អាជ្ញាធរបានឃាត់ខ្លួនប្រជាពលរដ្ឋដែលមានជម្លោះដីធ្លីនៅភូមិកំពង់តាឡុង ឃុំបឹងខ្យាង ស្រុកកណ្ដាលស្ទឹង ខេត្តកណ្ដាល ចំនួនពីរនាក់បញ្ជូនទៅកាន់សាលាខេត្តកណ្ដាលនៅព្រឹកមិញនេះ ខណៈប្រជាពលរដ្ឋរាប់សិបនាក់កំពុងតវ៉ា។
លោក ទួន វណ្ណៈ ដែលត្រូវជាស្វាមីនិងជាឪពុករបស់ស្ត្រីនិងកូនប្រុសម្នាក់អាយុជាង១០ឆ្នាំ បានប្រាប់ វីអូឌី ថាភរិយានិងកូនប្រុសរបស់លោកត្រូវបានអាជ្ញាធរចាប់ខ្លួន នៅពេលពួកគេវិលត្រលប់មកពីមើលស្រែចម្ការវិញ។ ប៉ុន្តែអាជ្ញាធរបានចោទប្រកាន់ពួកគេទាំងពីរនាក់ថា បានរារាំងក្រុមហ៊ុនមិនឱ្យឈូសឆាយដីធ្លី និងដកហូតយកទូរសព្ទរបស់ពួកគេទៅជាមួយផង។ លោកបន្តថា បច្ចុប្បន្ន ប្រពន្ធនិងកូនរបស់លោកត្រូវបានគេបញ្ជូនទៅកាន់សាលាខេត្តកណ្ដាល។
លោក ទួន វណ្ណៈ បានឱ្យដឹងថា ផ្ទះរបស់លោកស្ថិតនៅក្នុងតំបន់ដែលអាជ្ញាធរដាក់រនាំងដែកមិនឱ្យចេញចូល ដែលធ្វើឱ្យរូបលោកមិនអាចវិលត្រលប់ទៅផ្ទះអស់រយៈពេល២ថ្ងៃមកហើយ ខណៈម្តាយរបស់លោកដែលមានវ័យជិត៨០ឆ្នាំនៅតែម្នាក់ឯង។
លោក ទួន វណ្ណៈ បន្តថា ខណៈមានការចាប់ខ្លួនប្រពន្ធនិងកូនរបស់លោកទាំងពីរនាក់ខាងលើនេះហើយ ប្រជាពលរដ្ឋនៅភូមិកំពង់តាឡុងរាប់សិបនាក់បានតវ៉ាទាមទារឱ្យមានការដោះលែងមនុស្សមកវិញ។ បន្ថែមលើនេះ ក្រុមប្រជាពលរដ្ឋក៏បាននាំគ្នាបិទផ្លូវពីរកន្លែង គឺបិទនៅចំណុចផ្លូវ៥៤ និងផ្លូវ៨៨ ដើម្បីកុំឱ្យកម្មករសាងសង់ព្រលានយន្តហោះឆ្លងកាត់។
គួរជម្រាបជូនថា ជម្លោះដីធ្លីរវាងប្រជាពលរដ្ឋជាង៣០០គ្រួសារនៅភូមិកំពង់តាឡុង ឃុំបឹងខ្យាង ស្រុកកណ្តាលស្ទឹង ខេត្តកណ្តាល ជាមួយក្រុមហ៊ុន OCIC ជាក្រុមហ៊ុនសាងសង់ព្រលានយន្តហោះអន្តរជាតិភ្នំពេញថ្មី នៅស្រុកកណ្តាលស្ទឹង ខេត្តកណ្តាលនេះ បានអូសបន្លាយអស់រយៈពេល៣ឆ្នាំមកហើយ ដោយភាគីក្រុមហ៊ុនមិនព្រមទិញដីស្រែនិងដីចម្ការរបស់ប្រជាពលរដ្ឋតាមតម្លៃទីផ្សារនោះទេ ដោយទាមទារឱ្យប្រជាពលរដ្ឋលក់ក្នុងតម្លៃ៨ដុល្លារក្នុង១ម៉ែត្រការ៉េ តែប្រជាពលរដ្ឋមិនព្រម។
កាលពីថ្ងៃម្សិលមិញ មានការប្រឈមមុខដាក់គ្នាខ្លាំងជាលើកទី១ រវាងប្រជាពលរដ្ឋនិងកងកម្លាំងមានសមត្ថកិច្ច បន្ទាប់ពីប្រជាពលរដ្ឋបានព្រមានបិទផ្លូវជាតិលេខ២ ដើម្បីទាមទារឱ្យមានដំណោះស្រាយ។ ក៏ប៉ុន្តែការតវ៉ាទាមទាររបស់ពួកគេនៅតែមិនមានដំណោះស្រាយដដែល៕