ក្រុមគ្រួសារដែលអះអាងថាជាជនរងគ្រោះក្នុងអំពើបាញ់ប្រហាររហូតបាត់បង់ជីវិត សម្រេចចិត្តប្ដឹងឧទ្ធរណ៍ប្រឆាំងសេចក្ដីសម្រេចរបស់សាលាដំបូងខេត្តបន្ទាយមានជ័យ ដោយចោទប្រកាន់ថា បានជួយដោះបន្ទុកឱ្យជនជាប់ចោទរួចផុតពីការចោទប្រកាន់ និងបានបើកផ្លូវឱ្យជនសង្ស័យបាននៅក្រៅឃុំ។
បណ្ដឹងមួយច្បាប់ចុះថ្ងៃទី១៦ ខែវិច្ឆិកា ដែល វីអូឌី ទទួលបាននៅថ្ងៃនេះ ឱ្យដឹងថា ឈ្មោះ ហាច ឡៃហ៊ាង អាយុ៥៦ឆ្នាំ និងស្រ្តីជាភរិយាឈ្មោះ ឈួន សំណាង អាយុ៥៤ឆ្នាំ បានដាក់បណ្ដឹងឧទ្ធរណ៍ប្រឆាំងទៅនឹងសាលក្រមដែលសម្រេចឱ្យឈ្មោះ ហ៊ឹម សុខណា ជាជនត្រូវចោទ រួចផុតពីការចោទប្រកាន់។
តាមរយៈបណ្ដឹងដដែលនេះសរសេរថា កាលពីថ្ងៃទី៤ ខែវិច្ឆិកា កន្លងទៅនេះ តុលាការខេត្តបន្ទាយមានជ័យ បានចេញសាលក្រមដោយសម្រេចឱ្យជនត្រូវចោទរួចផុតពីការចោទប្រកាន់ និងបន្តរស់នៅក្រៅឃុំមកដល់សព្វថ្ងៃ។
បន្ថែមលើបណ្ដឹងនេះ លោក ហាច ឡៃហ៊ាង ដែលត្រូវជាឪពុករបស់យុវជន ហ៊ាង សុគន្ធារ៉ា បញ្ជាក់នៅថ្ងៃចន្ទនេះថា មូលហេតុដែលលោកប្ដឹងឧទ្ធរណ៍នេះ ដោយសារសាលក្រមស្ថាពររបស់តុលាការខេត្តបន្ទាយមានជ័យ មិនបានផ្ដល់យុត្តិធម៌សម្រាប់ក្រុមគ្រួសារលោក ក្នុងនាមជាជនរងគ្រោះឡើយ។ មិនត្រឹមតែប៉ុណ្ណោះ លោកថា សូម្បីសំណងក៏ជនជាប់ចោទមិនបានផ្ដល់ឱ្យដែររហូតមកដល់ពេលនេះ។
លោកបន្តថា៖ «ខ្ញុំគិតថា វាអត់មានហេតុផលថាវាគួរតែរួចខ្លួន! ហេតុអីបានជាវាទៅជារួចខ្លួនបាន? វាសម្លាប់គេមួយហើយ វាមិនត្រូវរួចខ្លួនទេ»។
លោក ហាច ឡៃហ៊ាង ដែលរស់នៅក្រុងប៉ោយប៉ែត ខេត្តបន្ទាយមានជ័យ ឱ្យដឹងទៀតថា យុវជន ហ៊ាង សុគន្ធារ៉ា ដែលជាកូនរបស់គាត់ ត្រូវបានឈ្មោះ ហ៊ឹម សុខណា ជាមន្ត្រីនគរបាល បាញ់សម្លាប់ដោយកាំភ្លើងខ្លី កាលពីខែឧសភា ឆ្នាំ២០២០ នៅក្រុងប៉ោយប៉ែត ហើយមកដល់ពេលនេះ ករណីឃាតកម្មនេះនៅមិនទាន់ដឹងពីមូលហេតុពិតប្រាកដនៅឡើយ។
យ៉ាងនេះក្ដី អធិការក្រុងប៉ោយប៉ែត លោក សៅ សារឿន បញ្ជាក់ថា រឿងក្ដីព្រហ្មទណ្ឌមួយនេះជារឿងចាស់ និងបានផុតដៃរបស់លោកទៅហើយ។
លោកបន្តថា៖ «រឿងនេះបានដល់តុលាការហើយ បង! បងសួរខាងតុលាការគេ បង! ព្រោះអីប្អូនទើបមកកាន់បានប្រមាណ៧ទៅ៨ខែទេ បង! រឿងនេះតាំងពីអធិការចាស់គេនៅ»។
ចំណែកអ្នកនាំពាក្យសាលាដំបូងខេត្តបន្ទាយមានជ័យ លោក រឿន លីណា បដិសេធក្នុងការផ្ដល់អត្ថាធិប្បាយ ទាក់ទិនរឿងក្ដីនេះ ដោយអះអាងយ៉ាងខ្លីថាជាប់រវល់ប្រជុំ។
លោក ស៊ុំ ចន្ទគា អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តបន្ទាយមានជ័យ មានប្រសាសន៍ថា បើក្នុងករណីដើមបណ្ដឹងមិនពេញចិត្តចំពោះការសម្រេចរបស់ចៅក្រមដែលទទួលបន្ទុកក្នុងសំណុំរឿងនេះ ជនរងគ្រោះអាចប្ដឹងដូរចៅក្រមបាន។ លើសពីនេះទៀត លោកថា ភាគីជាដើមបណ្ដឹង ប្រសិនបើទទួលភាពអយុត្តិធម៌ គឺអាចប្ដឹងឧទ្ធរណ៍បន្តទៀតបាន ប្រឆាំងសេចក្ដីសម្រេចរបស់តុលាការថ្នាក់ដំបូង។
លោកបន្តថា៖ «បើភាគីណាមួយគិតថាមិនបានផ្ដល់យុត្តិធម៌ វាហាក់ដូចជាលម្អៀង ឬហាក់ដូចជាស្អីអ៊ីចឹង ទី១ បើសិនជាមិនទាន់ជម្រះទេ ពួកគាត់មានសិទ្ធិប្ដឹងប្តូរចៅក្រមបាន បើយើងយល់ឃើញថាចៅក្រមហ្នឹងវាមិនត្រឹមត្រូវ មិនអាចរកយុត្តិធម៌ជូនខ្លួនបាន ឬមានជាប់ផលប្រយោជន៍ណាមួយនៅក្នុងរឿងក្ដី»៕
