អង្គការ សមាគម និងសម្ព័ន្ធសហជីពជាង២០ បង្ហាញការសោកស្ដាយចំពោះក្រុមហ៊ុន ណាហ្គាវើលដ៍ ដែលមានចេតនាក្នុងការប៉ុនប៉ងរំលាយរចនាសម្ព័ន្ធថ្នាក់ដឹកនាំសហជីព និងកាត់បន្ថយបុគ្គលិកជាប្រព័ន្ធជាង១ ៣០០នាក់ ដោយពួកគេបានចាត់ទុកការប៉ុនប៉ងបែបនេះថាជាការរំលោភច្បាប់ជាតិនិងអន្តរជាតិទាំងស្រុង ពិសេសអំឡុងពេលកម្ពុជាកំពុងជួបវិបត្តិកូវីដ-១៩។
អង្គការ សមាគម និងសហជីពទាំងនោះមានដូចជា សម្ព័ន្ធសហជីពកម្ពុជា, សមាគមសម្ព័ន្ធសហគមន៍កសិករកម្ពុជា, សម្ព័ន្ធសហជីពកម្មករចំណីអាហារ និងសេវាកម្មកម្ពុជា, សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ, សម្ព័ន្ធសហជីពសេរីកម្មករនៃព្រះរាជាណាចក្រកម្ពុជា, សម្ព័ន្ធខ្មែរជំរឿននិងការពារសិទ្ធិមនុស្ស លីកាដូ, មជ្ឈមមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់), សមាគមការពារសិទិ្ធមនុស្ស និងអភិវឌ្ឍន៍នៅកម្ពុជា (អាដហុក), អង្គការសមាគមធាងត្នោត និងអង្គការសហជីពផ្សេងៗទៀត។
ក្នុងសេចក្ដីថ្លែងការណ៍រួមចុះថ្ងៃទី១ ខែធ្នូ របស់អង្គការ សមាគម និងសហជីពជាង២០នោះ បានឱ្យដឹងថា កាលពីថ្ងៃទី៨ ខែមេសា ឆ្នាំ២០២១ តំណាងក្រុមហ៊ុន ណាហ្គាវើលដ៍ ប្រកាសគម្រោងកាត់បន្ថយបុគ្គលិកជាថ្នាក់ដឹកនាំសហជីព និងកម្មករនិយោជិតចំនួនសរុប១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ ក្រោមហេតុផលកម្ពុជាកំពុងជួបវិបត្តិកូវីដ-១៩។ ប៉ុន្តែការបញ្ឈប់នេះត្រូវបានសហជីពនិងកម្មករមួយចំនួនជំទាស់ ពីព្រោះក្រុមហ៊ុនមិនបានប្រឈមនឹងការខាតបង់លើមុខជំនួញរបស់ខ្លួនឡើយ។
ពួកគេថា ជាក់ស្ដែងកាលពីឆ្នាំ២០២០ ក្រុមហ៊ុនទទួលបានប្រាក់ចំណេញសុទ្ធ១០២លានដុល្លារ ហើយបើគិតត្រឹមរយៈពេល២ខែដើមឆ្នាំ២០២១ ក្រុមហ៊ុនក៏ទទួលបានប្រាក់ចំណេញសុទ្ធជាង១២៧លានដុល្លារផងដែរ។ ចំណែកបុគ្គលិកវិញ ត្រូវកាត់បន្ថយម៉ោងការងារដល់ទៅ៦០% ដើម្បីកាត់បន្ថយការចំណាយរបស់ក្រុមហ៊ុន និងទទួលបានប្រាក់ឈ្នួលទៅតាមចំនួនថ្ងៃជាក់ស្ដែងដែលបានចូលធ្វើការ។
ករណីនេះ អង្គការ សមាគម និងសហជីពទាំងនោះ បានបង្ហាញការសោកស្ដាយចំពោះក្រុមហ៊ុនល្បែងមួយនេះយ៉ាងខ្លាំង ជុំវិញចេតនានិងការប៉ុនប៉ងរំលាយរចនាសម្ព័ន្ធថ្នាក់ដឹកនាំសហជីព ព្រមទាំងគម្រោងកាត់បន្ថយបុគ្គលិកជាប្រព័ន្ធ ដោយរំលោភច្បាប់ នៅអំឡុងពេលកម្ពុជាកំពុងជួបវិបត្តិកូវីដ-១៩។
សេចក្ដីថ្លែងការណ៍ដដែលបញ្ជាក់ថា កម្មករ៩៥៦នាក់ ក្នុងចំណោម១ ៣២៩នាក់ ដែលទទួលបានការជូនដំណឹងពីក្រុមហ៊ុន ណាហ្គាវើលដ៍ បញ្ឈប់ពីការងារនោះ ពួកគេត្រូវបង្ខំចិត្តឈប់ពីការងារដោយមិនហ៊ានបន្តការតវ៉ាជាមួយក្រុមហ៊ុននោះទេ បើទោះបីជាដឹងថា ក្រុមហ៊ុនផ្ដល់ប្រាក់បញ្ចប់កិច្ចសន្យាការងារមិនត្រឹមត្រូវតាមច្បាប់ការងារ និងរងនូវភាពអយុត្តិធម៌ក៏ដោយ។
ចំណែកកម្មករ៣៧៣នាក់ ក្នុងចំណោម១ ៣២៩នាក់ ដែលទទួលបានការជូនដំណឹងពីក្រុមហ៊ុន ណាហ្គាវើលដ៍ បញ្ឈប់ពីការងារដែរនោះ បានជំទាស់មិនព្រមទទួលយកប្រាក់ជាថ្នូរបញ្ចប់កិច្ចសន្យាការងារ ដោយទាមទារឱ្យក្រុមហ៊ុនអនុវត្តតាមច្បាប់ស្ដីពីការងារ និងទទួលយកពួកគាត់ឱ្យចូលធ្វើការនៅកន្លែងដើមវិញ។
ប្រភពដដែលនិយាយទៀតថា បន្ទាប់ពីការចរចាគ្មានដំណោះស្រាយជាច្រើនលើករវាងកម្មករនិយោជិតនិងក្រុមហ៊ុន គឺកម្មករបានប្ដឹងទៅក្រសួងការងារ និងបណ្ដុះបណ្ដាលវិជ្ជាជីវៈ កាលពីខែមិថុនា ហើយបានបន្តនីតិវិធីទៅក្រុមប្រឹក្សាអាជ្ញាកណ្ដាលនៅដើមខែកក្កដា ឆ្នាំ២០២១។
ក្រុមប្រឹក្សាអាជ្ញាកណ្ដាល បានចេញសេចក្ដីបង្គាប់កាលពីថ្ងៃទី១០ ខែកញ្ញា ឆ្នាំនេះ ដោយឯកភាពតាមក្រុមហ៊ុនដែលបញ្ឈប់កម្មករ ប៉ុន្តែមិនបានបញ្ជាក់ពីមូលហេតុច្បាស់លាស់ និងយោងតាមច្បាប់ស្ដីពីការងារដែលចែងពីតួនាទីក្រុមប្រឹក្សាអាជ្ញាកណ្ដាល ត្រូវកាត់សេចក្ដីរាល់វិវាទដែលបានបញ្ជូនដោយរដ្ឋមន្ត្រីក្រសួងការងារនោះទេ បែរជារុញការងារនេះត្រលប់ទៅក្រសួងការងារវិញ។
សេចក្ដីថ្លែងការណ៍ដដែលបានអំពាវនាវទៅរដ្ឋាភិបាលពិនិត្យនិងជួយអន្តរាគមន៍ផ្ដល់ដំណោះស្រាយសមស្របលើករណីនេះ និងសុំឱ្យថ្នាក់ដឹកនាំក្រុមហ៊ុន ណាហ្គាវើលដ៍ ចរចាជាមួយតំណាងសហជីព ដើម្បីស្វែងរកដំណោះស្រាយណាមួយដែលអាចទទួលយកបានទាំងសងខាង ប្រកបដោយភាពស្មោះត្រង់ និងបង្កើតទំនាក់ទំនងវិជ្ជាជីវៈល្អជាមួយសហជីពនៅកន្លែងការងារ។ លើសពីនេះ ត្រូវទទួលយកកម្មករ៣៧៣នាក់ចូលបម្រើការងារវិញ និងបញ្ឈប់ការរើសអើងឬធ្វើទុក្ខបុកម្នេញផ្សេងៗទៅលើសហជីពជាដើម ។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ មានប្រសាសន៍ថា ក្រុមហ៊ុន ណាហ្គាវើលដ៍ បញ្ឈប់បុគ្គលិកជាបន្តបន្ទាប់ ជាការរំលោភលើសិទ្ធិជាមូលដ្ឋានរបស់កម្មករនិយោជិត ព្រមទាំងរំលោភច្បាប់ការងារ រដ្ឋធម្មនុញ្ញ និងអនុសញ្ញាស្នូលរបស់អង្គការពលកម្មអន្តរជាតិលេខ៩៨ ដែលកម្ពុជាផ្ដល់សច្ចាប័ន ដោយអនុសញ្ញានេះធានាដល់ការការពារនូវសិទ្ធិសេរីភាពផ្នែកអង្គការវិជ្ជាជីវៈសហជីព។
មន្ត្រីសិទ្ធិមនុស្សរូបនោះបញ្ជាក់ថា បើសិនជារដ្ឋាភិបាលនិងក្រសួងការងារនៅតែបណ្ដែតបណ្ដោយឱ្យក្រុមហ៊ុន ណាហ្គាវើលដ៍ បញ្ឈប់បុគ្គលិករបស់ខ្លួនដោយរំលោភច្បាប់ការងារទៀតនោះ ករណីនេះនឹងក្លាយជាគំរូមិនល្អសម្រាប់វិស័យការងារ។
លោកមានប្រសាសន៍ថា៖ «បង្ហាញពីគំរូអាក្រក់ បង្ហាញពីនីតិរដ្ឋនៅក្នុងប្រទេសកម្ពុជា ក្រុមហ៊ុនដែលគាត់មានឥទ្ធិពល ដែលគាត់មានអំណាច ដែលគាត់អាចធ្វើអ្វីតាមតែចិត្តបាន ហើយច្បាប់នៅក្នុងប្រទេសកម្ពុជាយើងបង្កើតមកដើម្បីអ្វី? ច្បាប់ស្ដីពីការងារ រដ្ឋធម្មនុញ្ញមាត្រា៣៦ បាននិយាយពីសិទ្ធិសេរីភាពផ្នែកអង្គការវិជ្ជាជីវៈ ផ្នែកសមាគម ច្បាប់ស្ដីពីសហជីព តើយើងយកទៅណា? បើ[ក្រុមហ៊ុន]ណាហ្គាអាចធ្វើទៅបាន ក្រុមហ៊ុនផ្សេងៗទៀតដែលមានឥទ្ធិពលក៏អាចធ្វើបានដូចគ្នា ដូចណាហ្គាអ៊ីចឹង។ ជាក់ស្ដែង កម្មករនិយោជិតដែលគាត់ទទួលរងនូវផលប៉ះពាល់ជាងគេ»។
វីអូឌី មិនអាចសុំការបំភ្លឺពីប្រធានគ្រប់គ្រងផ្នែកទំនាក់ទំនងបុគ្គលិករបស់ក្រុមហ៊ុនកាស៊ីណូ ណាហ្គា វើលដ៍ (Naga World) អ្នកនាង ឌី សីហា និងអ្នកនាំពាក្យក្រសួងការងារ លោក ហេង សួរ បានទេ នៅថ្ងៃពុធនេះ។
ប្រធានសហជីពនៅក្រុមហ៊ុនកាស៊ីណូ ណាហ្គាវើលដ៍ (Naga World) កញ្ញា ឈឹម ស៊ីថរ មានប្រសាសន៍ថា កម្មករនិយោជិតជាង១ ៣០០នាក់ដែលក្រុមហ៊ុន ណាហ្គាវើលដ៍ បានបញ្ឈប់ជាបន្តបន្ទាប់នោះ ភាគច្រើនជាសមាជិកគាំទ្រសហជីពនៅក្នុងក្រុមហ៊ុននេះ។ កញ្ញាចាត់ទុកការបញ្ឈប់បុគ្គលិកនេះ ថាជាការរើសអើងក្នុងវិស័យការងារ និងរំលោភច្បាប់ការងារផងដែរ ។
កញ្ញាព្រមានថា បើក្រសួងការងារ និងក្រុមហ៊ុន មិនរកវិធីដោះស្រាយជូនកម្មករឱ្យស្របតាមច្បាប់ការងារទេ នោះពួកគេប្រមាណ១ ៥០០នាក់ ទៅ២ ០០០នាក់ នឹងនាំគ្នាធ្វើកូដកម្មនៅមុខក្រុមហ៊ុន ក្នុងថ្ងៃទី១៨ ខែធ្នូ ខាងមុខនេះ ដើម្បីទាមទាររកយុត្តិធម៌ជូនកម្មករដែលត្រូវបានក្រុមហ៊ុនបញ្ឈប់និងគ្រោងបញ្ឈប់ជាបន្តបន្ទាប់។
កញ្ញាមានប្រសាសន៍ថា៖ «ឥលូវនេះមិនទាន់ផ្ដល់យុត្តិធម៌ឬជាដំណោះស្រាយពីអ្នកពាក់ព័ន្ធ ជាពិសេសក្រសួងការងារ ដែលមានតួនាទីក្នុងការមើលការខុសត្រូវក្នុងការអនុវត្តច្បាប់របស់ក្រុមហ៊ុននានាដែលបានរកស៊ីនៅក្នុងប្រទេសកម្ពុជាយើង។ កម្មករនិយោជិតមានសិទ្ធិទាមទាររកយុត្តិធម៌ដែរ គឺសិទ្ធិក្នុងការប្រើប្រាស់ក្នុងការទាមទារធ្វើកូដកម្មដោយអហិង្សា ដោយសន្តិវិធី ដើម្បីរកដំណោះស្រាយ។ ហើយជាចុងក្រោយនេះ បុគ្គលិកគាត់បានរួបរួមគ្នាសម្រេចជាឯកច្ឆន្ទថា នឹងធ្វើកូដកម្មនៅថ្ងៃទី១៨ ខែធ្នូ ឆ្នាំ២០២១ រហូតដល់មានដំណោះស្រាយ» ។
កាលពីថ្ងៃទី២០ ខែកញ្ញា ឆ្នាំ២០២១ ក្រុមហ៊ុន NagaCorp បានចេញរបាយការណ៍បណ្ដោះអាសន្នស្ដីពីប្រាក់ចំណូលក្នុងរយៈពេល៦ខែដើមឆ្នាំនេះ របស់អាជីវកម្មក្រុមហ៊ុនសាខាណាហ្គាវើលដ៍។ តាមរបាយការណ៍កម្រាស់៥៦ទំព័រនោះ ណាហ្គាវើលដ៍ រកចំណូលបានជាង១៣០លានដុល្លារ នៅពាក់កណ្ដាលដើមឆ្នាំ២០២១ ដោយធ្លាក់ចុះជិត៣០០ភាគរយ ធៀបនឹងរយៈពេលដូចគ្នាក្នុងឆ្នាំ២០២០ ដែលទទួលបានជាង៣៧៧លានដុល្លារ ខណៈប្រាក់ចំណេញដុលទទួលបានជាង៧៤លានដុល្លារ ធ្លាក់ចុះជាង២៣០ភាគរយ៕
