ព្រះសង្ឃខ្មែរមួយអង្គ ដែលត្រូវបានអាជ្ញាធរថៃចាប់ផ្សឹកកាលពីយប់ថ្ងៃទី១ ខែធ្នូ ត្រូវបានអាជ្ញាធរថៃដោះលែងឱ្យនៅក្រៅឃុំជាបណ្ដោះអាសន្នវិញហើយ ហើយបច្ចុប្បន្នកំពុងស្នាក់នៅទីកន្លែងមួយដែលមានសុវត្ថិភាពនិងត្រៀមចេញទៅកាន់ប្រទេសទីបី។
ការដោះលែងនេះ បានធ្វើឡើងក្រោយពីមានកិច្ចអន្តរាគមន៍ពីមន្ត្រីអង្គការសហប្រជាជាតិទទួលបន្ទុកជនភៀសខ្លួនប្រចាំនៅប្រទេសថៃ។
ព្រះតេជគុណ បូរ បេត មានសង្ឈដីកាប្រាប់វីអូឌីនៅថ្ងៃសុក្រនេះថា ព្រះអង្គត្រូវបានអាជ្ញាធរថៃដោះលែងឱ្យនៅក្រៅឃុំបណ្ដោះអាសន្ននារសៀលនៅថ្ងៃនេះ ក្រោយពីមានកិច្ចអន្តរាគមន៍ និងធានា ដោយមន្ត្រីឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួនប្រចាំនៅប្រទេសថៃ (UNHCR) ហើយនឹងអតីតមន្ត្រីគណបក្សប្រឆាំង។ ព្រះតេជគុណ មានសង្ឈដីកាបន្តថា បច្ចុប្បន្នអង្គការសិទ្ធិមនុស្ស រួមទាំងអ្នកពាក់ព័ន្ធ បាននឹងកំពុងព្យាយាម យកព្រះអង្គដាក់ទៅក្នុងប្រទេសទីបី។
ព្រះតេជគុណ បូរ បេត មានសង្ឈដីកាដូច្នេះថា៖ «មេធាវីប្រាប់អាត្មាថា គេកំពុងខិតខំជួយយើង ហើយយើងអាចនឹងឈានជើងទៅប្រទេសទី៣ ប៉ុន្តែមិនដឹងថ្ងៃណាទេ តែគេខិតខំប្រឹងប្រែងជួយយើង»។
យ៉ាងណាក្តី ព្រះតេជគុណ បូរ បេត មានសង្ឈដីកាថា បច្ចុប្បន្នមេធាវីការពារក្ដីឱ្យព្រះតេជគុណបានស្នើឱ្យផ្អាកសកម្មភាពរិះគន់រដ្ឋាភិបាលកម្ពុជា លើបណ្ដាញសង្គមហ្វេសប៊ុកជាបណ្ដោះអាសន្នសិន។
កាលពីថ្ងៃទី១ ខែធ្នូ ឆ្នាំ២០២១ ព្រះតេជគុណ បូរ បេត ត្រូវបានអាជ្ញាធរថៃចាប់ផ្សឹកនៅក្នុងខេត្តសាមុតប្រាកាន ក្រោយមកត្រូវបានប៉ូលិសថៃបញ្ជូនទៅឃុំខ្លួននៅការិយាល័យអន្តោប្រវេសន៍ថៃ។ ប៉ុន្តែនៅថ្ងៃនេះ ព្រះតេជគុណ បូរ បេត ត្រូវបានសមត្ថកិច្ចថៃដោះលែងវិញ។
អ្នកនាំពាក្យរងគណបក្សប្រជាធិបតេយ្យដែលជាផ្នែកមួយនៃរដ្ឋាភិបាលចម្រុះដែលកំពុងកាន់អំណាចក្នុងប្រទេសថៃ លោក Siripa Intavichein ប្រាប់វីអូឌីថា ព្រះសង្ឈ បូរ បេត ត្រូវបានដោះលែងឱ្យនៅក្រៅឃុំវិញ ហើយត្រូវបានផ្ទេរទៅកាន់ទីកន្លែងដែលមានសុវត្ថិភាព។
លោក Siripa Intavichein ថ្លែងថា៖ «គាត់មានស្ថានភាពល្អ ហើយប៉ូលិសថៃបានមើលថែគាត់យ៉ាងល្អ។ ខ្ញុំមិនអាចប្រាប់អ្នកថា គាត់នៅឯណាទេ»។
ចំពោះការធ្វើបត្យាប័ននាពេលថ្មីៗនេះវិញ លោក Intavichein បានបកស្រាយថា មួយចំនួនក្នុងករណីទាំងនោះ គឺដោយសារតែការផ្ដល់ព័ត៌មានមិនច្បាស់លាស់ ដែលមន្ត្រីអន្តោប្រវេសន៍ថៃភ្ជាប់អ្នកសុំសិទ្ធិជ្រកកោនជាជនភៀសខ្លួនជាមួយពលករខ្មែរដែលចូលទៅក្នុងប្រទេសថៃ ដោយខុសច្បាប់។
លើសពីនេះ ក្រុមមន្ត្រីសិទ្ធិមនុស្សជាតិនិងអន្តរជាតិបានរិះគន់ ចំពោះការសម្រេចចិត្តរបស់ថៃក្នុងការធ្វើបត្យាប័នពលរដ្ឋកម្ពុជាដែលមានឋានៈជាជនភៀសខ្លួន ដោយថា រដ្ឋាភិបាលថៃគួរតែគោរពតាមគោលការណ៍អន្តរជាតិដែលមិនត្រូវបញ្ជូនជនភៀសខ្លួន និងអ្នកស្វែងរកសិទ្ធិជ្រកកោនទៅប្រទេសកំណើតវិញឡើយ ប្រសិនបើពួកគេប្រឈមមុខនឹងគ្រោះថ្នាក់នៃការធ្វើទុក្ខបុកម្នេញនោះ។
វីអូឌីមិនអាចសុំការអត្ថាធិប្បាយពីមន្ត្រីឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួនប្រចាំនៅប្រទេសថៃ (UNHCR) បានទេ នៅថ្ងៃព្រហស្បតិ៍ និងថ្ងៃសុក្រនេះ ពាក់ព័ន្ធនឹងការធ្វើបត្យាប័នបញ្ជូនជនភៀសខ្លួនអតីតគណបក្សសង្គ្រោះជាតិទាំង ៣ នាក់ កាលពីចុងខែវិច្ឆិកា។
អ្នកការពារសិទ្ធិមនុស្សថៃ និងជានាយកមូលនិធិ Cross Cultural Foundation អ្នកស្រី Pornpen Khongkachonkiet សាទរដែលរដ្ឋាភិបាលថៃធ្វើអន្តរាគមន៍ក្នុងករណីនេះ។ លោកស្រីចាត់ទុកការធ្វើអន្តរាគមន៍នេះ ថាវានឹងក្លាយជាគំរូល្អមួយសម្រាប់ថៃ ដែលមានឆន្ទៈក្នុងការការពារជនភៀសខ្លួន និងអ្នកស្វែងរកសិទ្ធិជ្រកកោន។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត សាទរចំពោះការយកចិត្តទុកដាក់របស់អង្គការសហប្រជាជាតិទទួលបន្ទុកជនភៀសខ្លួនដែលបានជួយអន្តរាគមន៍បានភ្លាមៗ។
លោកថា៖ «ថៃជាភាគីមួយដែលមានអនុស្សារណៈ [MOU] ជាមួយឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួនប្រចាំនៅប្រទេសថៃ (UNHCR)។ អ៊ីចឹងត្រូវគោរព អនុសញ្ញានៃជនភៀនខ្លួន មិនអាចត្រូវចាប់បញ្ជូនមកកម្ពុជាឬទៅប្រទេសណាបានទេ ពីព្រោះអាហ្នឹងវាស្ថិតនៅក្រោមការគ្រប់គ្រងរបស់ UNHCR ទៅហើយ។ យើងក៏រីករាយការដែលអាជ្ញាធរថៃបានដោះលែងទៅតាមការអន្តរាគមន៍របស់ UNHCR ហើយ UNHCR រកប្រទេសទី៣ សម្រាប់ការស្នាក់នៅរបស់ព្រះតេជគុណ បូរ បេត»។
ព្រះតេជគុណ បូរ បេត ដែលតែងតែរិះគន់លោកនាយករដ្ឋមន្ត្រី ហ៊ុន សែន ឥតសំចៃមាត់ បានចាកចេញពីប្រទេសកម្ពុជាអំឡុងឆ្នាំ២០២០ ដោយបារម្ភខ្លាចមានការចាប់ខ្លួនពីសំណាក់អាជ្ញាធរកម្ពុជា។
ព្រះអង្គនិងព្រះសង្ឃមួយអង្គទៀតព្រះនាម ស៊ឹម សុវណ្ណឌី បានសម្ងំនៅវត្តដាច់ស្រយាលមួយ ស្ថិតនៅក្នុងខេត្តឧត្ដរមានជ័យ ក្រោយមក ព្រះចៅអធិការវត្តបានប្រាប់ព្រះអង្គថា អាជ្ញាធរនឹងចាប់ខ្លួនពួកគេ។ ក្រោយពីទទួលបានព័ត៌មានបែបនេះ ព្រះអង្គនិងព្រះសង្ឃមួយអង្គទៀតបានឆ្លងដែនចូលទៅក្នុងប្រទេសថៃ។
រហូតមកទល់ពេលនេះ មានការចាប់ខ្លួនពលរដ្ឋខ្មែរដែលរិះគន់រដ្ឋាភិបាលកម្ពុជានៅក្នុងប្រទេសថៃចំនួន៣លើករួចមកហើយ ដែលមានមនុស្សចំនួន៤នាក់ ដោយមនុស្ស៣នាក់មុន ជាអតីតមន្ត្រីនិងសកម្មជនបក្សប្រឆាំង ត្រូវបានបញ្ជូនមកឃុំខ្លួននៅពន្ធនាគារក្នុងប្រទេសកម្ពុជា៕
