អតីតគ្រូពេទ្យម្នាក់ដែលទើបបណ្តេញចេញពីក្របខណ្ឌមន្ត្រីរាជការនៅខេត្តប៉ៃលិន បានរងបណ្តឹងចំនួន២ ក្រោយពីលោកបានឡើងធ្វើជាប្រធានក្រុមការងារគណបក្សភ្លើងទៀនប្រចាំនៅខេត្តប៉ៃលិន។
យោងតាមដីកាកោះហៅចំនួន២ ដាច់ដោយឡែកពីគ្នា ដែលវីអូឌីទទួលបាននៅថ្ងៃនេះ បានឱ្យដឹងថា តុលាការខេត្តប៉ៃលិន បានកោះហៅ លោក ខឹម មុនីកុសល អតីតគ្រូពេទ្យ នៅខេត្តប៉ៃលិន ឱ្យចូលខ្លួនទៅឆ្លើយបំភ្លឺនៅតុលាការ នៅថ្ងៃទី៨ ខែមេសា ខាងមុខនេះ លើបណ្តឹងបរិហាកេរ្តិ៍ជាសាធារណៈ។ ដើមបណ្តឹងដែលប្តឹងអតីតគ្រូពេទ្យរូបនេះ គឺប្តឹងដោយឈ្មោះ ចេង តូ មានតួនាទីជាប្រធានភូមិវាលចែង កាលពីថ្ងៃទី២៤ ខែមីនា ឆ្នាំ២០២២។
ពាក្យបណ្តឹងនេះ បានកើតឡើង ក្រោយពីលោក ខឹម មុនីកុសល បានប្តឹងលោក ចេង តូ ពីបទរារាំង និងគំរាមកំហែងដល់ភ្នាក់ងារសង្កេតការណ៍គណបក្សភ្លើងទៀន ដោយបង្ខំឱ្យលាលែងចេញពីភ្នាក់ងារសង្កេតការណ៍នៅឃុំអូរអណ្តូង ស្រុកសាលាក្រៅ ខេត្តប៉ៃលិន។ ប៉ុន្តែ គណៈកម្មការរៀបចំការបោះឆ្នោតឃុំ បានច្រានចោលបណ្តឹងរបស់លោក ខឹម មុនីកុសល ហើយលោកមេភូមិ ចេង តូ បានប្តឹងបកទៅកាន់តុលាការវិញ។
ចំណែកពាក្យបណ្តឹងមួយទៀត ដែលចេញក្នុងថ្ងៃតែមួយ កាលពីថ្ងៃទី៣១ ខែមីនា បានកោះហៅលោក ខឹម មុនីកុសល ឱ្យចូលទៅបំភ្លឺនៅថ្ងៃទី២០ ខែមេសា ពីបទញុះញង់ឱ្យមានការរើសអើង ដែលប្រព្រឹត្តនៅស្នាក់ការគណបក្សប្រជាជនកម្ពុជាខេត្តប៉ៃលិន។ សំណុំរឿងនេះ គឺជារឿងចាស់ ដែលកើតឡើងកាលពីខែមីនា ឆ្នាំ២០២១ និងអាចជាហេតុផលមួយដែលអភិបាលខេត្តប៉ៃលិន លោកស្រី បាន ស្រីមុំ បានបណ្តេញលោកចេញពីក្របខណ្ឌមន្ត្រីរាជការនៅខេត្តប៉ៃលិនផងដែរ។
អតីតគ្រូពេទ្យនៅខេត្តប៉ៃលិន លោក ខឹម មុនីកុសល ដែលបច្ចុប្បន្ន គឺជាប្រធានក្រុមការងារគណបក្សភ្លើងទៀនប្រចាំខេត្តនេះ បានចាត់ទុកបណ្តឹងប្រឆាំងរូបលោកទាំងពីរករណីនេះ ថាជាការគំរាមកំហែង និងធ្វើទុក្ខបុកម្នេញផ្នែកនយោបាយទៅលើរូបលោក។
លោកថា៖ «បាទវាជារឿងមួយភ្ញាក់ផ្អើល! វាលាយឡំគ្នា ទីមួយគេយករឿងបោះឆ្នោតមកធ្វើជាកិច្ចការប្តឹងផ្តល់នៅតុលាការវាជារឿងគួរឱ្យភ្ញាក់ផ្អើល ទីពីរចង់និយាយថា ដកក្របខណ្ឌរបស់ខ្ញុំដោយគ្មានមូលដ្ឋានច្បាប់ហើយ មកប្តឹងខ្ញុំមកតុលាការទៀត ដូច្នេះវាជារូបភាពនៃការគំរាមកំហែងថ្មីមួយទៀត ដែលចង់រារាំងដំណើរការនៃការធ្វើនយោបាយរបស់ខ្ញុំនៅក្នុងបក្សភ្លើងទៀននេះ»។
លោក ខឹម មុនីកុសល ត្រូវបានអភិបាលខេត្តប៉ៃលិន លោកស្រី បាន ស្រីមុំ បណ្តេញចេញពីក្របខណ្ឌជាមន្ត្រីសុខាភិបាលជាន់ខ្ពស់នៃមន្ទីរសុខាភិបាលខេត្តប៉ៃលិន កាលពីថ្ងៃទី១៩ ខែមីនា ឆ្នាំ២០២១ បន្ទាប់ពីលោកបានបង្ហោះសារនៅលើហ្វេសប៊ុករិះគន់មន្ត្រីស្ថាប័នពាក់ព័ន្ធដែលចុះប្រចាំការនៅមណ្ឌលចត្តាឡីស័កនៅស្នាក់ការគណបក្សប្រជាជនកម្ពុជាខេត្តប៉ៃលិនថា «មិនបានជួយធ្វើការងារគ្រូពេទ្យខ្លះនោះទេ ប៉ុន្តែនាំគ្នាអង្គុយលេង Facebook ក្នុងតង់ និងថតរូបបង្អួតគេឯងទៅវិញ»។
រដ្ឋបាលខេត្តប៉ៃលិន បានចេញសេចក្តីប្រកាសព័ត៌មាន ដោយបញ្ជាក់ថា លោក ខឹម មុនីកុសល បាន «ប្រព្រឹត្តកំហុស និងការឆ្គាំឆ្គងក្នុងវិជ្ជាជីវៈ»។
លោក ខឹម មុនីកុស បានប្តឹងជំទាស់សេចក្តីសម្រេចនេះ មកក្រសួងមុខងារសាធារណៈចំនួនពីរដង និងក្រសួងសុខាភិបាលផងដែរ។ ក៏ប៉ុន្តែ ក្រសួងមុខងារសាធារណៈបានចេញសេចក្តីសម្រេចកាលពីថ្ងៃទី៤ ខែកុម្ភៈថា ការសម្រេចឱ្យលោក ខឹម មុនីកុសល ចេញពីរដ្ឋបាលខេត្តប៉ៃលិន គឺស្របច្បាប់។
វីអូឌី បានព្យាយាមទាក់ទងអភិបាលខេត្តប៉ៃលិន លោកស្រី បាន ស្រីមុំ ដើម្បីឆ្លើយបំភ្លឺជុំវិញករណីនេះ ប៉ុន្តែមិនមានការឆ្លើយតប។
តែយ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន បានបដិសេធថា មិនមែនជាការធ្វើទុក្ខបុកម្នេញនយោបាយនោះទេ ពីព្រោះពាក្យបណ្តឹងនេះ កើតឡើងមុនពេលដែលលោក ខឹម មុនីកុសល ទៅចូលរួមជាមួយគណបក្សភ្លើងទៀន។
លោកថា៖ «អារឿងវាកើតមុនពេលគាត់ទៅចូលបក្សមួយនោះ ហើយឥឡូវគេប្តឹង អារឿងមួយមុន ហើយគាត់ទើបចូលភ្លើងទៀនក្រោយ អាហ្នឹងគាត់ទៅចោទគេថា យាយីបក្សភ្លើងទៀនម៉េចហ្នឹងកើត អារឿងនោះកើតមុន!»។
មន្ត្រីសម្របសម្រួលអង្គការសិទ្ធិមនុស្សលីកាដូប្រចាំខេត្តបាត់ដំបង លោក អ៊ិន គង់ជិត បានថ្លែងថា រឿងនេះគឺជារឿងតូច ដែលភាគីទាំងពីរគួរមានការសម្របសម្រួល និងដោះស្រាយគ្នាដោយសន្តិវិធី ដោយមិនត្រូវប្រើប្រព័ន្ធតុលាការនោះទេ។
លោកថា៖ «រឿងបើយើងមើលវាបន្តិចបន្តួចទេ វាតូចតាចបន្តិចបន្តួច ប៉ុន្តែប្រហែលដើម្បីចង់បំបាក់ស្មារតីគាត់ ឱ្យគាត់មានការភ័យ បាក់ស្បាត ខ្លបខ្លាច ឱ្យចុះញ៉ម ចឹងការយកបណ្តឹងទៅតុលាការហ្នឹង គឺជាការបំបាក់គាត់ ធ្វើទុក្ខបុកម្នេញគាត់! ចឹងរឿងហ្នឹងវាដូចអត់មានធំដុំអ្វីផង គួរតែមានការយោគយល់ អនុគ្រោះផងទៅ!»។
ខេត្តប៉ៃលិន គឺជាខេត្តដ៏ក្តៅគគុកមួយនៃការប្រឈមរបស់គណបក្សភ្លើងទៀន ក្នុងការប្រកួតប្រជែងការបោះឆ្នោតឃុំសង្កាត់នៅឆ្នាំ២០២២នេះ។ កន្លងមក មានការហាមឃាត់មិនឱ្យមានការលើកស្លាកគណបក្ស និងការលួចវាយកម្ទេចស្លាកគណបក្សប្រឆាំងនេះផងដែរ៕
