តំណាងសហគមន៍នេសាទ «កំបោរ» ក្នុងស្រុកព្រះនេត្រព្រះ ខេត្តបន្ទាយមានជ័យ អះអាងថា បណ្តឹងបរិហារដែលក្រុមសហគមន៍គ្រោងនឹងប្តឹងមន្រ្តីមូលដ្ឋាននិងអ្នកពាក់ព័ន្ធដែលលួចលក់ដីព្រៃលិចទឹករបស់រដ្ឋនិងដីមួយផ្នែកទៀតជាកម្មសិទ្ធិរបស់សហគមន៍ នឹងរៀបចំក្នុងពេលឆាប់ៗនេះ ខណៈអាជ្ញាធរដែលរងការចោទប្រកាន់ឆ្លើយតបថា ខ្លួនមិនមានការភ័យភិតអ្វីឡើយ។
ប្រធានគណៈកម្មការសហគមន៍នេសាទ «កំបោរ» លោក ឆាយ លឿ បានប្រាប់ វីអូឌី នៅថ្ងៃទី១៣ ខែសីហានេះថា ក្រុមការងារសហគមន៍បានពិគ្រោះយោបល់គ្នារួចហើយអំពីលទ្ធភាពក្នុងការដាក់បណ្តឹងបរិហារនេះ។ ប៉ុន្តែលោកថា ការបន្តពន្យារពេលរឿងដាក់បណ្តឹងបរិហារនេះ ដោយត្រូវរង់ចាំឥរិយាបថនិងការដោះស្រាយរបស់គ្រប់ភាគីទំនាស់សិន ប៉ុន្តែបើសិនមិនមានដំណោះស្រាយណាមួយទេ ចំណាត់ការតាមនីតិវិធីច្បាប់នឹងដំណើរការហើយ។
លោកបន្តថា៖ «កំពុងរង់ចាំថ្នាក់ក្រោមធ្វើការសិន ប៉ុន្តែការប្តឹងនោះបានត្រៀមទុករួចជាស្រេចហើយ»។
តាមរយៈបណ្តឹងកាលពីថ្ងៃទី១៣ ខែកក្កដា ឆ្នាំ២០២០កន្លងទៅ ប្រជាពលរដ្ឋបានផ្តិតស្នាមមេដៃប្រមាណ៨០០នាក់ ប្តឹងមេឃុំឈ្មោះ អែម ណុយ និងអ្នកពាក់ផ្សេងទៀត ដោយចោទប្រកាន់ថា បានលក់ដីសហគមន៍និងដីព្រៃលិចទឹកចំនួន១២០ហិកតា ស្ថិតក្នុងតំបន់២ ក្នុងឃុំភ្នំលៀប ស្រុកព្រះនេត្រព្រះ ជាប់បឹងទន្លេសាប ឱ្យទៅឈ្មួញ។
នៅក្នុងបណ្តឹងនេះក៏បានរៀបរាប់បន្ថែមថា នៅមានដីព្រៃលិចទឹកនិងដីសហគមន៍នេសាទតាសោម ស្ថិតក្នុងតំបន់៣ នៅក្នុងភូមិក្របៅ និងភូមិកំពង់ក្រសាំង ជាច្រើនហិកតាទៀត រួមទាំងដីក្បាលស្ពាន ក្បែរផ្លូវជាតិ ក៏មេឃុំភ្នំលៀប និងគូកន លក់គ្មានសល់ដែរ។
មេឃុំភ្នំលៀប លោក អែម ណុយ បានប្រាប់ថា លោកមិនខ្លាចញញើតចំពោះបណ្តឹងបរិហារដែលក្រុមសហគមន៍គ្រោងនឹងប្តឹងរូបលោក រួមទាំងអ្នកពាក់ព័ន្ធផ្សេងទៀតឡើយ ហើយលោកក៏មិនតបតអ្វីប្រឆាំងការប្តឹងផ្តល់នេះដែរ។
លោកបន្តថា៖ «ខ្ញុំអត់មានការព្រួយបារម្ភអីទេ ព្រោះខ្ញុំមិនបានទៅធ្វើដូចគេចោទឯណា! ខ្ញុំនៅតែស្ងៀម គេធ្វើអីក៏ធ្វើទៅ ព្រោះខ្ញុំមិនបានធ្វើ»។
អ្នកស្រី ស្រង់ ទ្រព្យ ភរិយារបស់លោក ស៊ា សុឃុន ដែលជាឈ្មួញទិញដីព្រៃលិចទឹកនេះ បញ្ជាក់ថា ដីដែលក្រុមគ្រួសារអ្នកស្រីបានទិញនេះមានទំហំជាង១០ហិកតាប៉ុណ្ណោះ មិនមែនដូចបណ្តឹងដែលសហគមន៍ធ្លាប់ប្ដឹងកន្លងទៅ ថាមានជាង១០០ហិកតានោះទេ។ អ្នកស្រីបន្តថា ការទិញលក់នេះគឺមានលិខិតស្នាមត្រឹមត្រូវ ដែលអ្នកស្រីបានទិញពីឈ្មោះ ហេង ហុង ដែលជាម្ចាស់មូលដ្ឋានទៅទីនោះស្រាប់ ហើយនៅមានអ្នកទិញ៣នាក់ផ្សេងទៀត ពោលមិនមែនមានតែក្រុមគ្រួសារអ្នកស្រីម្នាក់ទេ។
អ្នកស្រីបន្តថា៖ «ឈ្មោះខ្ញុំមានតែ១៥ហិកតាតើបង! ហើយនៅមានគេផ្សេងទៀត អ្នកទៅជាមួយគ្នា ហើយទិញជាមួយគ្នា។ ឈ្មោះ ហេង ហុង គេជាអ្នកលក់ឱ្យ។ គាត់ជាអ្នកធ្វើព្រៃធ្វើអី ហើយក៏គាត់លក់ដោះស្រាយជីវភាពរបស់គាត់ទៅ»។
វីអូឌី មិនអាចសុំការបំភ្លឺជុំវិញការចោទប្រកាន់នេះបាននៅឡើយទេពីលោក ហេង ហុង នៅថ្ងៃសុក្រនេះ ខណៈអភិបាលរងខេត្តបន្ទាយមានជ័យ អ្នកស្រី រស់ សុផានី ដែលទទួលបន្ទុកដោះស្រាយដីធ្លី អះអាងថា កំពុងជាប់ប្រជុំ។
យ៉ាងនេះក្តី អ្នកសម្របសម្រួលសមាគមការពារសិទ្ធិមនុស្សអាដហុក ប្រចាំខេត្តបន្ទាយមានជ័យ លោក ស៊ុំ ចន្ទគា យល់ឃើញថា ការស្វែងរកយុត្តិធម៌តាមនីតិវិធីច្បាប់របស់សហគមន៍នេះ គឺជារឿងត្រឹមត្រូវ។ លោកថា ប្រសិនបើគ្មានដំណោះស្រាយលើទំនាស់ដីព្រៃលិចទឹក មានតែមធ្យោបាយនេះទេដែលមានប្រសិទ្ធភាពនិងអាចជួយទប់ស្កាត់ទង្វើមិនគប្បីរបស់មន្រ្តីមួយចំនួនបានផងដែរ។
លោកបន្តថា៖ «នេះគឺជាបណ្តឹងមួយដែលធ្វើត្រឹមត្រូវទៅតាមផ្លូវច្បាប់។ វាអត់មានខុសអីទេទៅលើទម្រង់ទំនាក់ទំនងគតិយុត្តិ ផ្លូវ[ច្បាប់]គឺអត់ខុសទេ» ។
នៅក្នុងក្រមព្រហ្មទណ្ឌនៃព្រះរាជាណាចក្រកម្ពុជា បានកំណត់អំពីបណ្តឹងបរិហារនេះ។ បណ្តឹងនេះគឺសំដៅទៅលើបណ្តឹងវែកមុខបទល្មើសដែលមានគោលបំណងបង្ហាញឬបកអាក្រាតនូវបទល្មើស ដើម្បីឱ្យសមត្ថកិច្ចធ្វើការត្រួតពិនិត្យនិងស្វែងរកភស្តុតាងនៅក្នុងបទល្មើស ហើយនិងចាប់ជនល្មើសយកមកផ្តន្ទាទោសតាមច្បាប់។ បណ្តឹងបរិហារអាចតាមរយៈរបស់តតិយជន ឬដោយមន្រ្តីសាធារណៈដែលពួកគេបានឃើញឬបានដឹងពីបទល្មើសនោះ៕
