សមត្ថកិច្ចស្រុកត្បូងឃ្មុំ ខេត្តត្បូងឃ្មុំ កំពុងស្វែងរកចាប់ខ្លួនយុវជនម្នាក់ដែលបានប្រើអំពើហិង្សាលើមន្ត្រីសុខាភិបាលម្នាក់ ខណៈដែលមន្ត្រីរូបនោះកំពុងបម្រើសេវាចាក់វ៉ាក់សាំងជូនប្រជាពលរដ្ឋ។
កាលពីថ្ងៃទី៣ ខែសីហា ឆ្នាំ២០២១ មន្ត្រីសុខាភិបាលម្នាក់ឈ្មោះ ហង្ស សេរីសំរិទ្ធី បានដាក់ពាក្យបណ្តឹងទៅប៉ុស្តិ៍នគរបាលឃុំបឹងព្រួល ឱ្យចាត់វិធានការច្បាប់ចំពោះយុវជនម្នាក់ឈ្មោះ លី សាន់សូរី ជាជនជាតិខ្មែរឥស្លាម ដោយចោទបុគ្គលរូបនេះថា បានប្រើអំពើហិង្សាលើខ្លួនអំឡុងពេលបម្រើសេវាចាក់វ៉ាក់សាំងជូនប្រជាពលរដ្ឋនៅមណ្ឌលសុខភាពបឹងព្រួល ស្ថិតនៅភូមិបាតដីក្រោម ឃុំបឹងព្រួល។
នាយប៉ុស្តិ៍នគរបាលបឹងព្រួល លោក ស៊ុន សុធា ប្រាប់ វីអូឌី នៅថ្ងៃព្រហស្បតិ៍នេះថា ក្រោយបង្កហេតុរួច ជនបង្កឈ្មោះ លី សាន់សូរី បានរត់គេចខ្លួន។ លោកថា ពេលនេះ សមត្ថកិច្ចកំពុងសហការជាមួយអាជ្ញាធរពាក់ព័ន្ធ ដើម្បីស្វែងរកចាប់ខ្លួនជនបង្កនោះមកផ្តទ្ទាទោសតាមច្បាប់។
លោកបន្ថែមថា៖ «ឥលូវយើងកំពុងសហការជាមួយលោកស្នងការ ដើម្បីស្រាវជ្រាវចាប់ជនបង្កហ្នឹង។ យើងបានប្រតិបត្តិការស្វែងរកគ្រប់ទីកន្លែង»។
មន្ត្រីសុខាភិបាល លោក ហង្ស សេរីសំរិទ្ធី បានរៀបរាប់ពីហេតុការណ៍ថា កាលពីថ្ងៃទី៣ ខែសីហានេះ លោកបានចុះប្រតិបត្តិការចាក់វ៉ាក់លើកទី២ ជូនប្រជាពលរដ្ឋនៅឃុំបឹងព្រួល ដោយលោកជាអ្នកចុះឈ្មោះនិងបញ្ចូលទិន្នន័យចំនួនអ្នកចាក់វ៉ាក់សាំង។
លោកបន្តថា ខណៈពេលលោកកំពុងចុះឈ្មោះនិងបញ្ចូលទិន្នន័យនោះ ប្រព័ន្ធបញ្ចូលទិន្នន័យមានការរអាក់រអួលធ្វើឱ្យការចុះឈ្មោះនិងការបញ្ចូលទិន្នន័យនោះមានភាពយឺតយ៉ាវ ហើយធ្វើឱ្យជនបង្កឈ្មោះ លី សាន់សូរី រង់ចាំយូរ និងបានប្រើអំពើហិង្សាលើរូបលោកតែម្តង។
លោកបន្ថែមថា៖ «បុរសឈ្មោះ លី សាន់សូរី បានស្រែកថាឱ្យខ្ញុំ ហើយបានខលទូរសព្ទ! លុះបន្តិចក្រោយមក មានឡានមួយគ្រឿងម៉ាកហាយឡេនឌ័របើកចូលមក ហើយម្ចាស់ឡានបានចុះមកជួបជាមួយបុគ្គលឈ្មោះ លី សាន់សូរី។ បន្ទាប់ពីជួបរួច បុគ្គលរូបនោះបានដើរចូលមកក្នុងកន្លែងចាក់វ៉ាក់សាំង ហើយបានវាយរូបខ្ញុំមួយដៃចំក្រោមថ្ងាស ហើយបានឡើងជិះឡានទៅបាត់»។
មន្ត្រីសុខាភិបាលរូបនេះអះអាងថា អ្នកដែលប្រើអំពើហិង្សាលើរូបលោកនោះ ជាសាច់ញាតិរបស់មន្ត្រីក្រុមប្រឹក្សាឃុំបឹងព្រួល ហើយមានចរិតក្រអឺតក្រទមកោងកាច។ លោក ហង្ស សេរីសំរិទ្ធី បានទាមទារទៅសមត្ថកិច្ចពាក់ព័ន្ធចាត់វិធានលើជនបង្កទៅតាមផ្លូវច្បាប់ឱ្យបានតឹងរ៉ឹង ដើម្បីព្រមានជននេះកុំឱ្យធ្វើបែបនេះបន្តទៀត។
វីអូឌី មិនអាចរកការឆ្លើយតបពីអាជ្ញាធរបឹងព្រួល និងជនបង្កចំពោះការចោទប្រកាន់នេះបានទេ នៅថ្ងៃនេះ។
មន្ត្រីឃ្លាំមើលការរំលោភសិទ្ធិមនុស្សនៃសមាគមអាដហុកប្រចាំខេត្តត្បូងឃ្មុំ និងខេត្តកំពង់ចាម លោក ឡេង សេងហ៊ាន មានប្រសាសន៍ថា ប្រសិនបើមានការប្រើហិង្សាលើមន្ត្រីសុខាភិបាលដូចការលើកឡើងមែន វាគឺជាទង្វើអសីលធម៌និងជាទង្វើខុសច្បាប់ ដែលអាជ្ញាធរពាក់ព័ន្ធត្រូវតែចាត់វិធានការលើជនបង្កឱ្យបានតឹងរ៉ឹង។
លោកបន្ថែមថា៖ «សម្រាប់ខ្ញុំគិតថា គ្រូពេទ្យគាត់ប្រហែលមិនចង់យឺតយ៉ាវទេ ប៉ុន្តែការងារវាច្រើន អ៊ីចឹងការយឺតយ៉ាវតិចតួច វាតែងតែកើតមានហើយ។ បើយើងអត់មានការយោគយល់ទេ អាហ្នឹងយើងមិនដឹងថា គាត់គិតយ៉ាងម៉េចទេ អ្នកបង្កបញ្ហាហ្នឹង! ការប្រព្រឹត្តបែបហ្នឹង វាខុស ហើយវាមិនត្រឹមត្រូវទេ ហើយណាមួយអំពើហ្នឹង វាខុសច្បាប់ទៀត»៕
