អាជ្ញាធរខេត្តកណ្តាលបានប្រកាសថា នឹងកាយផ្តាច់ផ្លូវទំនប់៥៤ ស្ថិតនៅភូមិកំពង់តាឡុង ឃុំបឹងខ្យាង ស្រុកកណ្តាលស្ទឹង ខេត្តកណ្តាលដើម្បីរំដោះទឹកលិចលង់ការដ្ឋានសាងសង់ព្រលានយន្តហោះអន្តរជាតិភ្នំពេញថ្មី។
យោងតាមសេចក្តីជូនដំណឹងរបស់រដ្ឋបាលខេត្តកណ្តាលកាលពីថ្ងៃទី៣ ខែកញ្ញា បានលើកមូលហេតុថា ដោយសារមានភ្លៀងធ្លាក់ខ្លាំងជាបន្តបន្ទាប់ ដែលបណ្តាលឱ្យមានទឹកជំនន់ជន់លិច និងហូរចូលបរិវេណគម្រោងសាងសង់អាកាសយានដ្ឋានអន្តរជាតិភ្នំពេញថ្មី តាមប្រឡាយ ៩០ និងទំនប់ ៥៤ នោះ អាជ្ញាធរនឹងកាយផ្តាច់ផ្លូវទំនប់៥៤នេះ ដើម្បីរំដោះទឹក ហើយប្រជាពលរដ្ឋត្រូវបានជូនដំណឹងឱ្យធ្វើដំណើរតាមផ្លូវវាងស្របតាមមាត់ស្ទឹងទន្លេបាទីវិញ។ បន្ថែមលើនេះ អាជ្ញាធរក៏នឹងបិទទ្វារទឹកត្រង់ចំណុចលូមុខ៤ ជាបណ្តោះអាសន្ន ចាប់ពីចន្លោះប្រឡាយ ៩០ ដល់ប្រឡាយ ៩២ ផងដែរ។ បើតាមសេចក្តីជូនដំណឹង ទឹកដែលកំពុងជន់លិចនេះ បានធ្វើឱ្យប៉ះពាល់ដល់គម្រោងសាងសង់ផ្លូវរត់ហោះទី១ (Runway1) របស់ព្រលានយន្តហោះអន្តរជាតិភ្នំពេញថ្មី ដែលជាគម្រោងអាទិភាពត្រូវអនុវត្តឱ្យបានឆាប់តាមផែនការកំណត់។
ការប្រកាសពីការកាយផ្តាច់ផ្លូវទំនប់៥៤នេះ បានធ្វើឡើងខណៈជម្លោះដីធ្លីរវាងប្រជាពលរដ្ឋចំនួន៣ឃុំ ស្ថិតនៅក្នុងខេត្តកណ្ដាល និង១ឃុំក្នុងខេត្តតាកែវ ជាមួយក្រុមហ៊ុនសាងសង់ព្រលានយន្តហោះអន្តរជាតិភ្នំពេញថ្មី ដែលមានភាគហ៊ុនក្រុមហ៊ុន OCIC របស់លោកឧកញ៉ា ពុង ឃាវសែ នោះ អាជ្ញាធរនៅមិនទាន់ដោះស្រាយបញ្ចប់នៅឡើយ ខណៈភាគីខាងក្រុមហ៊ុនបានបន្តឈូសឆាយដីស្រែនិងផ្លូវ ធ្វើឲ្យអ្នកភូមិចេញតវ៉ាជាបន្តបន្ទាប់។
កាលពីយប់ថ្ងៃទី៣១ ខែសីហា កម្មករសាងសង់ព្រលានយន្តហោះអន្តរជាតិភ្នំពេញថ្មី ក៏បានកាយផ្តាច់ផ្លូវទំនប់ ៤៥ នេះម្តងរួចមកហើយ ប៉ុន្តែត្រូវបានប្រជាពលរដ្ឋលុបទៅវិញ ដោយប្រជាពលរដ្ឋបានចោទប្រកាន់ថា ក្រុមហ៊ុនបានលួចកាយផ្តាច់ផ្លូវរបស់ប្រជាពលរដ្ឋ និងដោយមិនបានជូនដំណឹងដល់ប្រជាពលរដ្ឋជាមុននោះឡើយ។
ទាក់ទងនឹងសេចក្តីជូនដំណឹងរបស់រដ្ឋបាលខេត្តកណ្តាលនេះ ក្រុមប្រជាពលរដ្ឋបានប្រកាសថា ពួកគេនឹងធ្វើសន្និសីទកាសែតមួយនៅរសៀលថ្ងៃទី៤ ខែកញ្ញា ឆ្នាំ២០២១នេះ៕
