សមត្ថកិច្ចរាជធានីភ្នំពេញ បានបញ្ជូន អ្នកស្រី យក់ នាង សមាជិកក្រុមប្រឹក្សារាជធានីភ្នំពេញគណបក្សសង្គ្រោះជាតិដែលត្រូវតុលាការរំលាយម្នាក់ទៅឃុំខ្លួននៅពន្ធនាគារព្រៃសបណ្ដោះអាសន្ន ពីបទ «ញុះញង់ និងរួមគំនិតក្បត់»។
លោកស្រី យក់ នាង ត្រូវសមត្ថកិច្ចរាជធានីភ្នំពេញចាប់ខ្លួនកាលពីថ្ងៃទី១ ខែមេសា ឆ្នាំ២០២២ អំឡុងពេលដែលលោកស្រី និង ស្ត្រី ៣ នាក់ផ្សេងទៀតជួបជុំគ្នាកន្លែងលក់ទឹកអំពៅមួយកន្លែង ក្នុងបុរីពិភពថ្មីចម្ការដូង ខណ្ឌដង្កោ។
កូនរបស់លោកស្រី យក់ នាង គឺលោក អ៊ួច វណ្ណារិទ្ធ ប្រាប់វីអូឌីនៅថ្ងៃសៅរ៍នេះថា ក្នុងចំណោមស្ត្រី ៣ នាក់ ដែលត្រូវសមមត្ថកិច្ចខ្លួននោះ សមត្ថកិច្ចបានដោះលែងវិញ ខណៈម្ដាយរបស់លោកត្រូវបានសមត្ថកិច្ចបញ្ជូនមកកាន់តុលាការ។ លោកបន្តថា នៅព្រឹកថ្ងៃសៅរ៍នេះ ម្ដាយរបស់លោកត្រូវសមត្ថកិច្ចបញ្ជូនទៅឃុំខ្លួននៅពន្ធនាគារ បន្ទាប់ពីតុលាការសាកសួររួច ប៉ុន្តែលោកមិនបានដឹងថា ម្ដាយរបស់លោកត្រូវតុលាការចោទប្រកាន់ពីបទអ្វីនោះឡើយ។
លោកថា៖ «ខ្ញុំបានទទួលដំណឹងថា តុលាការបញ្ជូនគាត់ទៅពន្ធនាគារ ម២ ព្រៃស ហើយ ប៉ុន្តែខ្ញុំមិនដឹងគេចោទគាត់រឿងទេ។ កន្លងមក គាត់ចូលបំភ្លឺនៅតុលាការរហូត ពេលគេកោះហៅគាត់រឿង «រួមគំនិតក្បត់ »ពាក់ព័ន្ធការវិលត្រឡប់របស់លោក សម រង្ស៊ី ៩ វិច្ឆិកា»។
លោកថា ការចាប់ខ្លួនម្ដាយរបស់គាត់កាលពីម្សិលមិញនេះ ពាក់ព័ន្ធនឹងរឿងនយោបាយ ខណៈម្ដាយ គាត់ជាសមាជិកក្រុមប្រឹក្សារាជធានីភ្នំពេញមកពីគណបក្សសង្គ្រោះជាតិដែលត្រូវតុលាការរំលាយ ប៉ុន្តែលោកថា ចាប់តាំងពីតុលាការរំលាយមក ម្ដាយរបស់លោកមិនបានធ្វើសកម្មភាពអ្វីទៀតទេ។
អ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា ប្រាប់វីអូឌីថា សមត្ថកិច្ចបានឃាត់ខ្លួនលោកស្រី យក់ នាង កាលពីម្សិលមិញ តាមដីការបស់តុលាការ និងបញ្ជូនមកកាន់សាលាដំបូងរាជធានីភ្នំពេញធ្វើការសាកសួរ។ លោកបញ្ជាក់ថា ក្រោយពីបានសាកសួរ តុលាការក៏បានចេញដីកាឃុំខ្លួនលោកស្រី យក់ នាង នៅពន្ធនាគារនាថ្ងៃនេះ ពីបទ«រួមគំនិតក្បត់ និងញុះញង់» ប៉ុន្តែពាក់ព័ន្ធរឿងអ្វីនោះ សុំមិនធ្វើអត្ថាធិប្បាយលម្អិតឡើយ ដោយឱ្យសួរមកខាងតុលាការវិញ។
លោកថា៖ «ត្រូវហើយម្សិលមិញសមត្ថកិច្ចនៃស្នងការដ្ឋានរាជធានីភ្នំពេញ គឺយើងអនុវត្តតាមដីការបស់សាលាដំបូងរាជធានីភ្នំពេញ ដើម្បីនាំខ្លួនភ្លាម យើងបានបញ្ជូនទៅសាលាដំបូរាជធានីភ្នំពេញតាំងម្សិលមិញ ហើយខាងតុលាការក៏បានចេញដីកាឃុំខ្លួនផងដែរ ពាក់ព័ន្ធនឹង «រួមគំនិតក្បត់ និងញុះញង់ឱ្យប្រព្រឹត្តបទឧក្រិដ្ឋជាអាទិ៍»។ ខ្ញុំសុំបញ្ជាក់ប៉ុណ្ណឹង ព័ត៌មានលម្អិតអាចសួរទៅខាងតុលាការបានបាទ»។
វីអូឌីមិនអាចសុំការបញ្ជាក់ពីអ្នកនាំពាក្យសាលាដំបូងរាជធានីភ្នំពេញលោក សួស វិទ្យារ៉ាឌី បានទេដោយទូរសព្ទចូលគ្មានអ្នកទទួល។
យ៉ាងណាក៏ដោយ សមាជិកក្រុមប្រឹក្សារាជធានីភ្នំពេញគណបក្សសង្គ្រោះជាតិដែលត្រូវតុលាការរំលាយអ្នកស្រី យក់ នាង ធ្លាប់ភៀសខ្លួនទៅប្រទេសថៃ កាលពីចុងឆ្នាំ២០១៩ បន្ទាប់ពីតុលាការចេញដីកាចាប់ខ្លួនលោកស្រី និងអ្នកផ្សេងទៀតក្រោមបទចោទប្រកាន់ពីបទ «រួមគំនិតក្បត់» ពាក់ព័ន្ធនឹងដំណើរវិលត្រឡប់របស់លោក សម រង្ស៊ី ថ្ងៃទី៩ ខែវិច្ឆិកា ឆ្នាំ២០១៩។
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា (UN) លោក វិទិត មុនតាប៊ន (Vitit Muntarbhorn) ក្នុងកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៤៩ នៅទីក្រុងសឺណែវ ប្រទេសស្វីស កាលពីថ្ងៃទី២៩ ខែមីនា ឆ្នាំ២០២២ថា លំហពលរដ្ឋ និងនយោបាយនៅកម្ពុជា កាន់តែរួមតូចទៅ និងកំពុងដើរថយក្រោយ ដោយសារតែការគ្រប់គ្រងតាមបែបឯកបក្ស។
បន្ថែមពីនេះ លោកថា ទិដ្ឋភាពសិទ្ធិមនុស្ស និងលទ្ធិប្រជាធិបតេយ្យនៅក្នុងប្រទេសកម្ពុជា នៅតែបង្កការព្រួយបារម្ភលើវិស័យជាច្រើនជាពិសេស ក្នុងពេលដែលកាន់តែខិតជិតដល់ការបោះឆ្នោតឃុំ-សង្កាត់ ដែលនឹងប្រព្រឹត្តទៅនៅខែមិថុនាខាងមុខនេះ៕
