ថ្នាក់ដឹកនាំសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ (Naga World) បានឱ្យដឹងថា សមាជិកសហជីពចំនួន៣នាក់ទៀត ត្រូវបានអាជ្ញាធរដោះលែងឱ្យមានសេរីភាពវិញហើយ នៅល្ងាចថ្ងៃព្រហស្បតិ៍នេះ។
ការដោះលែងនេះ ធ្វើឡើងបន្ទាប់ពីពួកគេបានស្នើទៅក្រសួងការងារ ឱ្យជួយអន្តរាគមន៍ផ្លូវច្បាប់ឱ្យពួកគាត់បាននៅក្រៅឃុំបណ្តោះអាសន្ន ដើម្បីបានចូលរួមដោះស្រាយបញ្ចប់វិវាទជាមួយក្រុមហ៊ុនណាហ្គាវើលដ៍ ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានប្រាប់វីអូឌីនៅម៉ោងជិត៦ល្ងាចថ្ងៃព្រហស្បតិ៍នេះថា អាជ្ញាធរនៅពន្ធនាគាររាជធានីភ្នំពេញឬប៉េហ្ស៊ី(PJ) បានដោះលែងសមាជិកគាត់ចំនួន៣នាក់ ឱ្យមានសេរីភាពវិញហើយនៅល្ងាចនេះ។
កញ្ញាបញ្ជាក់ថា នៅថ្ងៃស្អែកនេះ ពួកគាត់និងជួបពិភាក្សាគ្នាជាមួយសមាជិកសហជីព និងក្រុមកូដករ ដើម្បីត្រៀមយកចំណុចសំខាន់ៗមួយចំនួន រួមមាន ទាមទារឱ្យក្រុមហ៊ុនទទួលយកកម្មករចូលធ្វើការងារវិញ ទាមទារប្រាក់អត្ថប្រយោជន៍ស្របតាមច្បាប់ការងារ និងទាមទារទម្លាក់បទចោទលើសហជីព សមាជិកសហជីព និងកូដករផ្សេងៗទៀតជាដើម ។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព មានប្រសាសន៍ថា ការដោះលែងសហជីព៨នាក់ និងសមាជិកសហជីព៣នាក់ទៀតឱ្យនៅក្រៅឃុំបណ្តោះអាសន្ន ជាសញ្ញាវិជ្ជមានមួយ សម្រាប់ការរកដំណោះស្រាយបញ្ចប់វិវាទ រវាងក្រុមហ៊ុនណាហ្គាវើលដ៍ និងក្រុមកូដករ ។
ទោះជាបែបនេះក្តី លោកស្រី បញ្ជាក់ថា ដើម្បីឱ្យការចូលតុចរចាបញ្ចប់វិវាទនោះទទួលបានផលវិជ្ជមានខ្ពស់ និងមានតម្លាភាព លុះត្រាតែមានការទម្លាក់ចោលបទចោទលើសហជីព សមាជិក និងកូដករមួយចំនួនទៀត ។
លោកស្រីមានប្រសាសន៍ថា៖ «ការដោះលែងពួកគាត់ឱ្យនៅក្រៅឃុំ ហើយនៅតែបន្តចោទប្រកាន់ វាជាការបន្តដាក់គំនាបមកលើពួកគាត់ អីចឹងទោះបីជាការចរចា ទៅមុខយ៉ាងណាក៏ដោយ ប៉ុន្តែបទចោទនេះមិនត្រូវបានទម្លាក់ទេ ពួកគាត់និងមានការប្រឈម មិនមានសេរីភាពពេញលេញនៅក្នុងការអនុវត្តនូវសេរីភាពរបស់ពួកគាត់ជាប្រចាំនោះទេ»។
គួរបញ្ជាក់ថា គិតចាប់ពីថ្ងៃទី១៨ ខែធ្នូ ឆ្នាំ២០២១ ដល់ថ្ងៃទី១៧ ខែមីនា ឆ្នាំ២០២២នេះ មានរយៈពេលជិត៣ខែហើយ ដែលក្រុមកូដករណាហ្គាវើលដ៍បានចេញធ្វើកូដកម្មស្ទើរជារៀងរាល់ថ្ងៃ ដើម្បីទាមទារឱ្យថៅកែក្រុមហ៊ុនដោះស្រាយវិវាទការងារ បន្ទាប់ពីក្រុមហ៊ុនបនល្បែងដ៏ធំមួយនេះ បានបញ្ឈប់បុគ្គលិកជាង ១ ៣០០នាក់ ដែលភាគច្រើន គឺជាថ្នាក់ដឹកនាំសហជីព ខណៈមកដល់ពេលបច្ចុប្បន្ននេះនៅតែមិនទាន់មានដំណោះស្រាយជាក់លាក់ណាមួយនៅឡើយ ៕