ការអនុវត្តវិធានទប់ស្កាត់រលកចម្លងកូវីដ-១៩ បំប្លែងថ្មី (Delta) រយៈពេលត្រឹម២១ថ្ងៃដែលទើបបិទបញ្ចប់នោះ មានមនុស្សជិត១០០នាក់ត្រូវបានបញ្ជូនទៅតុលាការ និងជាង៣០ ០០០នាក់ផ្សេងទៀតត្រូវឃាត់ខ្លួនដើម្បីអប់រំនិងផាកពិន័យ។
រដ្ឋលេខាធិការក្រសួងយុត្តិធម៌ និងជាអ្នកនាំពាក្យ លោក គឹម សន្តិភាព បានឱ្យដឹងនៅលើគេហទំព័រហ្វេសប៊ុករបស់លោក កាលពីថ្ងៃអាទិត្យថា លទ្ធផលកិច្ចសហប្រតិបត្តិការរបស់អនុគណៈកម្មការដឹកនាំការអនុវត្តច្បាប់ នៃគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ ក្នុងរយៈពេល២១ថ្ងៃ នៅទូទាំងប្រទេស គិតចាប់ពីថ្ងៃទី២៩ ខែកក្កដា ដល់ត្រឹមថ្ងៃទី១៩ ខែសីហា ឆ្នាំ២០២១ គឺមានមនុស្ស៩៥នាក់ត្រូវបានបញ្ជូនទៅតុលាការ និងជាង៣០ ០០០នាក់ទៀតត្រូវបានឃាត់ខ្លួនដើម្បីអប់រំនិងផាកពិន័យ។
លោកថា៖ «ករណីល្មើស១៧ ៩៩៧ករណី ឃាត់ខ្លួនមនុស្ស៣៥ ២៣១នាក់ [ជនបរទេស ២១៩នាក់] ក្នុងនោះ អនុវត្តវិធានការអប់រំចំនួន៣៣ ៨៤៤នាក់ អនុវត្តវិធានការពិន័យ១ ២៩២នាក់ និងបញ្ជូនទៅតុលាការ៩៥នាក់ [ជនបរទេសម្នាក់]។ ឃាត់យានយន្ត រួមមាន រថយន្ត៥ ៩៨១គ្រឿង ម៉ូតូ៩ ២៦១គ្រឿង ថវិកាពិន័យ៧២២ ៨០០ ០០០រៀល បិទទីតាំងអាជីវកម្ម៥ទីតាំង»។
គួររំឭកថា កាលពីខែមុន រដ្ឋាភិបាលបានណែនាំទៅមន្ត្រីពាក់ព័ន្ធឱ្យអនុវត្តវិធានការប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ-១៩ រយៈពេល២១ថ្ងៃនៅទូទាំងប្រទេស ដែលវិធាននេះបានចាប់ផ្តើមតាំងពីថ្ងៃទី២៩ ខែកក្កដា ដល់ថ្ងៃទី១៩ ខែសីហា ឆ្នាំ២០២១ បន្ទាប់ពីកម្ពុជារកឃើញមេរោគកូវីដ-១៩បំប្លែងថ្មី ដែលតា (Delta) ឆ្លងចូលសហគមន៍។
តែវិធាននេះត្រូវបានរដ្ឋាភិបាលប្រកាសបិទបញ្ចប់នៅថ្ងៃទី២០ ខែសីហា ឆ្នាំ២០២១ ដោយទុកឱ្យអនុវត្តតែវិធានសុខាភិបាលវិញ ក្រោយពីរកឃើញថា ស្ថានភាពចម្លងស្ថិតក្នុងស្ថានភាពអាចគ្រប់គ្រងបាន។
បើតាមក្រសួងសុខាភិបាល គិតត្រឹមថ្ងៃអាទិត្យម្សិលមិញ មេរោគកូវីដ-១៩បំប្លែងថ្មីប្រភេទ ដែលតា បានឆ្លងរាលដាលដល់២៣រាជធានី-ខេត្ត ហើយ និងឆ្លងដល់មនុស្សជិត១ ០០០នាក់៕
