អ្នកនាំពាក្យស្នងការដ្ឋាននគរបាលរាជធានីភ្នំពេញ ច្រានចោលការចោទប្រកាន់របស់បងប្អូនភ្លោះពីរនាក់ដែលជាសកម្មជនបរិស្ថាន ដែលថា សមត្ថកិច្ចបានគំរាមចាប់ខ្លួនពួកគេកាលពីម្សិលមិញនោះ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានប្រាប់ វីអូឌី នៅថ្ងៃទី៨ ខែកញ្ញា ឆ្នាំ២០២១ នេះថា កាលពីព្រឹកថ្ងៃអង្គារ ទី០៧ ខែកញ្ញា ឆ្នាំ២០២១ កម្លាំងការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ បានសហការជាមួយអាជ្ញាធរមូលដ្ឋានសង្កាត់បឹងទំពន់១ បានចុះធ្វើរដ្ឋបាលត្រួតពិនិត្យនៅតាមបន្ទប់ជួល ដោយសារមានជនសង្ស័យលើបទល្មើសឆក់រត់ចូលក្នុងទីតាំងនោះ។
លោកបន្តថា ពេលកំពុងអនុវត្តការងារ ក៏មានយុវជន២នាក់ដែលជាបងប្អូនភ្លោះនោះបានចេញមកថតសកម្មភាពអនុវត្តការងាររបស់សមត្ថកិច្ចដោយពុំមានការអនុញ្ញាត ទើបសមត្ថកិច្ចជំនាញបានធ្វើការណែនាំ អប់រំ និងឱ្យលុបរូបនោះចេញវិញ ដោយមិនមានការឃាត់ខ្លួនឬគំរាមកំហែងដូចការចោទប្រកាន់របស់ពួកគេឡើយ។
លោកមានប្រសាសន៍ថា៖ «សកម្មជនបរិស្ថានពីរនាក់នោះជាការផ្តល់ព័ត៌មានមិនពិត»។
លោកមានប្រសាសន៍បន្ថែមថា៖ «ជាក់ស្តែង សមត្ថកិច្ចចុះស្រាវជ្រាវរកជនសង្ស័យករណីឆក់នៅតំបន់នោះដែលគាត់បានរត់ចូលទៅទីតាំងនោះ [រត់ទៅក្បែរបន្ទប់ជួលរបស់សកម្មជនបរិស្ថាន] ហើយស្របពេលដែលសមត្ថកិច្ចកំពុងអនុវត្តការងារ យុវជនទាំងនោះក៏បានថតសកម្មភាពរបស់សមត្ថកិច្ចដោយគ្មានការអនុញ្ញាត ហើយភ្លាមៗ សមត្ថកិច្ចបានហៅគាត់មកលុបចេញ ហើយក៏គ្មានការឃាត់ ក៏គ្មានការគំរាមកំហែងដែរ»។
កាលពីម្សិលមិញនេះ បងប្អូនភ្លោះពីរនាក់ដែលជាសកម្មជនការពារបរិស្ថាននិងសិទ្ធិមនុស្ស ឈ្មោះ ជុំ ហួត និងឈ្មោះ ជុំ ហួរ បាននិយាយថា មានមនុស្សមួយក្រុមជិត១០នាក់ ស្លៀកពាក់ស៊ីវិល និងម្នាក់ស្លៀកឯកសណ្ឋានជាប៉ូលិស បានចុះទៅគំរាមកំហែងចាប់ខ្លួនពួកគេដល់បន្ទប់ជួល នៅម្តុំសង្កាត់បឹងទំពន់ រាជធានីភ្នំពេញ ដោយមិនដឹងពីមូលហេតុច្បាស់លាស់នោះទេ។
ក្រោយពីសមត្ថកិច្ចគំរាមចាប់ខ្លួន លោក ជុំ ហួត អះអាងថា ពួកគេទាំងពីរនាក់បងប្អូនបានប្តូរកន្លែងស្នាក់នៅទៅទីតាំងផ្សេង ដោយសារបារម្ភពីសុវត្ថិភាព៕
