សមត្ថកិច្ចរាជធានីភ្នំពេញ គ្រោងបញ្ជូនអ្នកសារព័ត៌មាននៅអង្គភាពសារព័ត៌មាន BCP TV ទៅតុលាការ ដើម្បីចាត់វិធានការច្បាប់ ដោយសារល្មើសបម្រាមគោចរនិងកាន់កាប់អាវុធខុសច្បាប់។
អធិការនគរបាលខណ្ឌឫស្សីកែវ លោក ហ៊ាង ថេរ៉េត ប្រាប់ វីអូឌី នៅថ្ងៃពុធនេះថា កាលពីយប់ថ្ងៃទី១៦ ខែសីហា ឆ្នាំ២០២១ សមត្ថកិច្ចខណ្ឌឫស្សីកែវ បានឃាត់ខ្លួនបុរសម្នាក់ឈ្មោះ ម៉ន តេវ អាយុ៤២ឆ្នាំ ជាអ្នកយកព័ត៌មានឱ្យអង្គភាពសារព័ត៌មាន BCP TV នៅចំណុចបណ្តោយផ្លូវជាតិលេខ៥ ក្នុងសង្កាត់ច្រាំងចំរេះ១ ដោយសារបុរសរូបនេះល្មើសបម្រាមគោចររបស់រដ្ឋបាលរាជធានីភ្នំពេញ ដែលបានហាមឃាត់ការធ្វើដំណើរ ចាប់ពីចន្លោះម៉ោង១០យប់ដល់ម៉ោង៥ទៀបភ្លឺ។
លោកបន្តថា ក្នុងពេលឃាត់ខ្លួនសួរនាំនោះ សមត្ថកិច្ចក៏បានរកឃើញអាវុធខ្លី១ដើមម៉ាក Lock 17 គ្មានលេខ និងអាយកូម១គ្រឿង នៅលើខ្លួនរបស់ជនសង្ស័យជាអ្នកសារព័ត៌មានរូបនោះ ដែលមិនមានច្បាប់អនុញ្ញាតឱ្យប្រើប្រាស់នោះទេ ។
បើតាមលោក ហ៊ាង ថេរ៉េត គិតមកដល់រសៀលថ្ងៃពុធនេះ ក្រុមការងារជំនាញកំពុងសួរនាំនិងកសាងសំណុំរឿងបញ្ជូនទៅតុលាការ ដើម្បីចាត់វិធានការច្បាប់បន្ត។
លោកថា៖ «កំពុងកសាងសំណុំរឿងបញ្ជូន [ទៅតុលាការ] ។ [តើនឹងបញ្ជូនទៅតុលាការនៅពេលណាដែរបង?] ខ្ញុំអត់ដឹងទេ! កូនចៅខ្ញុំជាអ្នកបញ្ជូន ខ្ញុំបានតែឱ្យយោបល់ទេ ព្រោះគេជាអ្នកកសាងសំណុំរឿងផ្សេង»។
អគ្គនាយក BCP TV លោក ជា អេងឡុង បានទទួលស្គាល់ថា ឈ្មោះ ម៉ន តេវ ពិតជាបុគ្គលិកផ្នែកយកព័ត៌មានរបស់ស្ថានីយ BCP TV ប្រាកដមែន ហើយគាត់ធ្វើការងារផ្ដោតទៅលើបញ្ហាគ្រោះថ្នាក់ចរាចរណ៍និងសន្តិសុខសង្គម។
ទោះជាបែបនេះក្តី លោកបញ្ជាក់ថា អំពើដែលឈ្មោះ ម៉ន តេវ ប្រព្រឹត្តជារឿងបុគ្គល មិនពាក់ព័ន្ធជាមួយអង្គភាពឬស្ថាប័នរបស់លោកនោះទេ។ ករណីនេះ លោកថា ទុកឱ្យអាជ្ញាធរចាត់វិធានការតាមច្បាប់ទៅចុះ។
លោកមានប្រសាសន៍ថា៖ «បទបញ្ជារបស់ខ្ញុំ បើថាគាត់ធ្វើខុសគោលការណ៍វិជ្ជាជីវៈអ្នកសារព័ត៌មាន ខ្ញុំមិនដឹងជួយគាត់ថាម៉េចទេ! ខ្ញុំអត់ត្រូវជួយគាត់កើតទេ ព្រោះបើគាត់ប្រើប្រាស់អាវុធខុសច្បាប់ ខ្ញុំអត់ទទួលការខុសត្រូវទេ។ អាហ្នឹងតាមលក្ខខណ្ឌរបស់កងប្រដាប់អាវុធ គេដាក់បន្ទុកយ៉ាងម៉េច លើកងកម្លាំងប្រដាប់អាវុធ»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ថា «ខេមបូចា» លោក ណុប វី មានប្រសាសន៍ថា បើសមត្ថកិច្ចចាប់អ្នកសារព័ត៌មាន ហើយរកឃើញថាមានកាន់កាប់អាវុធខុសច្បាប់ប្រាកដមែន សមត្ថកិច្ចត្រូវអនុវត្តច្បាប់លើបុគ្គលនោះ ដោយមិនជាប់ពាក់ព័ន្ធនឹងអង្គភាពឬស្ថាប័នសាម៉ីនោះទេ។
លោក ណុប វី ជំរុញទៅអាជ្ញាធរពាក់ព័ន្ធត្រូវធ្វើការស្រាវជ្រាវរកភស្តុតាងឱ្យបានគ្រប់ជ្រុងជ្រោយ មុននឹងអនុវត្តវិធានការច្បាប់លើបុគ្គលនោះ ដើម្បីកុំឱ្យយករឿងបុគ្គលដែលប្រព្រឹត្តបទល្មើសព្រហ្មទណ្ឌ ផ្សារភ្ជាប់ជាមួយស្ថាប័នសាម៉ីឬអង្គភាពសារព័ត៌មានជាដើម ។
លោកមានប្រសាសន៍ថា៖ «អ្វីដែលជាចំណុចសំខាន់ គឺត្រូវធ្វើម៉េចធ្វើការស៊ើបអង្កេតឱ្យបានច្បាស់លាស់ថា តើវាមានភស្តុតាងអំណះអំណាងគ្រប់គ្រាន់ត្រឹមត្រូវក្នុងការចោទប្រកាន់ពិតមែន? កុំឱ្យដោយសារតែមូលហេតុការងារគាត់ជាអ្នកសារព័ត៌មាន ហើយគាត់ត្រូវបានចោទប្រកាន់។ អាហ្នឹងជារឿងមួយដែលយើងមានការព្រួយបារម្ភ»។
មាត្រា២០ នៃច្បាប់ស្តីពី«ការគ្រប់គ្រងអាវុធ គ្រឿងផ្ទុះ និងគ្រាប់រំសេវ» បានចែងថា ជនណាដែលបំពាក់តាមខ្លួន កាន់កាប់ ប្រើប្រាស់ លក់ ទិញ ឱ្យខ្ចី ចែកចាយ ជួលនូវអាវុធ គ្រឿងផ្ទុះ និងគ្រាប់រំសេវគ្រប់ប្រភេទ ដោយគ្មានការអនុញ្ញាត ត្រូវផ្តន្ទាទោសដាក់ពន្ធនាគារពី៦ខែទៅ២ឆ្នាំ និងពិន័យជាប្រាក់ពី៥០ម៉ឺនរៀលដល់២លានរៀល ដោយមិនទាន់គិតពីបទល្មើសព្រហ្មទណ្ឌផ្សេងទៀត ៕
