មន្រ្តីសហជីពការងារប្រចាំខេត្តបន្ទាយមានជ័យ លើកឡើងថា បុគ្គលិកកាស៊ីណូប្រមាណ៩០ភាគរយនៅក្រុងប៉ោយប៉ែត កំពុងបាត់បង់ការងារដោយសារបញ្ហារីករាលដាលនៃជំងឺកូវីដ-១៩ ក្រោយអាជីវកម្មល្បែងនៅតំបន់ជាប់ព្រំដែនប្រទេសថៃមួយនេះបន្តបិទទ្វារ។
កាលពីអំឡុងចុងខែមេសា រដ្ឋបាលខេត្តបន្ទាយមានជ័យបានសម្រេចផ្អាកអាជីវកម្មកាស៊ីណូទាំងអស់ក្នុងក្រុងប៉ោយប៉ែត ខេត្តបន្ទាយមានជ័យ បន្ទាប់ពីផ្ទុះករណីឆ្លងជំងឺផ្លូវដង្ហើមក្នុងចំណោមបុគ្គលិកធ្វើការនៅទីនោះមួយចំនួន។ បើតាមមន្រ្តីរដ្ឋបាលក្រុង វិធានការនេះនៅតែបន្តអនុវត្តគិតមកទល់ថ្ងៃទី១២ ខែសីហា ឆ្នាំ២០២១។
មន្រ្តីសម្របសម្រួលសិទ្ធិការងារ នៃសម្ព័ន្ធសហជីពចលនាកម្មករកម្ពុជាប្រចាំខេត្តបន្ទាយមានជ័យ លោក ប៊ុន សុធី បានឱ្យដឹងថា បុគ្គលិកកាស៊ីណូក្នុងក្រុងប៉ោយប៉ែតស្ទើរតែទាំងអស់កំពុងបាត់បង់ការងារ ដោយមិនមានការផ្តល់ប្រាក់ឧបត្ថម្ភពីភាគីថៅកែនិយោជកឬរដ្ឋាភិបាលនោះទេ។ លោកថា ការឧបត្ថម្ភសម្រាប់ពួកគេគឺធ្វើឡើងតាមគោលការណ៍ស្ម័គ្រចិត្តនិងមនុស្សធម៌ ខុសពីកម្មករក្នុងវិស័យរោងចក្រកាត់ដេរដែលអាចទទួលបានប្រាក់ឧបត្ថម្ភពីថៅកែនិងរដ្ឋាភិបាល។
លោកថា៖ «ខាងរោងចក្ររាងគ្រាន់បន្តិច ត្រង់ថា គាត់នៅមានការងារធ្វើ តែគាត់ប្រឈម។ ប៉ុន្តែបើខាងកាស៊ីណូ គឺបិទទ្វារតែម្តង បិទទ្វារចង់២ឆ្នាំហើយ ហើយគ្មានជំនួយអីសប្បុរសធម៌ពីភាគីរដ្ឋាភិបាល ក៏ដូចជាពីសំណាក់និយោជកអី គឺគ្មានទេ។ គ្មានបានអីទេ! ១០រៀល[ដុល្លារ] ២០រៀល[ដុល្លារ]អី គឺអត់បាន គាត់រស់តាមយថាកម្ម។ ខ្លះទៅស្រុកទៅស្រែ ខ្លះក៏ចេះតែរស់មួយពេលៗទៅ ហើយអ៊ីចឹងមានផលលំបាកខ្លាំង»។
បុគ្គលិកកាស៊ីណូ Golden Planet មួយរូប ឈ្មោះ ឡេង ស្រីណឺត លើកឡើងនៅថ្ងៃពុធ ទី១១ ខែសីហានេះថា កញ្ញាគ្មានការងារធ្វើជាង២ខែមកហើយ បន្ទាប់ពីកាស៊ីណូត្រូវបិទទាំងស្រុងចាប់ពីខែឧសភាមក។ ស្រ្តីវ័យ២៥ឆ្នាំរូបនេះបន្ថែមថា គាត់កំពុងបារម្ភពីការចំណាយលើថ្លៃឈ្នួលបន្ទប់និងម្ហូបអាហារប្រចាំថ្ងៃ ខណៈគ្មានប្រាក់ចំណូលហើយពិបាកទៅរកការងារថ្មីធ្វើ ដោយសារជំងឺកូវីដ-១៩កំពុងឆ្លងរាលដាល។
កញ្ញា ស្រីណឺត និយាយថា៖ «ពិបាកដែរ ព្រោះអីបើសិនជាកូវីដច្រើនពេក ក៏វាពិបាករកការងារធ្វើដែរ។ គេក៏អត់ចង់ទទួលយើងចូលដែរ ព្រោះអីកាលណាយើងចេញហើយ យើងទៅកន្លែងផ្សេង ក៏គេមិនងាយទទួលយើងចូលដែរ ព្រោះអីគេខ្លាចឆ្លងពីយើងអ៊ីចឹង យើងមិនដឹងអ៊ីចឹងណា»។
បុគ្គលិកផ្នែកដូរលុយនៅកាស៊ីណូ Golden Planet មួយរូប ឈ្មោះ ជឿម ដាត់ ថ្លែងថា គាត់បានសម្រេចដាក់ពាក្យលាឈប់ពីការងារ ដើម្បីត្រឡប់មកនៅស្រុកកំណើតក្នុងខេត្តសៀមរាបវិញ នៅអំឡុងចុងខែកក្កដា បន្ទាប់ពីជាសះស្បើយពីជំងឺកូវីដ-១៩។ លោកថា អំឡុងពេលសម្រាកព្យាបាល លោកមិនទទួលប្រាក់ឧបត្ថម្ភពីក្រុមហ៊ុនកាស៊ីណូនោះទេ។
បុរសវ័យ២៧ឆ្នាំរូបនេះបន្ថែមថា លោកកំពុងប្រឈមបញ្ហាបំណុលធនាគារ៦ ០០០ដុល្លារ និងមិនទាន់អាចរកការងារអ្វីថ្មីបាន ក្រៅពីដាំដុះបន្លែនិងចិញ្ចឹមសត្វដោះស្រាយជីវភាពរស់នៅប្រចាំថ្ងៃ រង់ចាំរហូតដល់ការរីករាលដាលជំងឺផ្លូវដង្ហើមថ្មីអាចទប់ស្កាត់បានជាមុនសិន។
លោកនិយាយថា៖ «ឥលូវនៅផ្ទះ យើងនៅមើលម្តាយមើលអី គាត់ឈឺ គាត់អីដែរហ្នឹង! ហើយយើងឆ្លៀតដាំដំណាំដាំអីនៅផ្ទះ ធ្វើការផ្ទះសិន។ ធម្មតា ចិញ្ចឹមមាន់ ចិញ្ចឹមអី អត់ទាន់បានគិតថាទៅរកការងារឯណាទេ ដោយសារកំពុងតែកូវីដឆ្លងច្រើន ណាមួយសៀមរាបក៏កំពុងឆ្លងច្រើនដែរទៅ យើងក៏សម្រេចចិត្តនៅផ្ទះបណ្តោះអាសន្នសិន»។
បុគ្គលិកផ្នែកចុងភៅនៅកាស៊ីណូ ក្រេនដាយមិន លោក ញ៉ាន ភិរុណ និយាយថា លោកបាត់បង់ការងាររយៈពេល៣ខែមកហើយ ដែលធ្វើឱ្យលោកត្រូវប្រឈមមុខនូវការគ្មានប្រាក់ដោះបំណុលនិងសម្រាប់ចាយវាយប្រចាំថ្ងៃ។ បុរសកូនមួយវ័យ៣៥រូបនេះ បន្ថែមថា គាត់គ្រោងត្រឡប់ទៅស្រុកកំណើតក្នុងខេត្តបាត់ដំបង ដើម្បីធ្វើស្រែចម្ការរកចំណូលដោះស្រាយបញ្ហាជីវភាព ប៉ុន្តែដោយសារអាកាសធាតុមិនអំណោយផល ហើយមានការបិទខ្ទប់ការធ្វើដំណើរឆ្លងខេត្តចំនួន៨ លោកក៏សម្រេចបន្តរង់ចាំត្រឡប់ចូលធ្វើការតទៅទៀត។
លោក ភិរុណ និយាយថា៖ «តេទៅមេ គេថាមិនអីទេ! ចាំគេហៅ ចាំមានភ្ញៀវច្រើនសិន។ ក៏ប៉ុន្តែចាំៗមិនទាន់ឃើញថាពិតថ្ងៃណាខែណាផង! […] ខ្ញុំបារម្ភថា ទៅមុខទៀត បើបិទយូរ វាប៉ះពាល់ដល់ជីវភាពខ្ញុំដែរ បើសិនជាគេបិទ មិនបានទៅធ្វើការវិញ»។
អភិបាលរងក្រុងប៉ោយប៉ែត លោក កែវ តារារស្មី លើកឡើងថា កាស៊ីណូនៅក្រុងប៉ោយប៉ែតទាំងអស់ត្រូវបានផ្អាកដំណើរការជាបណ្តោះអាសន្នទាំងស្រុង និងមួយចំនួនកំពុងស្ថិតក្នុងតំបន់ក្រហមនៅឡើយ។ លោកបន្ថែមថា មានតែបុគ្គលិករដ្ឋបាលមួយចំនួនប៉ុណ្ណោះដែលនៅបន្តបំពេញការងារ។
ប្រភពដដែលបន្តថា លោកមិនអាចកំណត់ថា អាជីវកម្មល្បែងភ្នាល់នេះនឹងអាចបើកដំណើរការឡើងវិញនៅពេលណានោះទេ បើទោះជាស្ថានភាពឆ្លងក្នុងសហគមន៍ក្នុងក្រុងធ្លាក់ចុះពីរាប់សិបករណីក្នុងមួយថ្ងៃមកនៅក្រោម១០ករណីក្តី។ យ៉ាងណា លោកថា ចំពោះករណីនាំចូលដែលរកឃើញលើពលករត្រឡប់ពីថៃកំពុងធ្វើចត្តាឡីស័កនៅតាមមណ្ឌល គឺនៅមានអត្រាខ្ពស់នៅឡើយ។
លោក កែវ តារារស្មី មានប្រសាសន៍ថា៖ «ចំពោះការបើកវិញ មិនមែនជាសិទ្ធិរបស់រដ្ឋបាលក្រុងនោះទេ ជាសិទ្ធិរបស់ថ្នាក់ជាតិ។»
ពាក់ព័ន្ធនឹងកាលបរិច្ឆេទបើកដំណើរការអាជីវកម្មកាស៊ីណូឡើងវិញ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ថ្លែងថា ក្រសួងមិនមានសិទ្ធិសម្រេចឬក៏ស្នើលើកិច្ចការងារនេះនោះទេ។
លោកថា៖ «ក្នុងបទប្បញ្ញត្តិនានាពាក់ព័ន្ធដំណាក់កាលកូវីដ-១៩ គឺមានតែក្រសួងសុខាភិបាលទេដែលមានសិទ្ធិក្នុងការសម្រេចថាបិទឬបើកអាជីវកម្មណាមួយ»។
វីអូឌី មិនអាចទាក់ទងសុំការឆ្លើយតបពីអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានទេរហូតដល់ថ្ងៃទី១២ ខែសីហា ឆ្នាំ២០២១នេះ។
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា លើកឡើងថា ការផ្តល់ដំណោះស្រាយរបស់រដ្ឋាភិបាលចំពោះបុគ្គលិកកម្មករដែលរងផលប៉ះពាល់ដោយវិធានការទប់ស្កាត់ការឆ្លងរាលដាលជំងឺកូវីដ-១៩ គឺមិនបានគ្រប់ជ្រុងជ្រោយនៅឡើយ។
លោកបន្ថែមថា រដ្ឋាភិបាលមិនបានរាប់បញ្ចូលបុគ្គលិកក្នុងវិស័យកាស៊ីណូ សេវាកម្មកម្សាន្ត និងសេវាក្រៅប្រព័ន្ធផ្សេងៗទៀត ក្នុងវិស័យដែលទទួលបានប្រាក់ឧបត្ថម្ភ៧០ដុល្លារពីនិយោជកនិងរដ្ឋ ដូចជា វិស័យទេសចរណ៍និងវិស័យរោងចក្រកាត់ដេរនោះទេ។
លោក មឿន តុលា មានប្រសាសន៍ថា៖ «ជាសំណូមពរ ខ្ញុំគិតថា កម្មវិធីជំនួយសង្គមរបស់រដ្ឋនេះ គួរតែឆ្លើយតបឱ្យគ្រប់ជ្រុងជ្រោយ មានន័យថា មិនត្រូវបំភ្លេចចោលនូវក្រុមណាមួយនោះទេ ដែលគាត់រងផលប៉ះពាល់នៃវិបត្តិកូវីដ-១៩ហ្នឹងដែរ»។
មន្រ្តីសង្គមស៊ីវិលរូបនេះបន្តថា ក្រសួងសុខាភិបាលគួរតែពិនិត្យនិងសិក្សាមើលលទ្ធភាពឱ្យអាជីវកម្មកាស៊ីណូបើកទ្វារឡើងវិញ ដោយធ្វើឡើងក្រោមវិធានការបង្ការនិងការពារមេរោគឆ្លងដែលមានប្រសិទ្ធភាព ដើម្បីជួយកាត់បន្ថយភាពបាត់បង់ការងាររបស់ពលរដ្ឋ។ លោកបន្ថែមថា រដ្ឋាភិបាលក៏គួរត្រៀមគោលនយោបាយរយៈពេលវែងបង្កើតឱកាសការងារបណ្តោះអាសន្នដល់ពលរដ្ឋដែលមិនមានលទ្ធភាពរកការងារធ្វើបាន ដូចជាការងារក្នុងវិស័យកសិកម្មជាដើម។
រដ្ឋាភិបាលកម្ពុជាបានប៉ាន់ប្រមាណកាលពីខែកក្កដាថា ពលរដ្ឋប្រមាណ៨លាននាក់កំពុងប្រឈមហានិភ័យការងារដោយសារវិបត្តិជំងឺកូវីដ-១៩ ដែលកំពុងបង្កការខាតបង់ធ្ងន់ធ្ងរចំពោះសេដ្ឋកិច្ចប្រទេសកម្ពុជានិងពិភពលោក ក្នុងនោះ អាជីវកម្មពាក់ព័ន្ធវិស័យទេសចរណ៍ជិត៣ពាន់កន្លែង ដែលបណ្តាលឱ្យពលរដ្ឋជាង៤ម៉ឺន៥ពាន់នាក់ត្រូវបាត់បង់ការងារ៕
