សមត្ថកិច្ច បានបញ្ជូនតំណាងសហគមន៍ និងអ្នកមានជម្លោះដីធ្លីចំនួន ៣នាក់ ទៅតុលាការខេត្តកំពង់ឆ្នាំង នៅព្រឹកថ្ងៃចន្ទនេះ ពាក់ព័ន្ធការថតសកម្មភាពពលរដ្ឋឈ្លោះគ្នារឿងដីធ្លីផ្សាយផ្ទាល់តាមបណ្តាញសង្គម ដោយមិនបានសុំការអនុញ្ញាតពីអាជ្ញាធរមូលដ្ឋាន។
ប្រធានការិយាល័យផ្នែកព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកំពង់ឆ្នាំង លោក ប៉ិច សុធឿ មានប្រសាសន៍ថា សមត្ថកិច្ចបានបញ្ជូនជនសង្ស័យចំនួន ៣នាក់ រួមមាន អ្នកស្រី អ៊ុំ សុភី តំណាងសហគមន៍ដីធ្លីឡពាង និងស្វាមីរបស់អ្នកស្រី គឺលោក ស្ងួន ញឿន រួមទាំងអ្នកស្រី ទួន សេង ទៅតុលាការខេត្តនៅថ្ងៃចន្ទនេះ ដើម្បីចាត់វិធានការច្បាប់បន្ត ខណៈចៅស្រីរបស់អ្នកស្រី ទួន សេង ដែលមានអាយុជាង ១ខួបនោះ ត្រូវបានអនុញ្ញាតឱ្យត្រឡប់ទៅផ្ទះវិញ។
លោក ប្រាក់ សុភុំ រស់នៅភូមិតាមុលលើ ឃុំកោះថ្កូវ ស្រុកជល់គិរី ខេត្តកំពង់ឆ្នាំង ដែលបានឃើញហេតុការណ៍នេះ បានអះអាងថា សមត្ថកិច្ចបានចាប់ខ្លួន និងចោទប្រកាន់ពលរដ្ឋទាំង៣នាក់នោះថា ថតសកម្មភាពពលរដ្ឋឈ្លោះគ្នារឿងដីធ្លីផ្សាយផ្ទាល់នៅលើបណ្តាញសង្គមហ្វេសប៊ុក ដោយមិនសុំការអនុញ្ញាតពីអាជ្ញាធរមូលដ្ឋាន។ លោកចាត់ទុកការចាប់ខ្លួន និងចោទប្រកាន់នេះថា ជារឿងអយុត្តិធម៌។
លោក សុភុំ ស្នើទៅតុលាការទម្លាក់ចោលការចោទប្រកាន់ពីសំណាក់អាជ្ញាធរ និងដោះលែងអ្នកទាំង៣ ឱ្យមានសេរីភាពវិញ ដោយលោកអះអាងថា ពួកគាត់មិនបានប្រព្រឹត្តខុស។
លោកមានប្រសាសន៍ថា៖ «ការផ្សព្វផ្សាយនេះមិនបានបំពានអ្វី ការពិតទេ ដោយមនុស្សមានសិទ្ធិផ្សាយដូចគ្នា ច្បាប់ចែងមក បើយើងផ្សាយទៅបំពានអ្នកដទៃ បំភ្លៃការពិត បានយើងខុស តែនេះមានខុសស្អី អត់ផង អីចឹងរឿងហ្នឹងវាអយុត្តិធម៌ណាស់ចំពោះពួកគាត់។ សុំឱ្យតុលាការទម្លាក់ការចោទប្រកាន់ពួកគាត់ទៅ ព្រោះរឿងនេះវាអត់មានកំហុសលើពួកគាត់ទេ»។
បើតាម លោក ប្រាក់ សុភុំ ទីតាំងដីនៅទួលវែង ក្នុងស្រុកជល់គីរី ខេត្តកំពង់ឆ្នាំង ដែលអ្នកស្រី អ៊ុំ សុភី បានថតផ្សាយផ្ទាល់នៅបណ្តាញសង្គមនោះ មានទំហំជាង២ហិកតា និងប៉ះពាល់ដល់ពលរដ្ឋ ៥គ្រួសារ។ លោកថា ជម្លោះដីធ្លីនោះកើតឡើងតាំងពីឆ្នាំ២០១៧មកម្លេះ ដោយភាគីជម្លោះបានប្ដឹងផ្ដល់គ្នាទៅតុលាការ ហើយមកដល់ពេលនេះ តុលាការនៅមិនទាន់សម្រេចយ៉ាងណានៅឡើយ។
ទោះជាយ៉ាងណា អធិការនគរបាលស្រុកជល់គិរី លោក ហ៊ឹម យុង មានប្រសាសន៍កាលពីថ្ងៃម្សិលមិញថា ការចាប់ខ្លួនប្រជាពលរដ្ឋទាំង៣នាក់នោះ មិនមែនដោយសាររឿងថតសកម្មភាពពលរដ្ឋឈ្លោះគ្នារឿងដីធ្លី ហើយផ្សាយនៅលើបណ្តាញសង្គមនោះទេ ប៉ុន្តែការចាប់ខ្លួនេះ ធ្វើឡើងដោយសារតែពួកគេមានជាប់ពាក់ព័ន្ធនឹងរឿងបំផ្លិចបំផ្លាញទ្រព្យសម្បត្តិអ្នកដទៃ។
មន្ត្រីសម្របសម្រួលអង្គការអាដហុកប្រចាំខេត្តកំពង់ឆ្នាំង លោក សំ ចាន់គា ចាត់ទុកការចាប់ខ្លួនតំណាងសហគមន៍ឡពាង និងអ្នកមានជម្លោះដីធ្លីនោះ ថាជាការរំលោភលើសិទ្ធិសេរីភាពប្រជាពលរដ្ឋ ហើយផ្ទុយនឹងរដ្ឋធម្មនុញ្ញ។
លោកបានជំរុញទៅរដ្ឋាភិបាលចាត់មន្ត្រីជំនាញធ្វើការស្រាវជ្រាវរឿងនេះឡើងវិញ និងទម្លាក់ចោលការប្រកាន់ទៅលើពួកគេ បើពុំដូច្នោះទេ នឹងរងការរិះគន់ពីមជ្ឈដ្ឋានជាតិ និងអន្តរជាតិ។
លោកមានប្រសាសន៍ថា៖ «នៅពេលប្រទេសមួយមានច្បាប់ ហើយសមត្ថកិច្ចបំពានច្បាប់ ហើយប្រមុខរដ្ឋាភិបាល មិនព្រមចាត់ការដាក់ទណ្ឌកម្ម ឬធ្វើការកែលម្អចំណុចហ្នឹងទេ ប្រទេសកម្ពុជានិងអាប់ឱនកិត្តិយសខ្លាំងទៅៗ ហើយសម្ពាធពីអន្តរជាតិ និងការប្រមាថពីសហគមន៍អន្តរជាតិមកលើកម្ពុជានិងថ្នាក់ដឹកនាំកម្ពុជាច្រើនទៅៗ។ អីចឹងកិត្តិយសកម្ពុជាលើឆាកអន្តរជាតិក៏អាប់ឱនដែរ»។
មាត្រា៤១នៃរដ្ឋធម្មនុញ្ញ ចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងបោះពុម្ពផ្សាយ និងសេរីភាពខាងជួបជុំជាដើម៕