សាលាដំបូងខេត្តកំពត បាននិងកំពុងសាកសួរអ្នកសារព័ត៌មាន២នាក់ នៅថ្ងៃពុធនេះ បន្ទាប់ពីសមត្ថកិច្ចចាប់ខ្លួនពួកគេពាក់ព័ន្ធការផ្សាយព័ត៌មានរឿងជម្លោះដីធ្លីនិងការចាប់ខ្លួនពលរដ្ឋ៤នាក់នៅខេត្តនេះ។
ក្នុងលិខិតមួយចុះថ្ងៃទី៩ ខែវិច្ឆិកា ឆ្នាំ២០២១ ស្នងការដ្ឋានខេត្តកំពត បានឱ្យដឹងថា កាលពីថ្ងៃទី៧ ខែវិច្ឆិកា សមត្ថកិច្ចបានឃាត់ខ្លួនពលរដ្ឋ៤នាក់ ក្រោមការចោទប្រកាន់ថា បានប្រើហិង្សាទៅលើអ្នកកាន់កាប់អចលនវត្ថុដោយសុចរិត និងញុះញង់ឱ្យប្រព្រឹត្តបទឧក្រិដ្ឋជាអាទិ៍។ លិខិតដដែលបន្តថា នៅថ្ងៃទី៨ ខែវិច្ឆិកា អ្នកព័ត៌មាន LSN TV ចំនួន២នាក់ បានទៅសម្ភាសពលរដ្ឋ ហើយផ្សាយផ្ទាល់តាមហ្វេសប៊ុក ពាក់ព័ន្ធជម្លោះដីធ្លីនិងការចាប់ខ្លួនពលរដ្ឋ៤នាក់នោះ។
ស្នងការដ្ឋានខេត្តកំពត បន្តទៀតថា ក្នុងការចុះផ្សាយនោះ គឺអ្នកសារព័ត៌មានបានធ្វើអត្ថាធិប្បាយវាយប្រហារលើចំណាត់ការរបស់សមត្ថកិច្ចនិងអាជ្ញាធរមូលដ្ឋាន ដោយមិនបានទាក់ទងសមត្ថកិច្ចសួរនាំឱ្យបានច្បាស់ពីមូលហេតុនៃការចាប់ខ្លួនពលរដ្ឋទាំង៤នាក់នោះឡើយ ដែលជាហេតុធ្វើឱ្យប្រជាពលរដ្ឋយល់ច្រឡំលើសមត្ថកិច្ចនិងអាជ្ញាធរមូលដ្ឋានជុំវិញចំណាត់ការនេះ។
ស្នងការដ្ឋានខេត្តកំពត ក៏បានចាត់ទុកការផ្សព្វផ្សាយរបស់សារព័ត៌មាននេះ ថាបានជំរុញឱ្យពលរដ្ឋបង្កើនសកម្មភាពចូលទន្ទ្រានកាន់កាប់ដីមានបណ្ណកម្មសិទ្ធិស្របច្បាប់ និងបានចាត់ទុកការផ្សាយនេះថាបានញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទបរិហារកេរ្តិ៍ ដែលសមត្ថកិច្ចត្រូវតែធ្វើការឃាត់ខ្លួននៅថ្ងៃទី៨ ខែវិច្ឆិកានោះតែម្តង។
ពាក់ព័ន្ធករណីនេះ ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធ សុំមិនបកស្រាយបន្ថែមទេ ដោយលោកប្រាប់ វីអូឌី យ៉ាងខ្លីនៅថ្ងៃពុធនេះថា អ្នកសារព័ត៌មានទាំង២នាក់នោះ សមត្ថកិច្ចបានបញ្ជូនទៅតុលាការហើយ កាលពីល្ងាចថ្ងៃម្សិលមិញ។
ចំណែកអ្នកនាំពាក្យសាលាដំបូងខេត្តកំពត លោក ខា ដែនណា មានប្រសាសន៍ថា តុលាការកំពុងដំណើរការសាកសួរ ដោយមិនទាន់សម្រេចថាយ៉ាងណានៅឡើយទេ។
លោកបន្ថែមថា៖ «ឥលូវនេះ តំណាងអយ្យការកំពុងសាកសួរនៅឡើយ។ ប្រសិនបើមានព័ត៌មានចោទប្រកាន់ឬក៏អី ចាំខ្ញុំប្រាប់។ រឿងនេះប្រហែលជាស្អែកអីបានដឹង»។
អគ្គនាយកសារព័ត៌មាន LSN TV លោក លួស សេង មានប្រសាសន៍ថា អាជ្ញាធរបានសន្យាដោះលែងអ្នកសារព័ត៌មាន២នាក់នោះនៅព្រឹកថ្ងៃពុធនេះ ក្រោយពីពួកគេផ្សាយសុំទោសក្រុមថ្នាក់ដឹកនាំខេត្ត ប៉ុន្តែក្រោយសុំទោសរួច បែរមិនមានការដោះលែងនោះទេ ហើយពួកគេត្រូវបានបញ្ជូនទៅតុលាការថែមទៀត។
លោកបន្ថែមថា៖ «គ្រាន់តែពួកគាត់ទៅធ្វើសេចក្ដីរាយការណ៍តាមការពឹងពាក់របស់ប្រជាពលរដ្ឋ ដែលប្រជាពលរដ្ឋឱ្យទៅជួយផ្សាយ ដើម្បីអំពាវនាវដល់អភិបាលខេត្ត លោក ម៉ៅ ធនិន ឱ្យជួយដោះស្រាយវិវាទដីធ្លី និងជួយដោះលែងពលរដ្ឋ៤នាក់ឱ្យមានសេរីភាពវិញ។ ផ្ទុយទៅវិញ មិនជួយអន្តរាគមន៍ដោះស្រាយជូនប្រជាពលរដ្ឋ បែរជាចាប់អ្នកសារព័ត៌មានបន្ថែមទៀត។ សេរីភាពសារព័ត៌មាននៅណា? បើគ្រាន់តែទៅផ្សាយព័ត៌មានហ្នឹង ត្រូវជាប់ទោសទណ្ឌដែរនោះ! អ៊ីចឹងសកម្មភាពនេះ ខ្ញុំយល់ឃើញថា ជាការបំភិតបំភ័យ បំបាក់ស្មារតីអ្នកសារព័ត៌មាន មិនឱ្យហ៊ានផ្សាយអ្វីមួយក្រៅពីអាជ្ញាធរលោកឯកភាព ដែលនេះជាទង្វើមិនត្រឹមត្រូវឡើយ»។
ក្នុងវីដេអូឃ្លីមួយមានរយៈពេលជាង៣នាទី ដែលបានផ្សព្វផ្សាយតាមបណ្ដាញសង្គមហ្វេសប៊ុក និងតេឡេក្រាម អ្នករាយការណ៍ព័ត៌មាន LSN TV ២នាក់ រួមមាន លោក សាយ សុភា និងលោក អ៊ីង ធឿង បាននិយាយសុំទោសជាសាធារណៈចំពោះអភិបាលខេត្តកំពតថ្មី លោក ម៉ៅ ធនិន និងស្នងការខេត្តកំពត លោក ម៉ៅ ច័ន្ទមធុរិទ្ធ ដោយថា ពួកគេបានធ្វើការអធិប្បាយខុសឆ្គង និងសុំឱ្យថ្នាក់ដឹកនាំខេត្តនេះលើកលែងទោសផងដែរ។
សម្ដីក្នុងវីដេអូឃ្លីប៖ «ខ្ញុំឈ្មោះ សាយ សុភា សារព័ត៌មាន LSN TV Online ថ្ងៃនេះខ្ញុំមកធ្វើការបកស្រាយ និងសុំទោសដល់លោកអភិបាលខេត្ត និងស្នងការខេត្តកំពត ដែលខ្ញុំបានជ្រុលជ្រួសបាននិយាយខុសឆ្គងត្រង់ប្រការណាមួយ សូមលោកទាំងពីរអធ្យាស្រ័យដល់យើងខ្ញុំផង ដែលបានធ្វើខុសកន្លងមក រឿងវិវាទដីធ្លីនៅថ្ងៃទី៨ ខែវិច្ឆកានេះ ដោយមានពាក្យពេចន៍ខុសឆ្គង»។
វីអូឌី មិនអាចសុំការបញ្ជាក់បន្ថែមពីអ្នកសារព័ត៌មានទាំង២នាក់នេះបានទេ ជុំវិញករណីនេះ។ ប៉ុន្តែបើតាមអគ្គនាយកសារព័ត៌មាន LSN TV Online លោក លួស សេង ការសុំទោសរបស់អ្នកសារព័ត៌មានទាំង២នាក់នោះធ្វើឡើង ក្រោយពីសមត្ថកិច្ចខេត្តកំពតសន្យាដោះលែងក្រោយចាប់ឃុំខ្លួននៅស្នងការដ្ឋានខេត្តកំពតចំនួន២យប់។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី បានចាត់ទុកករណីនេះថា ជាការរំលោភលើសិទ្ធិសេរីភាព និងជាគំរាមកំហែង ទៅដល់ការអនុវត្តការងាររបស់អ្នកសារព័ត៌មាន។ លោក ណុប វី បានលើកឡើងថា ប្រសិនបើសមត្ថកិច្ចមើលឃើញថា ការរាយការណ៍របស់អ្នកសារព័ត៌មាននោះមានចំណុចខ្វះខាត និងមិនគ្រប់ជ្រុងជ្រោយនៅចំណុចណាមួយ ខាងសមត្ថកិច្ចត្រូវចេញសេចក្ដីបំភ្លឺឬបកស្រាយប្រាប់ទៅអ្នកសារព័ត៌មាននោះវិញ ដោយមិនត្រូវចាប់និងប្រើប្រាស់ប្រព័ន្ធតុលាការមកចាត់ការលើអ្នកសារព័ត៌មានបែបនេះទេ។
លោកបន្ថែមថា៖ «ខ្ញុំគិតថា រឿងនេះ វាបានបង្ហាញនូវរូបភាពនៃការគំរាមកំហែងដល់ការងារអ្នកសារព័ត៌មានខ្លាំង។ យើងដឹងហើយថា នៅខេត្តកំពត មានអភិបាលខេត្តថ្មី ដែលលោកមានកិត្តិនាមល្អជាមួយនឹងការដោះស្រាយបញ្ហាផ្សេងៗ។ អ៊ីចឹងខ្ញុំគិតថា រឿងទាំងអស់នេះ វាគួរតែមានការសហប្រតិបត្តិការ មានការបើកឱកាសឱ្យមានការចូលរួមធ្វើសេចក្ដីរាយការណ៍ឱ្យបានទូលំទូលាយរបស់អ្នកសារព័ត៌មាន ជាជាងប្រើប្រាស់រូបភាពផ្សេងៗទៅបង្ក្រាបអ្នកសារព័ត៌មាន និងទាមទារឱ្យមានការសហការជាមួយសមត្ថកិច្ច»។
របាយការណ៍ឃ្លាំមើលប្រចាំត្រីមាសជាលើកដំបូងរបស់សម្ព័ន្ធអ្នកសារព័ត៌មានកម្ពុជា (ខេមបូចា) ស្តីពី «ស្ថានភាពអ្នកសារព័ត៌មាននៅកម្ពុជា» បានរកឃើញថា មានអ្នកសារព័ត៌មានជិត១០នាក់បានរងនូវការយាយី និងជាប់ពន្ធនាគារ ដោយសារតែរាយការណ៍ពាក់ព័ន្ធរឿងជម្លោះដីធ្លីក្នុងរយៈពេល៣ខែចុងក្រោយនេះ បន្ទាប់ពីក្រសួងព័ត៌មានបានចេញសេចក្ដីជូនដំណឹងមួយដោយបើកផ្លូវឱ្យអាជ្ញាធរអាចចោទប្រកាន់ទៅលើអ្នកសារព័ត៌មាន ដែលអាជ្ញាធរថាបានរំខានដល់ការងាររបស់ពួកគេ។
អង្គការអ្នកកាសែតគ្មានព្រំដែន កាលពីពេលថ្មីៗនេះ បានបន្តផ្ដល់ចំណាត់ថ្នាក់សេរីភាពសារព័ត៌មាននៅកម្ពុជា ឆ្នាំ២០២១ ស្ថិតនៅក្នុងរូបភាពអាក្រក់ដដែល ដោយនៅលេខរៀងទី១៤៤ ក្នុងចំណោម១៨០ប្រទេសនៅលើពិភពលោក។
សេរីភាពសារព័ត៌មានដែលអង្គការនេះវាយតម្លៃ បង្ហាញថា កម្ពុជាបានធ្លាក់ចុះ៣ឆ្នាំជាប់ៗគ្នាចាប់តាំងពីឆ្នាំ២០១៧មក ពោលគឺចំណាត់ថ្នាក់លេខ១៤២ នៅឆ្នាំ២០១៨ ចំណាត់ថ្នាក់លេខ១៤៣ នៅឆ្នាំ២០១៩ និងចំណាត់ថ្នាក់លេខ១៤៤ នៅឆ្នាំ២០២០ និងឆ្នាំ២០២១នេះ៕