ពលរដ្ឋរាប់រយនាក់មកពី៧សហគមន៍ក្នុងស្រុកចំនួន៣នៃខេត្តកោះកុង បានប្រមូលផ្ដុំគ្នាតវ៉ានៅមុខសាលាខេត្តកោះកុង នៅព្រឹកថ្ងៃពុធនេះ ដើម្បីទាមទារឱ្យមានដំណោះស្រាយរឿងវិវាទដីធ្លី ខណៈតុលាការក៏បានកោះហៅតំណាងពលរដ្ឋ៩នាក់ឱ្យចូលបំភ្លឺនៅថ្ងៃនេះ។
មន្ត្រីសម្របសម្រួលសហគមន៍នៅសមាគមសម្ព័ន្ធសហគមន៍កសិករកម្ពុជាប្រចាំខេត្តកោះកុង និងកំពង់ស្ពឺ លោក ញ៉ិល ភាព ដែលឃ្លាំមើលករណីនេះ ប្រាប់ វីអូឌី ថាប្រជាពលរដ្ឋប្រមាណ៧០០នាក់ មកពីសហគមន៍ចំនួន៧ ស្ថិតក្នុងស្រុកស្រែអំបិល ស្រុកបទុមសាគរ និងស្រុកថ្មបាំង ខេត្តកោះកុង ដែលមានជម្លោះដីធ្លីជាមួយក្រុមហ៊ុនស្ករអំពៅ ឧកញ៉ា លី យ៉ុងផាត់ និងលោក ហេង ហ៊ុយ ជាមន្ត្រីនគរបាលជាន់ខ្ពស់ម្នាក់នៅខេត្តនេះ បានប្រមូលផ្ដុំគ្នាឈរលើកបដានៅមុខសាលាខេត្ត និងសាលាដំបូងខេត្តកោះកុង ដើម្បីតាមដានញត្តិនិងដាក់ញត្តិជាថ្មីទៅកាន់សាលាខេត្តឱ្យជួយអន្តរាគមន៍ដោះស្រាយវិវាទដីធ្លីរបស់ពួកគេ។
លោកបន្តថា ការប្រមូលផ្ដុំតវ៉ារបស់ប្រជាពលរដ្ឋនេះ ក៏ដើម្បីទៅគាំទ្រតំណាងរបស់ពួកគេចំនួន៩នាក់ដែលត្រូវចូលសវនាកានៅថ្ងៃទី២៤ ខែវិច្ឆិកា ឆ្នាំ២០២១នេះដែរ។
មន្ត្រីសង្គមស៊ីវិលរូបនេះបន្តទៀតថា ការផ្ទុះការតវ៉ារបស់អ្នកភូមិនេះ ដោយសារតែអាជ្ញាធរពាក់ព័ន្ធពុំមានឆន្ទៈក្នុងការដោះស្រាយបញ្ហាដីធ្លីជូនពលរដ្ឋ និងពលរដ្ឋមួយចំនួនបានជាប់បណ្ដឹងនៅតុលាការយ៉ាងអយុត្តិធម៌ដោយសារបញ្ហាជម្លោះដីធ្លី។
លោកបន្ថែមថា៖ «ថ្មីៗនេះ យើងឃើញអាជ្ញាធរខេត្តកោះកុងបានកាត់ដីជាង១២ម៉ឺនហិកតា ដើម្បីដោះស្រាយ ឬក៏ផ្ដល់ជាដីសម្បទានសង្គមជូនពលរដ្ឋ ប៉ុន្តែការពិត ការកាត់ដីហ្នឹងគឺដីភាគច្រើនបានទៅលើបុគ្គលគ្រួសារបក្ខពួកក្រុមអ្នកដឹកនាំតាំងពីថ្នាក់មូលដ្ឋានដល់ថ្នាក់ជាតិហ្នឹង ដែលប្រជាពលរដ្ឋរងគ្រោះពិតប្រាកដហ្នឹងមិនសូវទទួលបានការដោះស្រាយទេ។ មិនដោះស្រាយហើយប្ដឹងពលរដ្ឋជាច្រើនដាក់មកតុលាការថែមទៀត»។
តំណាងពលរដ្ឋ៩នាក់ នៅសហគមន៍១៩៧ រួមមាន អ្នកស្រី អិប តឹង, អ្នកស្រី ដេត ហួរ, អ្នកស្រី កើត នៅ, អ្នកស្រី អ៊ិន ធូ, លោក គង់ មែន និងតំណាងពលរដ្ឋផ្សេងទៀត ត្រូវចូលសវនាការនៅថ្ងៃទី២៤ ខែវិច្ឆិកានេះ ដើម្បីឆ្លើយបំភ្លឺក្រោមបទចោទ «បរិហារកេរ្តិ៍ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ទៅតាមបណ្ដឹងរបស់លោក ហេង ហ៊ុយ ប្រធានក្រុមហ៊ុន ហេង ហ៊ុយ អភិវឌ្ឍន៍។
បើតាមសេចក្ដីរាយការណ៍ អាជ្ញាធរខេត្តបានអនុញ្ញាតឱ្យតំណាងប្រជាពលរដ្ឋចំនួន១០នាក់ចូលជួបនិងដាក់ញត្តិ ខណៈប្រជាពលរដ្ឋរាប់រយនាក់ទៀតបានអង្គុយនៅខាងក្រៅ ដើម្បីរង់ចាំស្ដាប់លទ្ធផល៕