អ្នកសារព័ត៌មានសហគមន៍ជាស្រ្តីម្នាក់ ត្រូវបានសមត្ថកិច្ចខេត្តកណ្តាល ឃាត់ខ្លួនសួរនាំជាង ៧ម៉ោង ពេលចុះយកព័ត៌មានរឿងវិវាទដីធ្លី ខណៈពលរដ្ឋប្រមាណ ៣០នាក់ ដែលមានជម្លោះដីធ្លីជាមួយក្រុមហ៊ុនអភិវឌ្ឍន៍ព្រលាយន្តហោះអន្តរជាតិថ្មី កំពុងឃុំខ្លួននៅស្នងការដ្ឋាននគរបាលខេត្តនៅឡើយ គិតមកដល់ល្ងាចថ្ងៃចន្ទនេះ។
អ្នកស្រី ច្រាយ នីម ដែលត្រូវគេស្គាល់ថា ជាអ្នកតវ៉ាយ៉ាងសកម្មក្នុងរឿងជម្លោះដីធ្លីនាពេលកន្លងទៅ និងបច្ចុប្បន្នជាអ្នកសារព័ត៌មានសហគមន៍ ប្រាប់វីអូឌីក្រោយពេលសមត្ថកិច្ចដោះលែងថា អ្នកស្រីត្រូវបានសមត្ថកិច្ចឃាត់ខ្លួន នៅខាងមុខស្នងការដ្ឋាននគរបាលខេត្តកណ្តាល អំឡុងពេលអ្នកស្រី ព្យាយាមផ្តិតយករូបភាព ជុំវិញករណីតវ៉ារបស់ក្រុមសាច់ញាតិពលរដ្ឋ ៣០នាក់ ដែលសមត្ថកិច្ចចាប់ខ្លួននៅទីនោះ។
អ្នកស្រីបន្តថា ក្រោយការសួរនាំជាង ៧ម៉ោង និងមានការធានាពីកូនស្រីរបស់អ្នកស្រីផងនោះ សមត្ថកិច្ចខេត្ត បានសម្រេចដោះលែងអ្នកស្រីវិញ ខណៈអ្នកស្រីមិនត្រូវបានគេរកឃើញថា មានកំហុសក្នុងការផ្តិតយករូបភាពនេះទេ។
អ្នកស្រីបន្តថា៖ «គ្រាន់តែថាឱ្យកូនយើងធានាហើយគេសុំឱ្យយើងសហការជាមួយសមត្ថកិច្ច ប្រសិនបើទៅថតអី ហើយប្រាប់គេផង ហើយខ្ញុំថា ខ្ញុំមិនបានប្រាប់ទេ ខ្ញុំជាអ្នកសារព័ត៌មាន បើរាយការណ៍អាជ្ញាធរដែលឱ្យថតអី »។
នៅក្នុងជម្លោះដីធ្លី ពីគម្រោងការសាងសង់ព្រលានយន្តអន្តរជាតិភ្នំពេញថ្មី នៃក្រុមហ៊ុន អូស៊ីអាយស៊ី(OCIC) របស់លោកឧកញ៉ា ពុង ឃាវសែ នេះ មនុស្សយ៉ាងហោចណាស់ ៣០នាក់ ត្រូវបានសមត្ថកិច្ចចាប់ខ្លួន កាលពីថ្ងៃទី១២ ខែកញ្ញា ខណៈពួកគេតវ៉ាឱ្យមានដំណោះស្រាយសមរម្យ ពីផលប៉ះពាល់ដោយសារគម្រោងអភិវឌ្ឍន៍នេះ។
អ្នកស្រី តូច កែវ ដែលអះអាងថា ស្វាមីរបស់អ្នកស្រី ក៏ត្រូវបានសមត្ថកិច្ចចាប់ខ្លួន ក្នុងការតវ៉ានេះដែរ ឱ្យដឹងថា នៅពេលនេះ អ្នកដែលត្រូវបានចាប់ខ្លួនទាំងអស់ ត្រូវបានសមត្ថកិច្ចបញ្ជូន និងកំពុងឃុំខ្លួននៅស្នងការខេត្តកណ្តាល។ អ្នកស្រីឱ្យដឹងថា ក្រុមសាច់ញាតិទាំងអស់ ដែលមកប្រមូលផ្តុំគ្នានៅខាងមុខស្នងការខេត្ត ទាមទារឱ្យមានការដោះលែងអ្នកដែលត្រូវបានចាប់ខ្លួននោះវិញ។ អ្នកស្រីបន្តថា នៅព្រឹកមិញនេះ សមត្ថកិច្ច មិនអនុញ្ញាតឱ្យពួកគេចូលជួបមុខ និងផ្តល់សម្ភារៈ ឬបាយទឹកដោយផ្ទាល់ដៃដល់សាច់ញាតិរបស់ពួកគេឡើយ។
អ្នកស្រីបន្តថា៖ «ខ្ញុំយកបាយ ហើយនិងយកខោអាវឱ្យគាត់តែផ្ញើបានតែត្រឹមប៉ូលិសដែលយាមនៅនឹងមុខប៉ុស្តិ៍ហ្នឹងទេ។ យើងអត់បានជួបទេ គេអត់ឱ្យជួបទេ »។
បើតាមអ្នកស្រី តូច កែវ នៅក្នុងគ្រួសាររបស់អ្នកស្រី មានសមាជិក ២នាក់ ត្រូវបានសមត្ថកិច្ចចាប់ខ្លួន កាលពីថ្ងៃម្សិលមិញ រួមមាន ស្វាមី និងបងប្រុសរបស់អ្នកស្រី។
ដោយឡែក លោក ឡុង សុភ័ណ្ឌ ដែលអះអាងថា ប្អូនស្រីរបស់លោកត្រូវបានសមត្ថកិច្ចចាប់ខ្លួនដែរនោះ ចាត់ទុកការចាប់ខ្លួនពលរដ្ឋនេះថាជារឿងអយុត្តិធម៌ ខណៈពលរដ្ឋទាំងនោះគ្រាន់តែតវ៉ាទាមទារសំណងសមរម្យមួយប៉ុណ្ណោះ ក្នុងនាមជាម្ចាស់ដី។
លោកបន្តថា៖ «ធ្វើម៉េចបើការអភិវឌ្ឍប៉ះពាល់ចឹងហើយ គ្រាន់តែសុំឱ្យពួកគាត់រាងថ្លៃទៅ ដើម្បីអាចឱ្យពួកគាត់ទៅទិញដីចម្ការអីបានវិញអ៊ីចឹងទៅ។ ប្រជាពលរដ្ឋភាគច្រើន គឺពួកគាត់មិនទទួលយកតម្លៃ ៨ដុល្លារហ្នឹង »។
យ៉ាងនេះក្តី រដ្ឋបាលខេត្តកណ្តាល បានចេញសេចក្តីប្រកាសព័ត៌មានភ្លាមៗ ក្រោយហេតុការណ៍នេះផ្ទុះឡើង ដោយបញ្ជាក់ថា ការប្រើប្រាស់វិធានការទៅលើពលរដ្ឋទាំងនោះ គឺជាការបង្ខំចិត្តតែប៉ុណ្ណោះ។ ម្យ៉ាងវិញទៀត អ្នកតវ៉ាមានគ្នាប្រមាណ ១០០នាក់ បានប្រើប្រាស់ដំបង គប់ដុំថ្ម បាញ់ជំពាមកៅស៊ូ និងគប់ដបសាំង មកលើសមត្ថកិច្ច បណ្តាលឱ្យសមត្ថកិច្ចដែលឈរជើងការពារ និងរក្សាសណ្តាប់ធ្នាប់ រងរបួសចំនួន ១៣នាក់។
អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត យល់ឃើញថា បញ្ហានេះគេបានទស្សទាយទុកជាមុនរួចជាស្រេចហើយថា វាពិតជាពិបាកក្នុងការបញ្ចៀសនូវអំពើហិង្សាណាស់ ព្រោះបើពិនិត្យមើលយន្តការ ដោះស្រាយគឺមិនមាន។ លោកបន្ថែមថា ក្រៅពីកង្វះមធ្យោបាយដោះស្រាយ ដោយសន្តិវិធីហើយ កម្លាំងសមត្ថកិច្ចក៏ត្រូវបានដាក់ពង្រាយនៅតំបន់មានជម្លោះថែមទៀត។
បើតាម លោក វណ្ណ សុផាត បញ្ហានេះចង់មិនចង់ គឺប្រាកដជាផ្ទុះឡើង ទាំងរូបភាពហិង្សា និងវិវាទផ្លូវច្បាប់។ អ្នកជំនាញផ្នែកសិទ្ធិមនុស្សរូបនេះ បន្ថែមថា ភាគីក្រុមហ៊ុន និងរដ្ឋាភិបាល គួររកច្រកចេញដោយសមរម្យលើផ្នែកណាមួយ ជាមួយពលរដ្ឋ ជាជាងប្រើវិធានការច្បាប់បែបនេះ។
លោកបន្តថា៖ «បញ្ហាហ្នឹងបើគិតពីដំណោះស្រាយដីធ្លី ប្រសិនបើអាជ្ញាធរ និងក្រុមហ៊ុនដោះស្រាយតាមច្បាប់ដែលមានស្រាបដូចជាច្បាប់ អាសាមិករ ច្បាប់ភូមិបាល និងច្បាប់រដ្ឋធម្មនុញ្ញរបស់យើងគឺត្រូវតែមានសំណង និងយុត្តិធម៌ជាងមុន » ។
ក្រុមអ្នកតវ៉ាធ្លាប់លើកឡើងអំឡុងពេលតវ៉ាក្នុងពេលកន្លងទៅថា ការផ្តល់សំណងត្រឹម ៨ដុល្លារ ក្នុងមួយម៉ែត្រការ៉េនេះ គឺមិនអាចទទួលយកបានទេ ខណៈដីនៅក្បែរនោះ មានតម្លៃរហូតដល់ ២០ ទៅ ៣០ ដុល្លារ ក្នុងមួយម៉ែត្រ។ ពលរដ្ឋទាំងនោះ បន្តថា ការផ្តល់សំណងត្រឹម ៨ដុល្លារនេះ ក៏មិនអាចទៅដោះដូរ ឬទិញលក់ នៅកន្លែងផ្សេងបានដែរ។ កាលពីថ្ងៃទី៦ ខែកក្កដា ឆ្នាំ២០២១ ពលរដ្ឋបានចេញលិខិតចំហរមួយច្បាប់ ដោយបញ្ជាក់ថា គម្រោងអភិវឌ្ឍន៍ព្រលានយន្តហោះ អន្តរជាតិភ្នំពេញថ្មី អូស៊ីអាយស៊ី (OCIC) របស់លោកឧកញ៉ា ពុង ឃាវសែ នេះ បានធ្វើឱ្យប៉ះពាល់ប្រជាពលរដ្ឋ ៣៣០គ្រួសារ មកពីឃុំចំនួន៤ រួមមាន ឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្តាលស្ទឹង ខេត្តកណ្តាល និងឃុំពត់សរ នៅស្រុកបាទី ខេត្តតាកែវ ដែលមានក្បាលដីទំហំជាង ១លានម៉ែត្រការ៉េ៕