱ្យមានវិធានការបង្វែរចេញពីប្រព័ន្ធយុត្តិធម៌ព្រហ្មទណ្ឌ និងជាពិសេសពន្ធនាគារ។ ក៏ប៉ុន្តែជាអកុសលច្បាប់នេះ មិនត្រូវបានប្រើប្រាស់ជាប្រចាំឡើយ រហូតមកដល់ពេលនេះ ដែលធ្វើឱ្យការដាក់បន្ទុកលើពន្ធនាគារកម្ពុជាកាន់តែកើនឡើង និងជះឥទ្ធិពលអវិជ្ជមានដល់ជីវិតរបស់កុមារដែលមានទំនាស់ជាមួយច្បាប់។
អង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំកម្ពុជាបានសរសេរថា៖ «កុមារមិនត្រូវស្ថិតនៅក្នុងពន្ធនាគារនោះទេ មូលហេតុនេះហើយបានជារដ្ឋាភិបាលកម្ពុជាសម្ពោធមជ្ឈមណ្ឌលស្តារនីតិសម្បទាយុវជនថ្មីមួយនៅខេត្តកណ្តាលកាលពីចុងឆ្នាំ ២០២១ នេះ ដើម្បីធ្វើឱ្យឃើញលក្ខខណ្ឌមានភាពប្រសើរឡើងដល់អនីតិជនចំនួន ១៣៥៦នាក់ ដែលកំពុងស្ថិតក្នុង ការឃុំឃាំង ដែលភាគច្រើនស្ថិតក្នុងពន្ធនាគារដែលមានភាពចង្អៀតណែន»។
ប្រធាននាយកដ្ឋានស្តារនីតិសម្បទាយុវជននៃក្រសួងសង្គមកិច្ច អតីតយុទ្ធជន និងយុវនីតិសម្បទា (MoSVY) លោក ឌិន បូរី បានថ្លែងថា បច្ចុប្បន្ននេះ មជ្ឈមណ្ឌលបានទទួលក្មេងប្រុសស្នាក់នៅចំនួន ៣២នាក់ ដើម្បីសាកល្បង ប៉ុន្តែមជ្ឈមណ្ឌលនោះ មានសមត្ថភាពទទួលកុមារឲ្យស្នាក់នៅបានដល់ចំនួនក្រោម ១ ០០០នាក់ ឯណោះ។
កាលពីខែសីហា ឆ្នាំ២០២០ រដ្ឋមន្ត្រីក្រសួងមហាផ្ទៃ លោក ស ខេង បានបង្ហាញក្ដីកង្វល់ជាខ្លាំងចំពោះភាពចង្អៀតណែនក្នុងពន្ធនាគារ ដែលមានអ្នកជាប់ឃុំទូទាំងប្រទេសប្រមាណ៤០ ០០០នាក់។ លោកអះអាងនៅពេលនោះថា ចំនួនអ្នកជាប់ឃុំកើនយ៉ាងគំហុក ភាគច្រើនបណ្ដាលមកពីករណីគ្រឿងញៀន ហើយកំណើនអ្នកជាប់ឃុំនោះមិនសមស្របតាមស្ដង់ដារមន្ទីរឃុំឃាំង ឬមណ្ឌលអប់រំកែប្រែឡើយ៕
