អង្គការសង្គមស៊ីវិលជិត៣០ បានអំពាវនាវឱ្យរដ្ឋាភិបាលកម្ពុជាបញ្ឈប់ការគំរាមកំហែងទៅលើអ្នកវិភាគ ខណៈអ្នកនាំពាក្យរដ្ឋាភិបាលថា ការធ្វើបទវិភាគណាមួយមិនត្រូវភ្ជាប់ជាមួយនិន្នាការនយោបាយឡើយ។
តាមរយៈសេចក្តីថ្លែងការណ៍រួមមួយនៅថ្ងៃទី២១ ខែកញ្ញានេះ ក្រុមអង្គការសង្គមស៊ីវិលចំនួន ២៨ បានចាត់ទុកថា ការគំរាមកំហែងទៅលើអ្នកវិភាគ គឺជាការគំរាមកំហែងសេរីភាពខាងការបញ្ចេញមតិនៅកម្ពុជា។
ក្រុមអង្គការសង្គមស៊ីវិលដែលក្នុងនោះ រួមមាន មជ្ឈមណ្ឌលសិទ្ធិមនុស្សកម្ពុជា (CCHR) សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (អាដហុក) រួមជាមួយអង្គការសង្គមស៊ីវិលមួយចំនួនទៀត បានអំពាវនាវដល់រដ្ឋាភិបាលកម្ពុជា បញ្ឈប់ការបំភិតបំភ័យលើអ្នកវិភាគបញ្ហាសង្គមនៅកម្ពុជា និងសំឡេងរិះគន់ផ្សេងទៀត ដោយគ្រាន់តែអ្នកទាំងនោះបញ្ចេញទស្សនៈ និងការយល់ឃើញសម្រាប់ផលប្រយោជន៍សាធារណៈនៅកម្ពុជា។
ក្រុមអង្គការសង្គមស៊ីវិលទាំងនោះ ក៏បានអំពាវនាវឱ្យរដ្ឋាភិបាលគោរពសិទ្ធិសេរីភាពក្នុងការបញ្ចេញមតិនៅកម្ពុជាផងដែរ។
ការអំពាវនាវនេះ បានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី១៧ ខែកញ្ញា បានព្រមានជាសាធារណៈ និងចំឈ្មោះរបស់លោកបណ្ឌិត មាស នី អ្នកវិភាគសង្គមកុំឱ្យ «ព្រហើនពេក» និងថែមទាំងបានគំរាមចាប់ខ្លួនអ្នកវិភាគសង្គមម្នាក់ទៀត គឺលោកបណ្ឌិត សេង សារី បន្ទាប់ពីលោកបានធ្វើបទវិភាគស្តីពីសេណារីយ៉ូ៦ចំណុចនៃលទ្ធភាពក្នុងការបង្កើតរដ្ឋាភិបាលបង្រួមបង្រួមជាតិ ដែលផ្តួចផ្តើមគំនិតដោយលោក សម រង្ស៊ី អតីតប្រធានគណបក្សសង្គ្រោះជាតិ។
ប៉ុន្តែក្រោយមកនៅថ្ងៃទី២០ខែកញ្ញា លោកនាយករដ្ឋមន្ត្រី ហ៊ុន សែន បានប្តូរជំហរដោយអំពាវនាវឱ្យតុលាការពិចារណាទម្លាក់ចោលការចោទប្រកាន់ទៅលើអ្នកស្រាវជ្រាវសង្គម លោកបណ្ឌិត សេង សារី វិញ និងដោយទទួលស្គាល់ថា ការអត្ថាធិប្បាយបែបវិភាគរបស់បណ្ឌិតរូបនេះ ជាការវិភាគបែបសេណារីយ៉ូ មិនមែនគាំទ្រគំនិតបង្កើតរដ្ឋាភិបាលបង្រួបបង្រួមជាតិ ដែលផ្តួចផ្តើមដោយអតីតមេដឹកនាំបក្សប្រឆាំង លោក សម រង្ស៊ី នោះឡើយ។
នៅថ្ងៃទី២១ ខែកញ្ញានេះ តុលាការក្រុងភ្នំពេញ ក៏បានចេញដីកាបញ្ឈប់ការតាមចាប់ខ្លួនលោកបណ្ឌិត សេង សារី ជាផ្លូវការតាមការអំពាវនាវរបស់លោកនាយករដ្ឋមន្ត្រី ហ៊ុន សែន។
ទោះជាបែបនេះក្តី នាយិការប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព បានថ្លែងថា ការគំរាមកំហែងលើអ្នកវិភាគបញ្ហាសង្គម និងនយោបាយ ដោយគ្រាន់តែអ្នកទាំងនោះប្រើប្រាស់សេរីភាពបញ្ចេញមតិស្របច្បាប់ គឺមិនគួរត្រូវបានធ្វើឡើងតាំងពីដំបូងមកម៉្លេះ។
លោកស្រីថា៖ «ដូចខ្ញុំបានគូសបញ្ជាក់ ករណីនៃការចាប់ខ្លួន ឬចោទប្រកាន់ទៅលើអ្នកវិភាគរូបនេះ មិនគួរកើតមានតាំងពីដំបូងមកម្លេះ ហើយទី២ មិនគួរមានការគំរាមកំហែងដោយផ្ទាល់ពីថ្នាក់ដឹកនាំជាន់ខ្ពស់នោះទេ ចឹងហើយសម្រាប់យើងអង្គការសង្គមស៊ីវិលយើងទទូចដល់ថ្នាក់ដឹកនាំ និងរដ្ឋាភិបាលក្នុងការធានាដល់សិទ្ធិសេរីភាពរបស់ពលរដ្ឋ មិនមែនតែអ្នកវិភាគនោះទេ ប៉ុន្តែសម្រាប់ពលរដ្ឋទូទៅផងដែរ ហើយការបើកចិត្តទូលាយ ដែលចុងក្រោយនេះមានការទទួលស្គាល់ និងការវិភាគអីជាដើមហ្នឹង ជាអ្វីដែលយើងចង់ឃើញថា នៅក្នុងសង្គមប្រជាធិបតេយ្យ យើងត្រូវបើកចិត្តឱ្យទូលាយក្នុងការទទួលស្គាល់ និងស្តាប់ឱ្យបានច្រើន ជជែកឱ្យបានច្រើន បើទោះបីជាមតិហ្នឹងស្របឬមិនស្របក៏ដោយ គឺត្រូវមានការទទួលស្គាល់នូវទស្សនៈចម្រុះហ្នឹង»។
ប៉ុន្តែប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានលើកឡើងថា ការវិភាគត្រូវទទួលខុសត្រូវចំពោះការវិភាគរបស់ខ្លួន។ លោកបន្តថា ការធ្វើបទវិភាគណាមួយមិនត្រូវភ្ជាប់ជាមួយនិន្នាការនយោបាយណាមួយនោះឡើយ។
លោក ផៃ ស៊ីផាន មានប្រសាសន៍យ៉ាងដូច្នេះថា៖ «គេនិយាយអ្វីនិយាយទៅ តែយើងត្រូវទទួលខុសត្រូវ ឃើញបណ្ឌិតថ្មីៗនេះ សម្តេចលោកអនុគ្រោះឱ្យហ្នឹងគាត់និយាយ គាត់បកស្រាយរបស់គាត់ត្រឹមត្រូវ គាត់ជាអ្នកវិភាគមួយដែលយើងស្តាប់ទៅ គាត់ប្រាប់ថា គាត់អត់មាននិន្នាការនយោបាយណាទេ បើយកចិត្តទុកដាក់ក៏យកទៅ បើមិនយកក៏ហីទៅ ដូច្នេះការលើកឡើងរបស់គាត់ហ្នឹង គឺជាការទទួលខុសត្រូវ ហើយអ្នកវិភាគមួយចំនួនហ្នឹង គឺអ្នកសកម្មជន ដែលប្រព័ន្ធផ្សព្វផ្សាយប្រឆាំងគេយកទៅធ្វើជា បុគ្គលក្នុងការវិភាគ បុគ្គលក្នុងការផ្សព្វផ្សាយ»។
យ៉ាងណាក្តី សេចក្តីថ្លែងការណ៍រួមរបស់អង្គការសង្គមស៊ីវិល បានចាត់ទុកថា សេរីភាពនៃការបញ្ចេញមតិ ជាសេរីភាពមូលដ្ឋានរបស់ពលរដ្ឋគ្រប់រូប ដោយមិនគួរត្រូវបានការពារ និងគោរព តែនៅពេលដែលប្រើប្រាស់ដើម្បីសរសើររដ្ឋាភិបាលនោះទេ ប៉ុន្តែគួរត្រូវបានអាជ្ញាធរគោរព និងការពារគ្រប់ការបញ្ចេញមតិទាំងអស់៕
