ភរិយាអ្នករត់រ៉ឺម៉កកង់បីម្នាក់រស់នៅស្រុកខ្សាច់កណ្តាល ខេត្តកណ្តាល បានអំពាវនាវឱ្យអង្គការសង្គមស៊ីវិលជាតិនិងអន្តរជាតិជួយអន្តរាគមន៍ទៅរដ្ឋាភិបាលឱ្យមានការដោះលែងស្វាមីរបស់ខ្លួន បន្ទាប់ពីអាជ្ញាធរបានចាប់ឃុំខ្លួនពីបទ«ញុះញង់និងបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
អ្នកស្រី ខាត់ សឿន អាយុ៤៧ឆ្នាំ រស់នៅក្នុងភូមិទួលពង្រ ឃុំស៊ីធរ ស្រុកខ្សាច់កណ្តាល ខេត្តកណ្តាល បានអះអាងថា ប្តីរបស់អ្នកស្រីឈ្មោះ ប៉ាវ រ៉ាវី អាយុ៤៦ឆ្នាំ ជាអ្នករកស៊ីរត់រ៉ឺម៉កកង់បីនៅរាជធានីភ្នំពេញ ហើយយូរៗម្តងទើបបានទៅលេងស្រុក។ អ្នកស្រីបន្តថា កាលពីថ្ងៃទី៤ ខែសីហា ស្វាមីរបស់គាត់បានចែកខិត្តបណ្ណមួយចំនួនដល់អ្នកភូមិ តែអ្នកស្រីមិនចាំខ្លឹមសារយ៉ាងណានោះទេ។ យ៉ាងណាក្តី អ្នកស្រីអះអាងថា ស្វាមីរបស់អ្នកស្រីមានជំងឺសរសៃប្រសាទ និងមិនជាប់ពាក់ព័ន្ធជាមួយគណបក្សនយោបាយណាមួយនោះទេ។
អ្នកស្រីមានប្រសាសន៍ថា៖ «គាត់សរសេរនេះនោះអ៊ីចឹង តែខ្ញុំមិនដឹងថា គាត់សរសេរពាក្យអី អត់ដឹងទេ! ចាស៎! ឱ្យប្រជាជននៅនឹងភូមិហ្នឹងមើល ហើយដល់អ៊ីចឹងប៉ូលិសមកចាប់ខ្លួនគាត់ទៅ។ អាពេលចាប់ហ្នឹងណា លោកគ្រូ! គាត់ឌុបប៉ូលិសទៅទៀត»។
អ្នកស្រីបានបន្តថា៖ «ខ្ញុំចង់និយាយថា ចង់ឱ្យលោកគ្រូ [អង្គការសង្គមស៊ីវិល] ហ្នឹងជួយប្តីខ្ញុំផង! គាត់នៅក្នុងពន្ធនាគារហ្នឹង សូមឱ្យលោកគ្រូជួយ ជួយដោះលែងប្តីខ្ញុំហ្នឹងផង។ ហើយខ្ញុំហ្នឹងអត់ណាស់ ខ្ញុំអត់មានអីទេ ខ្ញុំអត់ហ្នឹង អត់តែម្តង។ និយាយរួមទៅ រកតែលុយទិញបាយម្ហូបអត់បានផង»។
ប៉ុន្តែលោក ខែម ស៊ុយ មេប៉ុស្តិ៍ឃុំស៊ីធរ ស្រុកខ្សាច់កណ្តាល ខេត្តកណ្តាល បានអះអាងថា ការចាប់ខ្លួនលោក ប៉ាវ រ៉ាវី នេះ បន្ទាប់ពីគាត់បានចែកខិត្តបណ្ណគំរាមសម្លាប់លោកនាយករដ្ឋមន្ត្រី ហ៊ុន សែន និងសរសេរអត្ថបទមួយសន្លឹកទាក់ទងការរិះគន់និងការគាំទ្រដល់អតីតគណបក្សសង្រ្គោះជាតិ។
លោកមេប៉ុស្តិ៍បានមានប្រសាសន៍យ៉ាងដូច្នេះថា៖ «ខ្លឹមសារលិខិតហ្នឹង ខ្ញុំភ្លេចអស់ហើយ! តែពាក្យដែលវាសង្កត់ធ្ងន់ គឺវារកសម្លាប់សម្តេចតេជោ សម្លាប់សម្តេច ហ៊ុន សែន។ ហើយមួយទៀត វាសរសេរថា វាជាសកម្មជនគណបក្សសមរង្ស៊ី អ៊ីចឹងបានថា វាពិបាក»។
ចំណែកអធិការនគរបាលស្រុកខ្សាច់កណ្តាល លោក ម៉ែន សុខឃឿន វិញ បានបដិសេធអត្ថាធិប្បាយលម្អិតពីសំណុំរឿងមួយនេះ ដោយបង្វែរសំណួរឱ្យទៅសួរនាយកដ្ឋានសន្តិសុខកណ្តាលផ្ទៃក្នុងនៃក្រសួងមហាផ្ទៃវិញ តែ វីអូឌី មិនអាចទាក់ទងបាន។
លោកអធិការនគរបាលស្រុកមានប្រសាសន៍ខ្លីថា៖ «អាហ្នឹងខ្ញុំអត់សម្រាយទៀតទេ ព្រោះគេកំពុងស្រាវជ្រាវបន្ត [ភារកិច្ច]របស់សន្តិសុខផ្ទៃក្នុង គេកំពុងធ្វើការងារបន្ត»។
ចំណែកនាយករងផ្នែកឃ្លាំមើលនិងការពារសិទ្ធិមនុស្សនៃអង្គការលីកាដូ លោក អំ សំអាត នៅមិនទាន់ទទួលបានព័ត៌មាននេះនៅឡើយទេ។ លោកថា បន្ទាប់ពីទទួលបានព័ត៌មាននេះ អង្គការលីកាដូនឹងចុះស្រាវជ្រាវពីករណីនេះ។
លោកមានប្រសាសន៍ថា៖ «អាហ្នឹងខាងអង្គការសង្គមស៊ីវិល! ខាងខ្ញុំនេះ អត់ទាន់ទទួលបានព័ត៌មានហ្នឹងទេ។ អ៊ីចឹងចាំមើលក្រោយទទួលបានព័ត៌មានហ្នឹង យើងនឹងចុះធ្វើការស្រាវជ្រាវទៅលើបញ្ហាហ្នឹង បាទ»។
បើតាមសេចក្តីរាយការណ៍របស់អាជ្ញាធរខេត្តកណ្តាល ការចាប់ខ្លួនលោក ប៉ាវ រ៉ាវី អ្នករត់រ៉ឺម៉កកង់បី កាលពីថ្ងៃទី៥ ខែសីហា ហើយនៅថ្ងៃទី៧ ខែសីហា លោក ប៉ាវ រ៉ាវី ត្រូវបានអាជ្ញាធរបញ្ជូនទៅសាលាដំបូងខេត្តកណ្តាល ដោយចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ បច្ចុប្បន្ន លោកកំពុងស្ថិតនៅក្រោមការឃុំខ្លួន នៅក្នុងពន្ធនាគារខេត្តកណ្តាលជាបណ្តោះអាសន្ន៕