អាជ្ញាធរខេត្តកណ្តាល និងប្រជាពលរដ្ឋភូមិតាឡុង បានប្រឈមមុខដាក់គ្នានៅព្រឹកថ្ងៃទី៧ ខែកញ្ញានេះ ខណៈប្រជាពលរដ្ឋប្រមាណជាង៥០នាក់បានព្យាយាមបិទកំណាត់ផ្លូវជាតិលេខ២ ដើម្បីទាមទារឱ្យអាជ្ញាធរដោះស្រាយបញ្ហាជម្លោះដីធ្លីរបស់ពួកគេជាមួយក្រុមហ៊ុនសាងសង់ព្រលានយន្តហោះអន្តរជាតិភ្នំពេញថ្មី។
តំណាងប្រជាពលរដ្ឋម្នាក់ដែលស្ថិតនៅក្នុងហេតុការណ៍នេះ បានប្រាប់ វីអូឌី តាមទូរសព្ទថា ប្រជាពលរដ្ឋមានគម្រោងបិទកំណាត់ផ្លូវជាតិលេខ២ ដើម្បីទាមទារឱ្យមានដំណោះស្រាយរឿងដីធ្លី ប៉ុន្តែគម្រោងនោះបានបរាជ័យ ដោយសារអាជ្ញាធរដែលមានចំនួនច្រើនជាងពលរដ្ឋនោះ បានរារាំងនិងរុញច្រានពួកគេមិនឱ្យធ្វើអ្វីបានឡើយ។ តំណាងប្រជាពលរដ្ឋរូបនេះ ថ្លែងថា ពេលនេះ ពលរដ្ឋមិនដឹងត្រូវធ្វើអ្វីទៀតនោះទេ ក្រៅពីការយំស្រែកទាមទាររកដំណោះស្រាយ។
នៅខណៈដែលប្រជាពលរដ្ឋតវ៉ាបិទផ្លូវជាតិលេខ២នេះ អាជ្ញាធររាប់សិបនាក់បានដាក់រនាំងដែកបិទផ្លូវទំនប់៥៤ ខណៈកម្មករសាងសង់ព្រលានយន្តហោះបានយកគ្រឿងចក្រឈូសឆាយដីស្រែរបស់ប្រជាពលរដ្ឋ។ នេះបើតាមការបញ្ជាក់របស់ក្រុមប្រជាពលរដ្ឋនៅតំបន់នោះ។
ប្រជាពលរដ្ឋភូមិតាឡុង ឃុំបឹងខ្យាង ស្រុកកណ្ដាលស្ទឹង ខេត្តកណ្ដាល ជាង៣០០គ្រួសារ កាលពីថ្ងៃអាទិត្យ បានធ្វើសន្និសីទកាសែតដោយបានព្រមានធ្វើការតវ៉ាបិទផ្លូវជាតិលេខ២ នៅថ្ងៃចន្ទ និងថ្ងៃអង្គារនេះ ដើម្បីទាមទារឱ្យអាជ្ញាធរដោះស្រាយបញ្ហាដីធ្លីរបស់ពួកគាត់។ ការព្រមាននេះបានធ្វើឡើង បន្ទាប់ពីមានលិខិតរបស់រដ្ឋបាលខេត្តកណ្ដាលដែលបានប្រកាសថា នឹងបិទទំនប់ទឹក ហើយកាយផ្ដាច់ផ្លូវពលរដ្ឋធ្លាប់ឆ្លងកាត់ទៅកាន់ស្រែរបស់ពួកគេកន្លងមក៕
