ពលរដ្ឋប្រមាណ ៣០ គ្រួសារដែលរងផលប៉ះពាល់ពីគម្រោងអភិវឌ្ឍផ្លូវដែកនៅសង្កាត់បឹងកក់២ និងសង្កាត់ទឹកល្អក់១ ខណ្ឌទួលគោក ស្នើអាជ្ញាធររាជធានីភ្នំពេញពន្លឿនការដោះស្រាយដោយបារម្ភខ្លាចអាជ្ញាធរចុះរុះរើផ្ទះ ដោយមិនមានដំណោះស្រាយ។
ប្រជាពលរដ្ឋដែលរងផលប៉ះពាល់ពីគម្រោងអភិវឌ្ឍផ្លូវដែក គ្រោងនឹងនាំគ្នាយកញត្តិដាក់ទៅកាន់សាលារាជធានីភ្នំពេញនៅថ្ងៃទី១៣ ខែកញ្ញា ២០២១ ដោយឱ្យអាជ្ញាធរពន្លឿនការដោះស្រាយបញ្ហាផ្ទះសំបែងរបស់ពួកគាត់ ដែលនឹងត្រូវរុះរើដោយអាជ្ញាធរខណ្ឌទួលគោក ដើម្បីបើកផ្លូវស្ថាបនាផ្លូវបេតុង និងអាងស្តុបទឹកក្នុងខណ្ឌទួលគោកនាពេលខាងមុខ។
ពលរដ្ឋរស់នៅភូមិ១៧ សង្កាត់បឹងកក់២ លោក កូវ សារុន ប្រាប់វីអូឌីនៅថ្ងៃសៅរ៍នេះថា សាលារាជធានីភ្នំពេញនៅមិនទាន់បានដោះស្រាយឱ្យពួកគាត់ដែលរងផលប៉ះពាល់ពីគម្រោងអភិវឌ្ឍផ្លូវដែកនេះនៅឡើយទេ ខណៈពលរដ្ឋប៉ះពាល់ទាំងស្រុងដោយការអភិវឌ្ឍនេះ បានបដិសេធទទួលយកដីនៅតំបន់អភិវឌ្ឍន៍របស់ក្រុមហ៊ុន 7NG ដែលស្ថិតនៅខេត្តកណ្តាល និងនៅគោកខ្សាច់ ដោយពួកគាត់ស្នើសុំដីនៅវត្តទួលអស់លោក ឬដីក្នុងខណ្ឌទួលគោកវិញ។
លោកថា៖ «ដីតម្លៃ១០០០ ទៅ២០០០ ដុល្លារមិនស្មើដីយើងតម្លៃ១ការ៉េ ៤ ទៅ ៥ ពាន់ដុល្លារ បើយើងគិតរាប់ម៉ឺនដុល្លារ តែយើងគិតថា រដ្ឋមិនមានលុយ ប៉ុន្តែរដ្ឋមានសិទ្ធិក្នុងការចាត់ចែងដីក្នុងក្រុងភ្នំពេញកន្លែងណាក៏រដ្ឋអាចធ្វើបានដែរ។ បឹងជាច្រើនត្រូវបានលុបឱ្យឯកជនចុះហេតុអីដីដែលឱ្យប្រជាពលរដ្ឋរៀបចំចំណាត់ការជូនប្រជាពលរដ្ឋ ព្រោះមិនមែនអភិវឌ្ឍន៍ហើយយកពួកខ្ញុំទៅបោះបង់ចោលទេ។ មិនមែនជាជម្រើសដើម្បីទាំងអស់គ្នាទេ អភិវឌ្ឍន៍ដើម្បីរដ្ឋ មិនមែនអភិវឌ្ឍន៍ដើម្បីឯកជនទេ បើអភិវឌ្ឍន៍ដើម្បីទាំងអស់គ្នា គួរស្វែងរកជម្រើសណាដែលពួកខ្ញុំទទួលយកបានផង»។
លោកបន្តថា មូលហេតុដែលពួកគាត់ចំនួន ២៥ គ្រួសារ ដែលរងផលប៉ះពាល់មិនទទួលយកនោះ ដោយសារដីនៅទីនោះឆ្ងាយហើយមិនមានហេដ្ឋានរចនាសម្ព័នអ្វីនោះទេ។ លោកស្នើអាជ្ញាធររាជធានីភ្នំពេញពន្លឿនការដោះស្រាយដោយបារម្ភខ្លាចអាជ្ញាធរចុះរុះរើ ខណៈអាជ្ញាធរបានសន្យានឹងធ្វើការដោះស្រាយឱ្យពួកគាត់ចាប់តាំងពីឆ្នាំ២០២០ ប៉ុន្តែរហូតដល់បច្ចុប្បន្នមិនមានដំណោះស្រាយសមស្របជូនពួកគេឡើយ។
លោកថា៖ «ជួយសម្របសម្រួលយ៉ាងណារវាងអភិបាលខណ្ឌទាំងពីរ គឺអភិបាលខណ្ឌទួលគោក និងខណ្ឌឫស្សីកែវ ឱ្យជជែកគ្នាក្នុងនោះការដោះស្រាយ សម្រាប់បងប្អូនដែលរងប៉ះពាល់ទាំងស្រុង និងមួយផ្នែកឱ្យបានសមស្រប ឱ្យបានរីករាយទាំងអស់គ្នា កុំយកជម្រើសបង្ខំពួកខ្ញុំបន្តទៀត។ ពួកខ្ញុំសូមបញ្ជាក់ថា ការផ្ដល់ជម្រើសបង្ខំនេះ ពួកខ្ញុំមិនទទួលយកដាច់ខាត ទោះបីក្នុងរូបបែបណាក៏ដោយ ទោះគំរាមចាប់ ទោះបីចង គឺពួកខ្ញុំចង់បានដីនៅក្នុងក្រុង បើមិនបានដីនៅខណ្ឌឫស្សីកែវទេ ក៏បាននៅខណ្ឌទួកគោកដែរ។ នេះជាអ្វីដែលពួកខ្ញុំទទូចស្នើសុំម្ដងហើយម្ដងទៀតតាំងពីឆ្នាំ២០២០ ដល់២០២១ ជិតដាច់ហើយ»។
អ្នកស្រី ឈូក រតនា នៅសង្កាត់ទឹកល្អក់មួយលើកឡើងថា រាល់ថ្ងៃពួកគាត់បារម្ភខ្លាចអាជ្ញាធររុះរើផ្ទះ ដោយមិនបានផ្ដល់សំណងដូចករណីដែលធ្លាប់កើតឡើងនាពេលកន្លងមក។ អ្នកស្រីស្នើឱ្យអាជ្ញាធរពន្លឿនការដោះស្រាយដោយផ្ដល់ដីនៅរាជធានីភ្នំពេញ ប៉ុន្តែបើសិនជាអាជ្ញាធរឱ្យពួកគាត់ទៅយកដីនៅ 7NG ខេត្តកណ្តាល និងនៅគោកខ្សាច់ ក្នុងខណ្ឌកំបូល ជំនួសការបាត់បង់ផ្ទះសំបែង ពួកគាត់នឹងមិនទទួលឡើយ។
អ្នកស្រី៖ «ខ្ញុំបារម្ភខ្លាចគាត់ដេញខ្ញុំអត់មានសំណងឱ្យខ្ញុំ ហើយគាត់ឱ្យខ្ញុំទៅនៅគោកខ្សាច់ ខ្ញុំមិនទៅនៅទេ ព្រោះនៅនោះអត់មានទឹក ពលរដ្ឋនៅនោះទិញទឹកគេ ហើយពីទៅបីថ្ងៃបានទឹកមកដល់។ ខ្ញុំដាក់សំណើសុំដីរដ្ឋាភិបាលទី១ នៅខណ្ឌទួលគោក និងទី២នៅវត្តទួលអស់លោក»។
វីអូឌីមិនអាចសុំការអត្ថាធិប្បាយពីអ្នកនាំពាក្យសាលារាជធានីភ្នំពេញលោក ម៉េត មាសភក្ដី បានទេដោយទូរសព្ទចូលគ្មានអ្នកទទួល។
អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត ជំរុញឱ្យអាជ្ញាធរពន្លឿនការដោះស្រាយ និងផ្ដល់ទីតាំងនៅក្នុងរាជធានីភ្នំពេញជូនប្រជាពលរដ្ឋឱ្យបានសមរម្យ ដើម្បីកុំឱ្យពួកគាត់ទៅរស់នៅកន្លែងដាច់ស្រយាលដែលគ្មានហេដ្ឋារចនាសម្ព័ន្ធធ្វើឱ្យពួកគាត់ជួបបញ្ហាជីវភាពកាន់តែខ្លាំង។
លោកថា៖ «អ៊ីចឹងអំឡុងពេលហ្នឹងរដ្ឋាភិបាលគួររកដំណោះស្រាយសមស្របណាមួយ ដែលគាត់អាចទទួលយកបាននៅតំបន់ក្បែកន្លែងគាត់រស់នៅហ្នឹង»។ ពលរដ្ឋរស់នៅភូមិ១៧ សង្កាត់បឹងកក់២ លោក កូវ សារុន អះអាងថា ពលរដ្ឋដែលរងផលប៉ះពាល់ពីគម្រោងផ្លូវដែកទាំងស្រុងមានចំនួន២៥ គ្រួសារ និងចំនួន ៥ គ្រួសារទៀត ប៉ះពាល់មួយចំនួន។ លោកបន្តថា ពួកគាត់នឹងមិនទៅរស់នៅខេត្ត និងតំបន់ក្រៅពីរាជធានីភ្នំពេញទេ ព្រោះពួកគេបានរស់នៅលើទីតាំងដីបច្ចុប្បន្ននេះអស់រយៈពេល ៣០ ឆ្នាំមកហើយ ប៉ុន្តែបើសិនជាអាជ្ញាធរមិនព្រមដោះស្រាយទេ ពួកគាត់នឹងនាំគ្នាតវ៉ា៕
