ពលរដ្ឋជិត២០០គ្រួសារ នៅស្រុកសំរោងទង ខេត្តកំពង់ស្ពឺ ចោទអាជ្ញាធរមូលដ្ឋានថា បានគប់គិតគ្នាលួចធ្វើបណ្ណកម្មសិទ្ធិលើដី៥៤ហិកតារបស់ពួកគេលក់ទៅឱ្យឈ្មួញ ប៉ុន្តែអាជ្ញាធរឃុំបានច្រានចោលការចោទប្រកាន់នេះ។
កាលពីខែកុម្ភៈ ឆ្នាំ២០២១ ក្រសួងរៀបចំដែនដី នគរូបនីយកម្ម និងសំណង់ បានចេញលិខិតមួយប្រាប់ដល់អភិបាលខេត្តកំពង់ស្ពឺ លោក វ៉ី សំណាង ឱ្យពិនិត្យនិងដោះស្រាយទំនាស់ដីធ្លីជូនពលរដ្ឋ១៨០គ្រួសារ នៅភូមិដូនអាត់ ឃុំស្គុះ ស្រុកសំរោងទង ក្រោយទទួលបានបណ្ដឹងពីក្រុមពលរដ្ឋដែលសុំឱ្យជួយទប់ស្កាត់ករណីអាជ្ញាធរមូលដ្ឋាននិងឈ្មួញគប់គិតគ្នាលួចធ្វើបណ្ណលើដីរបស់ពួកគេ។
លោក ជា សាវឿន ដែលអះអាងថាជាតំណាងពលរដ្ឋ១៨០គ្រួសារនោះ ប្រាប់ វីអូឌី នៅថ្ងៃចន្ទនេះថា អាជ្ញាធរពាក់ព័ន្ធនៅមូលដ្ឋានបានគប់គិតគ្នាជាមួយឈ្មួញមួយចំនួនលួចធ្វើបណ្ណកម្មសិទ្ធិលើដី៥៤ហិកតារបស់អ្នកភូមិ ដើម្បីពុះឡូត៍លក់យកលុយខ្លួនឯង។ លោកថា ដី១៥ហិកតាបានលក់ទៅឱ្យបុគ្គលឈ្មោះ សួង ពៅ និង សួង ណយ ហើយដីទំហំ៣៩ហិកតាទៀតបានលក់ឱ្យបុគ្គលឈ្មោះ ប៉ាក់ ចាន់ថុល។
តំណាងពលរដ្ឋបន្តថា ពលរដ្ឋបានចូលទៅអាស្រ័យផលលើដីកំពុងមានជម្លោះនោះតាំងពីឆ្នាំ១៩៨០ និងចាប់ផ្ដើមមានជម្លោះនៅឆ្នាំ២០១០ ខណៈអ្នកភូមិបានដាក់លិខិតសុំកាន់កាប់និងសុំបណ្ណកម្មសិទ្ធិ ប៉ុន្តែអាជ្ញាធរមូលដ្ឋានពីថ្នាក់ឃុំរហូតដល់ស្រុកមិនទទួលស្គាល់ឡើយ ហើយបានចោទតំណាងពលរដ្ឋថាជាអ្នកញុះញង់និងជាក្រុមប្រឆាំងទៅវិញ។
លោកបន្ថែមថា៖ «មន្ត្រីសាលាខេត្ត មន្ត្រីសាលាស្រុក មន្ត្រីឃុំ ពួកគាត់អត់រកដំណោះស្រាយឱ្យប្រជាពលរដ្ឋទេ។ គាត់មានតែគាបសង្កត់ប្រជាពលរដ្ឋ គាត់ថាពលរដ្ឋលក់ឱ្យគេហើយ ប៉ុន្តែពលរដ្ឋអត់មានបានទទួលស្គាល់ថាបានលក់ឱ្យបុគ្គលហ្នឹងទេ។ មេភូមិចាស់ លោក អម ចេវ គាត់ថា ដីហ្នឹងអត់មានបានលក់អីទេ ហើយប្រាប់ឱ្យប្រជាពលរដ្ឋយកមកវិញទៀត»។
តំណាងពលរដ្ឋម្នាក់ទៀត លោក នូ មីន និយាយថា ដីកំពុងមានជម្លោះនោះ កាលពីមុន ប្រជាពលរដ្ឋអាស្រ័យផល ដោយធ្វើស្រែ ដាំបន្លែ និងដាំដំណាំហូបផ្លែផ្សេងទៀត។ ពលរដ្ឋរូបនេះបានអំពាវនាវដល់ស្ថាប័នពាក់ព័ន្ធ ជាពិសេសរដ្ឋាភិបាលចុះស៊ើបអង្កេតករណីនេះនិងដោះស្រាយដោយចេញបណ្ណកម្មសិទ្ធិជូនពលរដ្ឋវិញ។
លោកបន្ថែមថា៖ «អាជ្ញាធរថ្នាក់ក្រោមជាតិហ្នឹងបានគប់គិតគ្នាជាប្រព័ន្ធលួចធ្វើបណ្ណកម្មសិទ្ធិលក់ឱ្យឈ្មួញធ្វើដីឡូត៍ ធ្វើផ្ទះល្វែង។ អ៊ីចឹងរឿងមានតែសម្ដេច[ហ៊ុន សែន]ទេ អាចជួយពលរដ្ឋបាន»។
តំណាងពលរដ្ឋរូបនេះបន្តថា ប្រសិននៅតែពុំមានដំណោះស្រាយទេ ពួកគេនឹងនាំគ្នាទៅរកអន្តរាគមន៍ដល់ខុទ្ទកាល័យនាយករដ្ឋមន្ត្រី ដើម្បីសុំអន្តរាគមន៍ពីលោកនាយករដ្ឋមន្ត្រី ហ៊ុន សែន ឱ្យដោះស្រាយ។
មេឃុំស្គុះ លោក កេត សុខុម បានច្រានចោលការចោទប្រកាន់នេះ។ លោកថា ដីដែលក្រុមពលរដ្ឋកំពុងតវ៉ានោះជាដីមានម្ចាស់និងមានបណ្ណកម្មសិទ្ធិត្រឹមត្រូវ ដោយបានទិញពីប្រជាពលរដ្ឋ។
មេឃុំរូបនេះបន្តថា ពលរដ្ឋបានលក់ដីនោះឱ្យឈ្មួញអស់ហើយ ប៉ុន្តែក្រោយមកក៏បានតវ៉ាទាមទារយកវិញ ក្រោយមានការញុះញង់ពីមេខ្យល់ ហើយចោទអាជ្ញាធរមូលដ្ឋានថាគប់គិតគ្នាធ្វើបណ្ណកម្មសិទ្ធិលក់ឱ្យឈ្មួញទៅវិញ។
លោកបន្ថែមថា៖ «បើមិនបានលក់ដីទាំងនោះទេ ហេតុអ្វីមិនព្រមតវ៉ាចាប់តាំងពីក្រុមការងារចុះវាស់ក្បាលដី បិទបញ្ជីក្បាលដី រហូតដល់មានការឈូសឆាយដាំបង្គោល? ខ្លួន[ពលរដ្ឋ]ថែមទាំងទៅរើសអុសយកមកដុតទៀតផង រឿងអ្វីឆ្លើយថាមិនដឹងគេឈូសឆាយដីនិងដីនេះមានម្ចាស់កម្មសិទ្ធិ?»
វីអូឌី មិនអាចសុំការឆ្លើយតបពីអភិបាលខេត្តកំពង់ស្ពឺ លោក វ៉ី សំណាង បានទេ នៅថ្ងៃចន្ទនេះ។
មន្ត្រីសម្របសម្រួលសមាគមអាដហុកប្រចាំខេត្តកំពង់ស្ពឺ លោក រ័ត្ន ថាវី មានប្រសាសន៍ថា ប្រសិនបើមានការចោទប្រកាន់ទៅវិញទៅមករវាងពលរដ្ឋនិងអាជ្ញាធរមូលដ្ឋានបែបនេះ គឺអាជ្ញាធរថ្នាក់ជាតិគួរតែចុះស្រាវជ្រាវនិងស៊ើបអង្កេតឱ្យបានច្បាស់លាស់ ដើម្បីរកយុត្តិធម៌ជូនភាគីនីមួយៗនិងដោះស្រាយបញ្ចប់។
លោកបន្ថែមថា៖ «បញ្ហាបែបហ្នឹង ទី១ អាជ្ញាធរថ្នាក់ជាតិត្រូវតែចុះធ្វើការសិក្សាស្រាវជ្រាវឱ្យបានច្បាស់លាស់ ពីព្រោះការឆ្លើយតបរបស់ភាគីទាំងពីរហ្នឹង វាផ្ទុយគ្នា! ដើម្បីរកឱ្យឃើញថា អ្នកណាខុសអ្នកណាត្រូវឱ្យពិតប្រាកដសិន ដើម្បីឈានទៅរកការដោះស្រាយជូនពលរដ្ឋដែលកំពុងតវ៉ាហ្នឹង»។
កាលពីថ្ងៃទី១៨ ខែមករា ឆ្នាំ២០២១ ពលរដ្ឋ២នាក់ដែលអះអាថាតំណាងឱ្យពលរដ្ឋ១៨០គ្រួសារ បានដាក់ញត្តិមួយទៅក្រសួងរៀបចំដែនដី សុំឱ្យលោក ជា សុផារ៉ា រដ្ឋមន្ត្រីក្រសួងមួយនេះ អន្តរាគមន៍ទៅអភិបាលខេត្តកំពង់ស្ពឺ លោក វ៉ី សំណាង និងប្រធានមន្ទីររៀបចំដែនដីខេត្ត ទប់ស្កាត់ការគប់គិតគ្នាពីសំណាក់អាជ្ញាធរភូមិ ឃុំ និងស្រុក និងឈ្មួញដីមួយចំនួន ដែលលួចធ្វើបណ្ណកម្មសិទ្ធិលើដីរបស់ពួកគេចំនួន៥៤ហិកតា និងស្នើចេញបណ្ណកម្មសិទ្ធិជូនពលរដ្ឋទាំង១៨០គ្រួសារផងដែរ៕