មន្ត្រីសិទ្ធិមនុស្សអង្គការលីកាដូ អំពាវនាវដល់រដ្ឋាភិបាលពន្លឿននីតិវិធីដោះលែងអ្នកទោសដោយមានលក្ខខណ្ឌឱ្យបានឆាប់ ខណៈជំងឺកូវីដ-១៩បំប្លែងថ្មីប្រភេទ ដែលតា បានឆ្លងចូលដល់ពន្ធនាគារខេត្តបន្ទាយមានជ័យ។
លោក អំ សំអាត នាយករងទទួលបន្ទុកផ្នែកឃ្លាំមើលសិទ្ធិមនុស្សលីកាដូ បានលើកឡើងនៅថ្ងៃអង្គារនេះថា នីតិវិធីនៃការសម្រេចដោះលែងអ្នកទោសដោយមានលក្ខខណ្ឌ ដើម្បីកាត់បន្ថយភាពចង្អៀតណែននៅក្នុងពន្ធនាគារនោះ ហាក់ធ្វើឡើងដោយយឺតយ៉ាវ ខណៈជំងឺកូវីដ-១៩បានឆ្លងចូលដល់ក្នុងពន្ធនាគារប្រមាណ១០នៅទូទាំងប្រទេស។
លោកបន្តថា៖ «អ៊ីចឹងបញ្ហាក្រោយនេះ យើងបារម្ភកាន់តែខ្លាំង ព្រោះបញ្ហា ដែលតា [កូវីដ]។ យើងដឹងហើយ នៅខាងក្រៅក្រសួងសុខាភិបាល ក៏ដូចជាអាជ្ញាធរកំពុងប្រឹងទប់ស្កាត់យ៉ាងខ្លាំងទាក់ទងនឹង “ដែលតា” អ៊ីចឹងប្រសិនបើឆ្លងចូលក្នុងពន្ធនាគារ នឹងពិបាកក្នុងការទប់ស្កាត់។ អ៊ីចឹងអាការរីករាលដាលហ្នឹង គឺវាអាចនឹងលឿន ហើយហានិភ័យនឹងអាចមានខ្ពស់ទៅទៀត»។
អគ្គនាយករង និងជាអ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា បានប្រាប់ វីអូឌី ថាអ្នកទោសនៅក្នុងពន្ធនាគារខេត្តបន្ទាយមានជ័យប្រមាណ១០នាក់បានឆ្លងជំងឺកូវីដ-១៩ បំប្លែងថ្មីប្រភេទ ដែលតា កាលពីពេលថ្មីៗនេះ និងកំពុងដាក់ឱ្យនៅដាច់ដោយឡែក។ លោកបន្តថា ពន្ធនាគារកំពុងយកចិត្តទុកដាក់ព្យាបាលអ្នកជំងឺជាទណ្ឌិតនៅនឹងកន្លែងក្នុងពន្ធនាគារ ដោយមិនបញ្ជូនទៅក្រៅនោះទេ។
បើតាមអ្នកនាំពាក្យអគ្គនាយកដ្ឋានពន្ធនាគាររូបនេះ ក្នុងចំណោមពន្ធនាគារប្រមាណជា១០ដែលឆ្លងជំងឺកូវីដ-១៩កន្លងមក នៅមានតែពន្ធនាគារ៣ប៉ុណ្ណោះដែលកំពុងឆ្លងជំងឺកូវីដ-១៩ រួមមាន ពន្ធនាគារខេត្តបន្ទាយមានជ័យ ពន្ធនាគារខេត្តកំពង់ចាម និងពន្ធនាគារខេត្តត្បូងឃ្មុំ។
លោកមានប្រសាសន៍ថា៖ «ពួកគាត់នៅដោយឡែកតាំងពីដំបូងមកហើយ ពួកគាត់ជាជនជាប់ឃុំដែលទើបចូលថ្មី។ ហើយក្នុងអំឡុងពេលនោះ យើងទុកពួកគាត់ធ្វើចត្តាឡីស័កហ្នឹង ក៏ពិនិត្យឃើញថា គាត់មានផ្ទុក [កូវីដ] ប្រភេទ ដែលតាហ្នឹង។ អ៊ីចឹងក្រោមកិច្ចសហការជាមួយមន្ទីរសុខាភិបាលខេត្ត ក៏ដូចជារដ្ឋបាលខេត្ត ក៏យើងព្យាបាលគាត់នៅនឹងកន្លែង ទុកគាត់នៅមួយកន្លែង អត់បញ្ជូនទៅណាទេ។»
ទាក់ទងនឹងការរិះគន់លើនីតិវិធីក្នុងការដោះលែងអ្នកទោសដោយភ្ជាប់ជាមួយលក្ខខណ្ឌដែលមានសភាពយឺតយ៉ាវនោះ លោក នុត សវនា បានថ្លែងថា ភាគីពាក់ព័ន្ធកំពុងបំពេញបែបបទនីតិវិធីរដ្ឋបាលទៅតាមសេចក្តីប្រកាសរបស់ក្រសួងយុត្តិធម៌។
លោកមានប្រសាសន៍ថា៖ «មិនមែនជាប់គាំងទេ អានេះគេត្រូវបំពេញបែបបទនីតិវិធីរដ្ឋបាលសិន ព្រោះមានការរៀបចំសមាសភាពនៅក្នុងគណៈកម្មការគេហើយ មានការចុះហត្ថលេខាជាលក្ខណៈអន្តរក្រសួងឬជាអនុក្រឹត្យនោះ ខ្ញុំមិនទាន់ច្បាស់ទេ! មានគោលការណ៍ចាត់តាំងពីក្រសួងពាក់ព័ន្ធទៅហើយ អ្នកណាដែលនៅក្នុងគណៈកម្មការហ្នឹង គេរៀបចំសមាសភាពហើយ ថ្នាក់អន្តរក្រសួងហ្នឹង!»
អង្គការលើកលែងទោសអន្តរជាតិ (Amnesty International) និងអង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានសរសេរនៅក្នុងសេចក្តីថ្លែងការណ៍រួមគ្នាមួយកាលពីខែឧសភា ដោយអំពាវនាវឱ្យរដ្ឋាភិបាលកម្ពុជាដោះលែងអ្នកជាប់ឃុំដោយបទល្មើសស្រាលៗ ឬអ្នកជាប់ឃុំដែលកំពុងរង់ចាំការកាត់ទោស ឱ្យនៅក្រៅឃុំជាបណ្តោះអាសន្នសិន ក្រោយពីជំងឺកូវីដ-១៩បានឆ្លងរាលដាលចូលទៅក្នុងពន្ធនាគារខេត្តព្រះសីហនុជាលើកដំបូង។
បើតាមរបាយការណ៍របស់អង្គការអន្តរជាតិទាំងពីរ យ៉ាងហោចណាស់មានអ្នកជាប់ឃុំប្រមាណ ៣៥% នៃចំនួនអ្នកជាប់ឃុំសរុប៣៩ ០០០នាក់ នៅក្នុងពន្ធនាគារទូទាំងប្រទេស គឺជាអ្នកជាប់ឃុំបណ្តោះអាសន្នដើម្បីរង់ចាំការសវនាការកាត់ទោស ហើយពួកគេគួរត្រូវបានដោះលែងឱ្យនៅក្រៅឃុំជាបណ្តោះអាសន្នដោយភ្ជាប់ជាមួយនូវលក្ខខណ្ឌ។
ក្រោយមក នៅថ្ងៃទី១៤ ខែកក្កដា ឆ្នាំ២០២១ ក្រសួងយុត្តិធម៌បានចេញសេចក្តីប្រកាសស្ដីពីបែបបទនៃការឃ្លាំមើលតាមដាន ការត្រួតពិនិត្យ និងការបញ្ចូលទៅក្នុងសង្គមវិញ នៃទណ្ឌិតដែលត្រូវបានដោះលែងដោយមានលក្ខខណ្ឌ។ ប៉ុន្តែនៅមិនទាន់ឃើញមានការដោះលែងអ្នកទោសដោយមានលក្ខខណ្ឌនេះនៅឡើយទេ គិតត្រឹមដំណាច់ខែសីហានេះ៕
