អាជ្ញាធរខេត្តកោះកុង បានបញ្ជាឱ្យមន្ត្រីរបស់ខ្លួនចុះស្រាវជ្រាវករណីអតីតអធិការនគរបាលស្រុកស្រែអំបិលដាក់គ្រឿងចក្រឈូសឆាយដីព្រៃជិត១០០ហិកតា ស្ថិតនៅភូមិព្រាំង ឃុំដងពែង ស្រុកស្រែអំបិល។
នៅក្នុងសប្តាហ៍នេះ មានការផ្សព្វផ្សាយជាបន្តបន្ទាប់តាមបណ្តាញសង្គមហ្វេសប៊ុកថា អតីតអធិការនគរបាលស្រុកស្រែអំបិល លោក ម៉ា ទី បានដាក់គ្រឿងចក្រឈូសឆាយដីព្រៃប្រមាណ៨៧ហិកតាដោយគ្មានច្បាប់ ស្ថិតក្នុងភូមិព្រាំង ឃុំដងពែង ស្រុកស្រែអំបិល ខេត្តកោះកុង។
អភិបាលរងខេត្តកោះកុង លោក សុខ សុទ្ធី ប្រាប់ វីអូឌី នៅថ្ងៃពុធនេះថា ក្រោយទទួលបានព័ត៌មានពាក់ព័ន្ធការឈូសឆាយដីព្រៃនេះ ខាងរដ្ឋបាលខេត្តបានឱ្យមន្ត្រីចុះស្រាវជ្រាវរួចហើយ។ លោកថា ដីព្រៃដែលអតីតអធិការនគរបាលស្រុកស្រែអំបិល លោក ម៉ា ទី កំពុងឈូសឆាយនោះ គឺជាដីដែលគាត់បានទិញពីប្រជាពលរដ្ឋ និងមានការទទួលស្គាល់ពីអាជ្ញាធរមូលដ្ឋានត្រឹមត្រូវ។ ប៉ុន្តែលោកថា ការឈូសឆាយនោះមិនបានសុំច្បាប់ពីអាជ្ញាធរឡើយ។
លោកបន្ថែមថា៖ «ជាដីស្របច្បាប់ដែលគាត់បានប្រមូលទិញពីប្រជាពលរដ្ឋ មានការទទួលស្គាល់ពីអាជ្ញាធរកន្លងមក តាំងពីមុនពេលកាត់ឆ្វៀលទៅទៀត។ ប៉ុន្តែគ្រាន់តែថា ការឈូសឆាយហ្នឹង គាត់អត់បានសុំច្បាប់មកអាជ្ញាធរតែប៉ុណ្ណឹង។ ឥលូវយើងឱ្យគាត់ធ្វើការសុំច្បាប់ហើយ»។
វីអូឌី មិនអាចសុំការបញ្ជាក់បន្ថែមពីអតីតអធិការនគរបាលស្រុកស្រែអំបិល លោក ម៉ា ទី ដែលរងការចោទប្រកាន់នេះបានទេ នៅថ្ងៃពុធនេះ។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា ប្រសិនបើដីព្រៃដែលអតីតអធិការស្រុកស្រែអំបិលកំពុងធ្វើសកម្មភាពឈូសឆាយនោះជាដីទិញពីប្រជាពលរដ្ឋ ដោយមិនប៉ះពាល់តំបន់ការពារ វាមិនជាបញ្ហានោះទេ។
តែយ៉ាងណា លោក ហ៊ួរ អ៊ីន នៅតែមានការងឿងឆ្ងល់ថា ហេតុអ្វីបានជាបុគ្គលរូបនោះទទួលបានការកាន់កាប់ដីច្រើនតែម្នាក់ឯងបែបនេះ ខណៈដីព្រៃនៅឃុំដងពែងភាគច្រើនគឺពាក់ព័ន្ធនឹងដីអភិរក្សនិងតំបន់ប្រើប្រាស់ច្រើនយ៉ាងដងពែង។
លើសពីនេះ លោកថា ប្រជាពលរដ្ឋក្រីក្រមួយចំនួននៅទីនោះកំពុងខ្វះដីអាស្រ័យផល និងមួយចំនួនទៀតត្រូវជាប់ពន្ធនាគារនៅឡើយ ក្រោមការចោទប្រកាន់ថាបានទន្ទ្រានយកដីព្រៃតំបន់ការពារ។
លោកបន្ថែមថា៖ «អ្នកមានលុយមានអំណាច មានលទ្ធភាពកាន់កាប់ដីជិត១០០ហិកតា ខណៈពលរដ្ឋមួយចំនួននៅឃុំដងពែងនេះ សូម្បីតែដីភូមិរបស់ខ្លួនក៏មានការពាក់ព័ន្ធជាមួយដីការពារឬក៏ដីព្រៃប្រើប្រាស់ច្រើនយ៉ាងដងពែងដែរ។ អ៊ីចឹងយើងមើលឃើញថា ការអនុវត្តខុសគ្នារវាងអ្នកមានលុយនិងប្រជាពលរដ្ឋធម្មតា។ អ៊ីចឹងសូមឱ្យអាជ្ញាធរស្រាវជ្រាវនិងស៊ើបអង្កេតឱ្យបានច្បាស់លាស់ចំពោះករណីនេះ ដើម្បីឱ្យការអនុវត្តច្បាប់ឱ្យស្មើភាពគ្នា កុំអ្នកមានលុយមានអំណាចទទួលដីដ៏ច្រើនលើសលុបដោយមិនខ្វល់ពាក់ព័ន្ធនឹងដីតំបន់ការពារ»។
មន្រ្តីសង្គមស៊ីវិលរូបនេះលើកឡើងថា នៅខេត្តកោះកុងកើតមានបទល្មើសចាក់ដីរំលោភចូលឆ្នេរសមុទ្រ ការទន្ទ្រានយកដីព្រៃកោងកាង និងព្រៃតំបន់ការពារផ្សេងទៀតស្ទើរតែគ្រប់កន្លែង ហើយថា សកម្មភាពល្មើសទាំងនោះមិនត្រូវបានអាជ្ញាធរចាត់វិធានការច្បាប់តឹងរ៉ឹងទៅលើជនល្មើសទេ ជាពិសេសអ្នកមានលុយមានអំណាច ដែលធ្វើឱ្យបញ្ហានេះបន្តកើតមានឥតឈប់ឈរ។
សង្គមស៊ីវិលដដែលបានបង្ហាញការព្រួយបារម្ភពីការបាត់បង់យ៉ាងឆាប់រហ័សនូវទ្រព្យសម្បត្តិសាធារណៈរបស់រដ្ឋទាំងនោះ ប្រសិនបើអាជ្ញាធរពាក់ព័ន្ធបណ្តែតបណ្តោយ និងមិនចាត់វិធានការឱ្យបានតឹងរ៉ឹងចំពោះជនល្មើសនោះ៕
