បងប្អូនភ្លោះពីរនាក់ដែលសកម្មការពារធនធានធម្មជាតិនិងសិទ្ធិមនុស្ស បានឱ្យដឹងថា មានមនុស្សមួយក្រុមជិត១០នាក់ ស្លៀកពាក់ស៊ីវិល និងម្នាក់ស្លៀកឯកសណ្ឋានជាប៉ូលិស បានចុះទៅគំរាមកំហែងចាប់ខ្លួនពួកគេដល់បន្ទប់ជួល ម្តុំបឹងទំពន់ រាជធានីភ្នំពេញ ដើម្បីបញ្ជូនទៅអគ្គស្នងការដ្ឋាននគរបាលជាតិ។
លោក ជុំ ហួត ដែលអះអាងថា បច្ចុប្បន្ន មន្ត្រីជាន់ខ្ពស់នៅគណបក្សខ្មែរស្រឡាញ់ជាតិ និងជាសកម្មជនការពារបរិស្ថាននិងសិទ្ធិមនុស្ស បាននិយាយថា នៅព្រឹកថ្ងៃអង្គារនេះ មានក្រុមជនស៊ីវិលជិត១០នាក់បានជិះម៉ូតូ៣ទៅ៤គ្រឿង មកដល់មុខបន្ទប់ជួលពួកគាត់ ស្ថិតនៅភូមិសន្សំកុសល សង្កាត់បឹងទំពន់ ខណ្ឌមានជ័យ រាជធានីភ្នំពេញ។
លោកបន្តថា នៅពេលទៅដល់បន្ទប់ជួលរបស់លោក មានបុរសម្នាក់ស្លៀកពាក់ឯកសណ្ឋានជាប៉ូលិសនិងស៊ីវិលប្រហែលជា៣នាក់ទៀត ឆក់យកទូរសព្ទពីពួកគាត់ ឆែកទូរសព្ទ ថតរូប និងគំរាមថាចាប់យកទៅស្នងការថែមទៀតផង ខណៈជនស៊ីវិល៣ទៅ៤នាក់ទៀតឈរចាំនៅផ្លូវច្រកចូលផ្ទះជួលពួកគាត់ផងដែរ។
លោកនិយាយដូច្នេះថា៖ «មានមនុស្សមួយក្រុម ក្នុងនោះមានឯកសណ្ឋាននគរបាលម្នាក់ ហើយស្លៀកពាក់ស៊ីវិល៥ទៅ៦នាក់ សម្រុកចូលបន្ទប់ជួលខ្ញុំ។ ហើយបន្ទាប់មកក៏បានដកទូរសព្ទពួកខ្ញុំ ហើយមានក្រុមបច្ចេកទេសផ្សេងគេឆែកទូរសព្ទ ហើយប៉ូលិសគាត់កត់កំណត់ហេតុ គាត់ថតបន្ទប់ជួលពួកខ្ញុំ។ ហើយម្នាក់ទៀតបានគំរាមកំហែងចាប់ពួកខ្ញុំដាក់ឡាន ហើយគំរាមចាប់ដាក់ទៅអគ្គស្នងការនគរបាល»។
លោក ជុំ ហួត សង្ស័យថា ដើមចមដែលនាំឱ្យអាជ្ញាធរនិងក្រុមស្លៀកស៊ីវិលចុះគំរាមកំហែងរូបលោក ទំនងជាពួកគាត់ចូលធ្វើនយោបាយជាមួយគណបក្សខ្មែរស្រឡាញ់ជាតិទៅវិញ។
លោកនិយាយថា៖ «បច្ចុប្បន្ននេះ ខ្ញុំបានចូលរួមជីវភាពនយោបាយជាមួយគណបក្សខ្មែរស្រឡាញ់ជាតិដែលកំពុងមានសន្ទុះខ្លាំងក្លា។ ហើយបច្ចុប្បន្ន ខ្ញុំជាមន្ត្រីជាន់ខ្ពស់។ ហើយការគំរាមកំហែងនេះមិនមែនមានតែចំពោះរូបខ្ញុំទេ គឺសកម្មជនគណបក្សខ្មែរស្រលាញ់ជាតិទាំងអស់ មានទាំងការលើកផ្លាក នៅពេលរាល់ប្រជុំ អាជ្ញាធរតែងតែមកថតរូប ហើយគំរាមកំហែងដល់ការចូលរួមប្រជុំ។ ហើយជាក់ស្តែង នៅពេលលើកផ្លាក អាជ្ញាធរមកសួរនាំ ហើយពេលខ្លះមិនឱ្យយើងលើកផ្លាកទៀត»។
បន្ថែមពីនេះ លោក ជុំ ហួត ស្នើទៅរដ្ឋាភិបាលនិងអាជ្ញាធរពាក់ព័ន្ធឈប់ប្រើរូបភាពគំរាមកំហែងមនុស្សស្លូតត្រង់ដែលតែងតែយកចិត្តទុកដាក់ឈឺឆ្អាលភាពអយុត្តិធម៌សង្គមនិងបរិស្ថាន ពីព្រោះទង្វើនេះមិនធ្វើឱ្យរដ្ឋាភិបាលចំណេញនោះទេ អាចធ្វើឱ្យជាតិបែកបាក់ ជាដើម។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន និងអ្នកនាំពាក្យក្រសួងមហាផ្ទៃ លោក ផាត សុផានិត សុំមិនធ្វើការបកស្រាយ ដោយសារពួកគាត់មិនបានដឹងព័ត៌មាននេះទេ។
ប្រធានសមាគមការពារសិទ្ធិមនុស្សអាដហុក លោក នី សុខា ពន្យល់ថា តាមច្បាប់ មុននឹងសមត្ថកិច្ចចុះឆែកឆេរដល់លំនៅឋាន ឬយកសម្ភារ ដូចជា ទូរសព្ទរបស់បុគ្គលណាម្នាក់ ត្រូវមានដីកាសម្រេចពីតុលាការ បើពុំដូច្នោះទេ អ្នកទាំងនោះធ្វើដោយរំលោភច្បាប់រដ្ឋធម្មនុញ្ញ និងជាសារគំរាមកំហែងអ្នកការពារសិទ្ធិមនុស្ស បរិស្ថាន និងសង្គមផងដែរ។
លោកមានប្រសាសន៍ថា៖ «បើសិនជាអាជ្ញាធរមិនបានធ្វើតាមនីតិវិធីច្បាប់ត្រឹមត្រូវ បើទោះជាបុគ្គលនោះជាអ្នកការពារសិទ្ធិមនុស្សក្តី ជាសកម្មជននយោបាយក្តី ជាប្រជាពលរដ្ឋសាមញ្ញក្តី វាជាសិទ្ធិសេរីភាពស្របច្បាប់របស់គេ។ ដូច្នេះយើងមិនអាចធ្វើការបំពានទៅលើបុគ្គលគ្រប់រូបណាក៏ដោយដែលគេអត់បានប្រព្រឹត្តអីដែលខុស ហើយយើងទៅធ្វើទាំងបំពានច្បាប់ ជាអំពើគំរាមកំហែងនិងបំភិតបំភ័យទៅដល់អ្នកធ្វើកិច្ចការងារសង្គមទាំងអស់ហ្នឹងហើយ»។
លោកបន្ថែមទៀតថា៖ «មិនមែនអាងតែសមត្ថកិច្ចអាចធ្វើអ្វីៗបានតាមអំពើចិត្តទេ នៅក្នុងប្រទេសនីតិរដ្ឋ គឺសមត្ថកិច្ចត្រូវតែអនុវត្តតាមអ្វីដែលជានីតិវិធីដែលមានចែងក្នុងច្បាប់។ យើងដឹងហើយថា ក្នុងគោលការណ៍ច្បាប់រដ្ឋធម្មនុញ្ញ បានចែងអំពីសេរីភាពរបស់ប្រជាពលរដ្ឋ ហើយក៏បានចែងពីសេចក្តីថ្លៃថ្នូរ ត្រូវគោរពនូវកិត្តិយស នូវតម្លៃរបស់មនុស្ស កាលណាអំពើធ្វើឱ្យប៉ះពាល់នូវតម្លៃថ្លៃថ្នូរ និងសន្តិសុខផ្ទាល់ខ្លួន ជាការរំលោភលើរដ្ឋធម្មនុញ្ញ»។
យ៉ាងណា កាលពីថ្ងៃទី១៦ ខែវិច្ឆិកា ឆ្នាំ២០២០ ក្រុមអ្នកជំនាញសិទ្ធិមនុស្សរបស់អង្គការសហប្រជាជាតិ ក៏បានបង្ហាញកង្វល់តាមរយៈសេចក្តីថ្លែងការណ៍របស់ខ្លួន អំពីការរឹតបន្តឹងសិទ្ធិបញ្ចេញមតិ ការគំរាមកំហែងដល់អ្នកឃ្លាំមើលសិទ្ធិមនុស្សនៅកម្ពុជាផងដែរ។ សេចក្តីថ្លែងការណ៍នោះបន្តថា សេរីភាពបញ្ចេញមតិកាន់តែអាក្រក់នេះ ក្រោយពីមានការចាប់ព្រះកាយព្រះសង្ឃ និងចាប់ខ្លួនក្រុមយុវជនមាតាធម្មជាតិ អ្នកចម្រៀងរ៉េបវ័យក្មេងនៅខេត្តសៀមរាប រួមទាំងការចាប់ខ្លួនលោក រ៉ុង ឈុន និងសកម្មជនបរិស្ថាន ព្រមទាំងអតីតសកម្មជនគណបក្សប្រឆាំងជាបន្តបន្ទាប់។ ប៉ុន្តែសេចក្ដីរាយការណ៍នេះត្រូវបានគណៈកម្មាធិការសិទ្ធិមនុស្សកម្ពុជារបស់រដ្ឋាភិបាលច្រានចោលទៅវិញ៕
