ប្រជាពលរដ្ឋជិត២០០គ្រួសារ នៅឃុំជីខលើ ស្រុកស្រែអំបិល ខេត្តកោះកុង បានដាក់ពាក្យប្តឹងទៅក្រសួងមហាផ្ទៃចាត់វិធានការច្បាប់លើមន្ត្រីផ្កាយពីរមួយរូប ដែលពលរដ្ឋអះអាងថា បានទន្ទ្រានយកដីរបស់ពួកគាត់ជាង៤០០ហិកតា ដើម្បីយកមកធ្វើជាកម្មសិទ្ធិផ្ទាល់ខ្លួន។
ក្នុងពាក្យបណ្តឹងរបស់ប្រជាពលរដ្ឋចំនួន១៩៧គ្រួសារដែលដាក់ទៅក្រសួងមហាផ្ទៃ នៅថ្ងៃទី៦ ខែកញ្ញានេះ បានឱ្យដឹងថា កាលពីអំឡុងឆ្នាំ២០០៧ ក្រុមហ៊ុន ហេង ហ៊ុយ អេគ្រីខលឈ័រគ្រុប របស់មន្ត្រីនគរបាលផ្កាយពីរ ឈ្មោះ ហេង ហ៊ុយ បានទន្ទ្រានយកដី និងឈូសឆាយដំណាំ ព្រមទាំងបង្ខំឱ្យពលរដ្ឋផ្តិតមេដៃទទួលលុយចម្លោះពី១០ម៉ឺនរៀល ទៅ២០ម៉ឺនរៀល ជាថ្នូរបោះបង់ដីស្រែរបស់ខ្លួន ប៉ុន្តែរហូតមកដល់ពេលនេះ មិនទាន់មានអាជ្ញាធរពាក់ព័ន្ធជួយរកដំណោះស្រាយជូនប្រជាពលរដ្ឋនៅឡើយ ។
ករណីនេះ ប្រជាពលរដ្ឋ១៩៧គ្រួសារបានដាក់ពាក្យប្តឹងទៅក្រសួងមហាផ្ទៃ ដើម្បីជួយអន្តរាគមន៍ដោះស្រាយនិងចាត់វិធានការច្បាប់លើឧត្តមសេនីយ៍ទោផ្កាយពីរ ឈ្មោះ ហេង ហ៊ុយ តាមច្បាប់ និងទាមទារដីទំហំ៤២១ហិកតាមកឱ្យពលរដ្ឋវិញ រួមទាំងសំណងជំងឺចិត្តចំនួន៧ ០០០ដុល្លារក្នុងមួយគ្រួសារផងដែរ។
លោក ហេង ជ័យ ដែលអះអាងជាអ្នករងគ្រោះដោយសារក្រុមហ៊ុន ហេង ហ៊ុយ ទន្ទ្រានយកដីធ្លីពួកគាត់ បាននិយាយថា ដើមចមដែលនាំឱ្យពួកគាត់ដាក់ពាក្យបណ្តឹងទៅក្រសួងមហាផ្ទៃឱ្យជួយអន្តរាគមន៍ដោះស្រាយបញ្ហាដីធ្លីឱ្យពួកគាត់នេះ ដោយសារតែរឿងនេះមិនឃើញមានអាជ្ញាធរពាក់ព័ន្ធជួយរកដំណោះស្រាយជាច្រើនឆ្នាំមកហើយ។
លោកបន្តថា បើសិនជារដ្ឋមន្ត្រីក្រសួងមហាផ្ទៃ លោក ស ខេង មិនរកដំណោះស្រាយជូនពលរដ្ឋដែលរងគ្រោះជិត២០០គ្រួសារនេះទេ នឹងធ្វើឱ្យពួកគេជួបបញ្ហាប្រឈមច្រើនក្នុងជីវភាពគ្រួសារ ខណៈជំងឺកូវីដ-១៩កាន់តែរីករាលដាល។
លោកនិយាយថា៖ «បច្ចុប្បន្ននេះ កំពុងជួបបញ្ហាប្រឈមខ្លាំង ជាពិសេសបញ្ហាកូវីដ! កាលពីមុនមក យើងអត់មានកូវីដ-១៩ អត់មានដី ចេះទៅចំណាកស្រុករកការងារធ្វើបានប្រាក់ខ្លះ! ដល់ពេលកូវីដ វាកាន់តែពិបាកជាងមុន ដោយសារយើងនៅផ្ទះ អត់មានដីធ្វើស្រែ សម្រាប់ដាំដំណាំ»។
អ្នកស្រី ដេត ហួ ដែលអះអាងថាជាអ្នករងគ្រោះដីធ្លីជាមួយក្រុមហ៊ុន ហេង ហ៊ុយ មួយរូបទៀត និយាយថា នៅពេលដាក់ពាក្យបណ្តឹងទៅក្រសួងមហាផ្ទៃ មន្ត្រីនៅក្រសួងសន្យាថានឹងយកសំណុំរឿងនេះជម្រាបទៅថ្នាក់លើ ដើម្បីជួយរកដំណោះស្រាយជូនពលរដ្ឋ។ ប៉ុន្តែអ្នកស្រីថា មន្ត្រីនោះមិនបានបញ្ជាក់ពីពេលវេលាដែលត្រូវចុះដោះស្រាយនោះទេ។
អ្នកស្រីព្រមានដូច្នេះថា ៖ «បើសិនជាអត់មានដំណោះស្រាយ យើងនឹងដាក់ពាក្យប្តឹងទៅក្រុមប្រឹក្សាអង្គភាពប្រឆាំងអំពើពុករលួយឱ្យត្រួតពិនិត្យមើល ពីព្រោះលោក ហេង ហ៊ុយ ងាររបស់គាត់ជាឯកឧត្តមសេនីយ៍ទោ គាត់ពាក់ផ្កាយពីរ គាត់ពុករលួយ គប់គិតគ្នាយកដីប្រជាពលរដ្ឋធ្វើបណ្ណកម្មសិទ្ធិ»។
វីអូឌី មិនអាចសុំការបំភ្លឺពីអ្នកនាំពាក្យក្រសួងមហាផ្ទៃ លោក ផាត សុផានិត និងលោក ហេង ហ៊ុយ ដែលរងការចោទពីពលរដ្ឋបាននៅឡើយទេ នៅថ្ងៃនេះ។
អ្នកនាំពាក្យរដ្ឋបាលខេត្តកោះកុង លោក សុខ សុទ្ធី មានប្រសាសន៍ថា រឿងទំនាស់ដីធ្លីរវាងពលរដ្ឋជាមួយក្រុមហ៊ុន ហេង ហ៊ុយ នោះ ក្រុមការងារជំនាញខេត្តបានផ្តល់យោបល់ទៅពលរដ្ឋឱ្យដាក់ពាក្យប្តឹងទៅតុលាការ ប៉ុន្តែពួកគេនៅតែដើររកកិច្ចអន្តរាគមន៍ពីស្ថាប័ននេះស្ថាប័ននោះ ធ្វើឱ្យមានចលនាក្នុងសង្គមទៅវិញ។
លោកថា៖ «យើងបានជម្រាបប្រជាជនថា កាលណាគេ [ក្រុមហ៊ុន ហេង ហ៊ុយ ] គេមានបណ្ណកម្មសិទ្ធិ ចង់ប្តឹងផ្តល់ ឱ្យដាក់ទៅតុលាការ។ ការអះអាងរបស់គាត់ជាការអះអាង តែអ្វីដែលជាធាតុពិត គេគ្រប់គ្រងដី គេមានបណ្ណកម្មសិទ្ធិ ហើយទំនាស់ក្នុងបណ្ណកម្មសិទ្ធិ ច្បាប់តម្រូវថា ការប្តឹងផ្តល់ត្រូវទៅដល់តុលាការ។ ខ្ញុំបានណែនាំគាត់តាំងពីយូរហើយ ឱ្យគាត់ដាក់ពាក្យប្តឹងទៅតុលាការ ប៉ុន្តែគាត់អត់ព្រម គាត់ចេះតែដើរទៅរកស្ថាប័ននេះ ទៅរកនោះ! ខ្ញុំមិនដឹងថាឆ្លើយថាម៉េច ជាការបង្កចលាចល»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា ក្រសួងមហាផ្ទៃត្រូវធ្វើការដោះស្រាយបញ្ហានេះជូនប្រជាពលរដ្ឋដែលរងគ្រោះឱ្យមានតម្លាភាព ដើម្បីកុំឱ្យប៉ះពាល់ដល់មុខមាត់រដ្ឋាភិបាល និងក្រសួងសាម៉ីបន្តទៀត។
លោកមានប្រសាសន៍ថា៖ «បញ្ហាដីធ្លីនេះទៀតសោត បើសិនជាកើតចេញពីអ្នកមានអំណាចទន្ទ្រានឬក៏រំលោភបំពានទៅលើសហគមន៍ ទៅលើប្រជាពលរដ្ឋ ក៏វាធ្វើឱ្យប៉ះពាល់ទៅដល់មុខមាត់របស់រដ្ឋាភិបាលផងដែរ។ បញ្ហាទាំងអស់នេះគួរតែមានការស៊ើបអង្កេត ហើយរកវិធានការដោះស្រាយដោយតម្លាភាព»៕
