អតីតថ្នាក់ដឹកនាំគណបក្សង្គ្រោះជាតិ ២រូបទៀត ដែលជាប់បម្រាមតុលាការកំពូល ត្រូវបានព្រះមហាក្សត្រ ព្រះរាជទានផ្តល់ នីតិសម្បទាធ្វើនយោបាយឡើងវិញ ខណៈអតីតមន្ត្រីបក្សប្រឆាំងដែលស្នើសុំធ្វើនយោបាយមួយចំនួនត្រូវបានបដិសេធ ក្រោយពីរដ្ឋាភិបាលប្រកាសរឹតបន្តឹង មុននឹងផ្តល់សិទ្ធិធ្វើនយោបាយដល់ពួកគេឡើងវិញ។
ក្នុងព្រះរាជក្រឹត្យចំនួន២ដាច់ដោយឡែកពីគ្នា របស់ព្រះមហាក្សត្រខ្មែរ បានឡាយព្រះហស្ថលេខា កាលពីថ្ងៃទី១៤ ខែសីហា ម្សិលមិញនេះ បានអនុញាតឱ្យអតីតថ្នាក់ដឹកនាំ CNRP ២រូបនេះ រួមមាន លោក ឃឹម ឡាគី អតីតអ្នកតំណាងរាស្រ្តមណ្ឌលខេត្តកណ្តាល និង លោក ម៉ៅ សុផល អតីតប្រធានប្រតិបត្តិគណបក្សសង្គ្រោះជាតិខេត្តតាកែវ ដែលត្រូវបានហាមឃាត់មិនឱ្យធ្វើសកម្មភាពនយោបាយសម្រាប់រយៈពេល៥ឆ្នាំ តាមរយៈសាលដីកាមួយ ចុះកាលពីថ្ងៃទី១៦ ខែវិច្ឆិកា ឆ្នាំ២០១៧ របស់តុលាការកំពូល ។
ក្នុងឱកាសបើកយុទ្ធនាការចាក់វ៉ាក់សាំងដល់កុមារ និងយុវវ័យអាយុចន្លោះពី១២ ដល់១៧ឆ្នាំ នៅវិមានសន្តិភាព កាលពីថ្ងៃទី១ ខែសីហា ឆ្នាំ២០២១នេះ លោក ហ៊ុន សែន ប្រកាសរឹតបន្តឹងលើការស្នើសុំនីតិសម្បទា ធ្វើនយោបាយឡើងវិញរបស់អតីតមន្ត្រីជាន់ខ្ពស់គណបក្សសង្រ្គោះជាតិ ដែលជាប់បម្រាមតុលាការនៅឡើយនោះ។
លោកបញ្ជាក់ថា ពីពេលនេះតទៅ លោកនឹងមិនចេះតែផ្តល់សិទ្ធិធ្វើនយោបាយដល់អតីតក្រុមអ្នកជាប់បម្រាមនយោបាយបក្សប្រឆាំងទៀតនោះទេ ដោយថាបើពួកគេធ្វើឱ្យលោកពេញចិត្ត លោកនឹងផ្តល់សិទ្ធិធ្វើនយោបាយឱ្យ ប៉ុន្តែបើលោកមិនពេញចិត្ត លោកនឹងមិនផ្តល់នីតិសម្បទាធ្វើនយោបាយជូនពួកគេឡើយ ហើយពួកគេត្រូវរង់ចាំសិទ្ធិធ្វើនយោបាយបានរហូតដល់ចុងឆ្នាំ២០២២ ឬ រហូតដល់បម្រាមនេះត្រូវបានផុតរលត់។
លោកហ៊ុន សែន មានប្រសាសន៍ថា៖ «អាហ្នឹងខ្ញុំមានសិទ្ធិពិចារណាឱ្យ[សិទ្ធិធ្វើនយោបាយឡើងវិញ]ឬ មិនឱ្យ ធ្វើឱ្យខ្ញុំពេញចិត្ត ខ្ញុំឱ្យ ធ្វើឱ្យខ្ញុំមិនពេញចិត្តមិនឱ្យ ព្រោះខ្ញុំធ្វើនាយករដ្ឋមន្ត្រី ខ្ញុំមានសិទ្ធិ។ អាហ្នឹងអារម្មណ៍របស់ខ្ញុំវាអីចឹង មិនមែនឱ្យតែសុំមក កាតព្វកិច្ចត្រូវតែស៊ីញ៉ែឱ្យអ្នកឯងទេ អត់ទេ។ និយាយគ្នាឱ្យច្បាស់ៗ ព្រោះពួកហ្នឹង[អ្នកជាប់បម្រាមនយោបាយ] ទាល់តែអីចឹង»។
កាលពីពេលថ្មីៗនេះ មានអតីតមន្ត្រីជាន់ខ្ពស់គណបក្សសង្រ្គោះជាតិ៣រូប រួមមាន លោកមេធាវី ជួង ជូងី លោក ញ៉ឹម គឹមញ៉ុល លោក ស៊ុន ចន្ធី អតីតសមាជិកក្រុមប្រឹក្សាខេត្តកំពង់ធំគណបក្សសង្រ្គោះជាតិ បានដាក់សំណើរទៅកាន់ក្រសួងមហាផ្ទៃ ដើម្បីស្នើសុំនីតិសម្បទាធ្វើនយោបាយឡើងវិញ។ ប៉ុន្តែសំណើររបស់ពួកគេត្រូវបានលោកនាយករដ្ឋមន្ត្រីហ៊ុន សែន បដិសេធការស្នើថ្វាយទៅព្រះមហាក្សត្រ ដើម្បីផ្តល់សិទ្ធិធ្វើនយោបាយដល់ពួកគេឡើងវិញ បន្ទាប់ពីរកឃើញថា ពួកគេទាំង៣នាក់ បានធ្វើសកម្មភាពល្មើសបម្រាមរបស់តុលាការមួយចំនួន ។
គិតមកត្រឹមថ្ងៃទី១៤ ខែសីហា ឆ្នាំ២០២១នេះ អតីតថ្នាក់ដឹកនាំអតីតគណបក្សសង្រ្គោះជាតិ (CNRP) ចំនួន២៦រូប ក្នុងចំណោម១១៨រូបដែលជាប់បម្រាមធ្វើនយោបាយ ត្រូវបានព្រះមហាក្សត្រ និងប្រមុខរដ្ឋស្តីទី ផ្តល់នីតិសម្បទានយោបាយឡើងវិញ តាមសំណើររបស់ក្រសួងមហាផ្ទៃ និងលោកនាយករដ្ឋមន្ត្រី ៕
