សមត្ថកិច្ចខណ្ឌសែនសុខ បានដោះលែងអ្នកសារព័ត៌មាន២នាក់វិញ បន្ទាប់ពីឃាត់ខ្លួនយកទៅសាកសួរនៅអធិការដ្ឋាននគរបាលខណ្ឌអស់មួយយប់ ក្រោមហេតុថា បានថតរូបឡាយតាមបណ្តាញសង្គមធ្វើឱ្យប៉ះពាល់សិទ្ធិបុគ្គល។
អធិការដ្ឋាននគរបាលខណ្ឌសែនសុខ បានចុះផ្សាយតាមហ្វេសប៊ុករបស់ខ្លួននៅថ្ងៃទី៣០ ខែសីហានេះថា កាលពីវេលាម៉ោង៣រសៀល ថ្ងៃទី២៩ ខែសីហា សមត្ថកិច្ចបានឃាត់ខ្លួនអ្នកសារព័ត៌មាន២នាក់ ករណីឡាយរូបភាពលំនៅដ្ឋានបំពានលើសិទ្ធិបុគ្គល នៅចំណុចផ្ទះលេខ១២០២ ផ្លូវ១០០៧ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
សមត្ថកិច្ចបញ្ជាក់ថា បុរសពីរនាក់ដែលត្រូវបានឃាត់ខ្លួននោះ ម្នាក់ឈ្មោះ ស៊ិន ឡូត អាយុ៣៩ឆ្នាំ ជាអ្នកសារព័ត៌មានកម្ពុជាតេជោសន្តិភាព និងម្នាក់ទៀតឈ្មោះ ប៉ាន់ ផល្លា អាយុ៣៧ឆ្នាំ ជាអ្នកសារព័ត៌មានអាស៊ាន TV។ សមត្ថកិច្ចបន្តថា អ្នកទាំង២នាក់បានធ្វើសកម្មភាពថតឡាយវីដេអូផ្ទះរបស់បុគ្គលឈ្មោះ ទឹម ស្រីតូច ភេទស្រី អាយុ៣២ឆ្នាំ ជាអ្នកបកប្រែភាសាចិន។
អធិការនគរបាលខណ្ឌសែនសុខ លោក ហួរ ម៉េងវ៉ាង ប្រាប់ វីអូឌី នៅថ្ងៃចន្ទនេះថា សមត្ថកិច្ចឃាត់ខ្លួនអ្នកសារព័ត៌មានទាំង២នាក់នោះ ធ្វើឡើងតាមបណ្តឹងរបស់ម្ចាស់ផ្ទះ ប៉ុន្តែយ៉ាងណា លោកថា សមត្ថកិច្ចបានដោះលែងវិញហើយនៅរសៀលថ្ងៃនេះ ក្រោយពីអប់រំរួច។
លោកបន្ថែមថា៖ «និយាយរួម ពួកគាត់ទៅថតផ្ទះគេ! បើសិនយើងមានភស្តុតាងឯកសារអីច្បាស់លាស់ថាគេធ្វើអីៗទៅ វាមិនអីទេ! នេះគាត់អត់មានអីផង គាត់ទៅថតតែផ្ទះគេ គាត់ថតផ្ទះគេពីក្រៅរបង ឡាយយកតែម្តង»។
អ្នកសារព័ត៌មានកម្ពុជាតេជោសន្តិភាព លោក ស៊ិន ឡូត ចាត់ទុកករណីសមត្ថកិច្ចឃាត់ខ្លួនរូបលោក និងអ្នកសារព័ត៌មានម្នាក់ទៀតនោះ ថាធ្វើឱ្យប៉ះពាល់ដល់សេរីភាពសារព័ត៌មាន។ លោកអះអាងថា លោកទៅឡាយព័ត៌មានពាក់ព័ន្ធសន្តិសុខម្នាក់ដែលយាមនៅផ្ទះនោះ ត្រូវបានថៅកែបញ្ឈប់ពីការងារ និងមិនបានបើកប្រាក់ឈ្នួល។ តែយ៉ាងណា អ្នកសារព័ត៌មានរូបនេះក៏ទទួលស្គាល់ថា ការផ្សាយរបស់ខ្លួននោះខុសក្រមសីលធម៌ខ្លះដែរ ចំពោះការថតឡាយផ្ទះឯកជនរបស់គេ។
លោកបន្ថែមថា៖ «សមត្ថកិច្ចគាត់ហៅទៅសាកសួរនេះ ដោយសារតែយើងខុសក្រមសីលធម៌បន្តិចដែរ ដោយសារយើងឡាយចូលរបងផ្ទះគេ។ យើងទទួលនូវកំហុសរបស់យើងតែប៉ុណ្ណឹង។ អ្វីដែលពួកខ្ញុំចូលទៅអធិការខណ្ឌនេះ គឺសមត្ថកិច្ចសួរនាំយើងឱ្យឆ្លើយបំភ្លឺ ហើយយើងឆ្លើយបំភ្លឺតាមដំណើរហ្នឹងទៅ»។
បើតាមវីដេអូឡាយជាង២៦នាទី របស់គេហទំព័រសារព័ត៌មានកម្ពុជាតេជោសន្តិភាព ដែលបានឡាយ (Live) ផ្សព្វផ្សាយកាលពីថ្ងៃទី២៩ ខែសីហានេះ អ្នកសារព័ត៌មានទាំងពីរនាក់នោះបានលើកឡើងថា តាមការរាយការណ៍ពីប្រជាពលរដ្ឋ គឺមានជនបរទេសជិត១០០នាក់ មានជនជាតិចិននិងថៃបានចូលទៅក្នុងផ្ទះវីឡានោះដោយមិនចេញមកវិញឡើយ ហើយពួកគេមិនដឹងថា ជនបរទេសទាំងនោះចូលកម្ពុជាដោយខុសច្បាប់ឬត្រូវច្បាប់នោះទេ។ អ្នករាយការណ៍ព័ត៌មានបានអំពាវនាវសុំឱ្យសមត្ថកិច្ចពាក់ព័ន្ធចុះពិនិត្យទីតាំងផ្ទះវីឡានោះ។ ក្រោយពីមានការផ្សព្វផ្សាយបែបនេះ សមត្ថកិច្ចក៏បានឃាត់ខ្លួនពួកគេទៅសួរនាំតែម្តង ក្រោយមានបណ្តឹងពីម្ចាស់ផ្ទះវីឡានោះ។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លោក ណុប វី យល់ឃើញថា ការឡាយឬក៏ផ្សព្វផ្សាយរបស់អ្នកសារព័ត៌មានទាំង២រូបនោះ គ្រាន់តែខុសក្រមសីលធម៌ប៉ុណ្ណោះ ដែលករណីនេះ សមត្ថកិច្ចមិនគួរមានចាត់វិធានការផ្លូវច្បាប់ ដោយប្រើប្រាស់ក្រមព្រហ្មទណ្ឌនោះឡើយ។
លោកបន្តថា ក្នុងករណីអ្នកសារព័ត៌មានឡាយឬរាយការណ៍អំពីអង្គហេតុឬស្ថានភាពនៅទីកន្លែងណាមួយ សមត្ថកិច្ចគួរតែចុះទៅស៊ើបអង្កេតទីកន្លែងនោះឱ្យបានច្បាស់លាស់ ដើម្បីដឹងថា តើការរាយការណ៍របស់អ្នកសារព័ត៌មាននេះ វាមានរឿងអ្វីដែលមិនប្រក្រតីឬមានការប្រព្រឹត្តអ្វីរំលោភច្បាប់ឬយ៉ាងណា ជាជាងចាត់វិធានការមកលើពួកគេ ដែលធ្វើឱ្យរំលោភដល់ការអនុវត្តតួនាទីនិងសេរីភាពរបស់អ្នកសារព័ត៌មាន។
លោកបន្ថែមថា៖ «មើលឃើញថា អាជ្ញាធរសាធារណៈហាក់ព្យាយាមចាត់វិធានការចំពោះអ្នកដែលផ្តល់ព័ត៌មាន ដែលឈានដល់ការចាត់វិធានការចំពោះករណីបទល្មើសផ្សេងៗ ច្រើនជាងសមត្ថកិច្ចហ្នឹងសម្រួចទិសដៅរបស់ខ្លួនទៅរកបញ្ហាឬស្ថានភាពនានានៃបទល្មើសដែលកំពុងកើតមានឡើង។ អ៊ីចឹង ខ្ញុំគិតថា នេះគឺជារូបភាពមួយដែលមិនត្រឹមត្រូវទេ។ រឿងដែលសមត្ថកិច្ចគួរចាត់វិធានការ គឺសមត្ថកិច្ចគួរពិនិត្យមើលថា តើការបង្ហើបការបង្ហាញរបស់អ្នកសារព័ត៌មានហ្នឹងអាចជាពន្លឺដែលនាំទៅដល់ការចាត់វិធានការបង្ក្រាបបទល្មើសផ្សេងៗដែលកំពុងកើតមានឡើងនៅក្នុងសង្គមដែរឬទេ! អានេះគឺជារឿងដែលត្រឹមត្រូវ»។
លោក ណុប វី បន្ថែមថា ប្រសិនបើសមត្ថកិច្ចនៅតែព្យាយាមចាត់វិធានការលើអ្នកសារព័ត៌មានដែលហ៊ានរាយការណ៍អំពីបទល្មើសផ្សេងៗដែលកើតមានក្នុងសង្គមនោះ មានន័យថា សមត្ថកិច្ចក៏ជាផ្នែកមួយក្នុងលាក់បាំងព័ត៌មានជុំវិញបញ្ហាល្មើសផ្សេងៗដែលកំពុងកើតមាននៅក្នុងសង្គមដែរ។
អង្គការអ្នកកាសែតគ្មានព្រំដែន កាលពីពេលថ្មីៗនេះ បានបន្តផ្តល់ចំណាត់ថ្នាក់សេរីភាពសារព័ត៌មាននៅកម្ពុជា ឆ្នាំ២០២១ ស្ថិតនៅក្នុងរូបភាពអាក្រក់ដដែល ដោយនៅលេខរៀងទី១៤៤ ក្នុងចំណោម១៨០ប្រទេសនៅលើពិភពលោក។
សេរីភាពសារព័ត៌មានដែលអង្គការនេះវាយតម្លៃ បង្ហាញថា កម្ពុជាបានធ្លាក់ចុះ៣ឆ្នាំជាប់ៗគ្នាចាប់តាំងពីឆ្នាំ២០១៧មក ពោលគឺចំណាត់ថ្នាក់លេខ១៤២ នៅឆ្នាំ២០១៨ ចំណាត់ថ្នាក់លេខ១៤៣ នៅឆ្នាំ២០១៩ និងចំណាត់ថ្នាក់លេខ១៤៤ នៅឆ្នាំ២០២០និងឆ្នាំ២០២១នេះ៕
