អង្គការសង្គមស៊ីវិលបានអំពាវនាវដល់រដ្ឋាភិបាលទម្លាក់ចោលបទចោទប្រកាន់លើសកម្មជនបរិស្ថាន៣នាក់ នៅចំខួប១ឆ្នាំនៃការចាប់ខ្លួនពួកគេ នៅថ្ងៃទី៣ ខែកញ្ញានេះ។
អង្គការសង្គមស៊ីវិលទាំងនោះ រួមមាន អង្គការការពារសិទ្ធិមនុស្សលីកាដូ សមាគមធាងត្នោត និងអង្គការបណ្តាញយុវជនកម្ពុជា (CYN) រួមជាមួយសកម្មជនសិទ្ធិផ្សេងទៀត។
ពួកគេបានបង្ហោះសារនិងរូបថតរបស់យុវជនបរិស្ថានទាំង៣នាក់ រួមមាន កញ្ញា ឡុង គន្ធា, កញ្ញា ភួន កែវរស្មី និងលោក ថុន រដ្ឋា ដោយបានអំពាវនាវឱ្យតុលាការដោះលែងនិងទម្លាក់ចោលបទចោទទាំងអស់ប្រឆាំងនឹងពួកគេ ដោយលើកហេតុផលថា អ្វីដែលពួកគេបានធ្វើសុទ្ធតែក្នុងបុព្វហេតុដើម្បីសង្គមជាតិនិងបរិស្ថាន។
អង្គការសង្គមស៊ីវិលទាំងនោះបន្តថា យុវជនទាំង៣រូបជាយុវជនដែលសកម្មនិងមានសេចក្តីក្លាហាននៅក្នុងការចេញមុខការពារបរិស្ថាននិងធនធានធម្មជាតិ ព្រមទាំងហ៊ានបញ្ចេញមតិយោបល់រិះគន់ទៅលើគម្រោងអភិវឌ្ឍន៍ដែលពួកគេយល់ថា ពុំមានផលចំណេញចំពោះជាតិ ឬបង្កផលប៉ះពាល់ធ្ងន់ធ្ងរដល់បរិស្ថាននិងជីវភាពរស់នៅរបស់ប្រជាពលរដ្ឋ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ធ្លាប់បានបញ្ជាក់កាលពីពេលថ្មីៗនេះថា ការធ្វើយុទ្ធនាការទាមទារឱ្យដោះលែងពួកគេពីសំណាក់ក្រុមអង្គការសង្គមស៊ីវិល ជាសិទ្ធិសេរីភាពរបស់ពួកគាត់ ប៉ុន្តែការសម្រេចយ៉ាងណានោះ គឺអាស្រ័យទៅលើភស្តុតាង។
លោកថា៖ «សំណុំរឿង លោកចៅក្រមកំពុងចំណាត់ការតាមនីតិវិធីហើយ។ អ៊ីចឹង ការកាត់ក្ដី គេនឹងពិនិត្យមើលទៅតាមភស្តុតាងដែរ»។
គិតត្រឹមថ្ងៃទី០៣ ខែកញ្ញា ឆ្នាំ២០២១នេះ មានរយៈពេល៣៦៥ថ្ងៃគត់ដែលសកម្មជនបរិស្ថានទាំង៣រូបត្រូវបានអាជ្ញាធរកម្ពុជាចាប់និងឃុំខ្លួនពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
កាលពីថ្ងៃ៥ ខែឧសភា ឆ្នាំ២០២១ សាលាដំបូងរាជធានីភ្នំពេញ បានសម្រេចផ្ដន្ទាទោសលោក ថុន រដ្ឋា ដាក់ពន្ធនាគារចំនួន២០ខែ និងពិន័យជាប្រាក់៤លានរៀល ឬប្រហែល១ ០០០ដុល្លារ ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ ចំណែកកញ្ញា ភួន កែវរស្មី និងកញ្ញា ឡុង គន្ធា ដែលមានវត្តមាននៅក្នុងសវនាការ ព្រមទាំងកញ្ញា ជា គន្ធីន ដែលអវត្តមានក្នុងសវនាការនោះ ត្រូវបានតុលាការផ្តន្ទាទោសដាក់ពន្ធនាគាររយៈពេល១៨ខែ និងពិន័យប្រាក់ជា៤លានរៀលដូចគ្នា។
បន្ថែមលើនេះ តុលាការក៏បានចេញដីកាតាមចាប់ខ្លួនស្ថាបនិកចលនាមាតាធម្មជាតិ លោក អាឡិចហាន់ដ្រូ ហ្គន់សាឡេស ដេវីដសុន (Alejandro Gonzalez-Davidson) និងកញ្ញា ជា គន្ធីន ព្រមទាំងបានបញ្ជាឱ្យរឹបអូសសម្ភាររបស់ពួកគេថែមទៀតផង៕
