ក្រុមអង្គការសង្គមស៊ីវិលជំរុញទៅរដ្ឋាភិបាលត្រូវយកចិត្តទុកដាក់ជួយសង្គ្រោះដល់ពលករខ្មែរចំណាកស្រុកនៅប្រទេសថៃបន្ថែមទៀត និងអ្នកដែលកំពុងធ្វើដំណើរមកដល់ព្រំដែន ប៉ុន្តែត្រូវបានអាជ្ញាធរហាមមិនឱ្យឆ្លងដែនចូលទឹកដីកំណើតរបស់ខ្លួន ក្រោមហេតុផលទប់ស្កាត់ការឆ្លងជំងឺកូវីដ-១៩បំប្លែងថ្មី។
ការជំរុញនេះធ្វើឡើងបន្ទាប់ពីអ្នកប្រើប្រាស់បណ្តាញសង្គមហ្វេសប៊ុកមួយចំនួនបានចែករំលែករូបភាពតៗគ្នា នៅថ្ងៃទី៣ ខែសីហានេះថា អាជ្ញាធរថៃព្រមឱ្យពលករខ្មែរឆ្លងដែនត្រឡប់មកកម្ពុជាវិញ ប៉ុន្តែបែរជាអាជ្ញាធរកម្ពុជាបិទខ្ទប់មិនឱ្យពលរដ្ឋខ្លួនឆ្លងដែនចូលទឹកដីកំណើតរបស់ពួកគេនោះទេ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង សង្កេតឃើញថា អំឡុងពេលជួបវិបត្តិកូវីដ-១៩បំប្លែងថ្មី “ដែលតា” ធ្វើឱ្យពលករចំណាកស្រុកនៅប្រទេសថៃមួយចំនួនធ្វើដំណើរមកដល់ជាយដែនបម្រុងឆ្លងចូលទឹកដីកំណើតរបស់ខ្លួនវិញ ប៉ុន្តែត្រូវបានអាជ្ញាធរកម្ពុជាហាមមិនឱ្យចូលនោះទេ។
ករណីនេះ លោកថា បើរដ្ឋាភិបាលកម្ពុជាមិនយកចិត្តទុកដាក់ដោះស្រាយបញ្ហាប្រឈមជូនពួកគេឱ្យបានទាន់ពេលទេ នឹងធ្វើឱ្យពលករទាំងនោះជួបវិបត្តិសេដ្ឋកិច្ចគ្រួសារនិងបញ្ហាសុខភាពកាន់តែធ្ងន់ធ្ងរបន្ថែមទៀត។
លោកមានប្រសាសន៍ថា៖ «ការផ្តល់ជំនួយសង្គ្រោះ មិនចាំបាច់ថាគាត់[ពលករ]មកដល់កម្ពុជាទេ។ ឧបមាថា គាត់អត់ការងារធ្វើ ឱ្យជាអង្ករ ឱ្យជាស្បៀង ក៏អាចធ្វើបានដែរ តាមរយៈស្ថានទូត[កម្ពុជាប្រចាំនៅប្រទេសថៃ]។ រឿងទី២ បើសិនជាអ្នកដែលជ្រុលមកហើយ បើសិនជាអាចធ្វើបាន ក៏អាចផ្តល់ការអនុគ្រោះឱ្យគ្នា ហើយអាចដាក់នៅក្នុងមណ្ឌលចត្តាឡីស័កនៅតាមព្រំដែន កុំឱ្យរីករាលដាលទៅដល់អ្នកដទៃ»។
ទាក់ទិននឹងបញ្ហានេះដែរ មន្ដ្រីកម្មវិធីការពារសិទ្ធិពលករចំណាកស្រុកនៃអង្គការសង់ត្រាល់ លោក ឌី ថេហូយ៉ា មានប្រសាសន៍ថា មូលហេតុពលករខ្មែរចង់ត្រឡប់មកកម្ពុជាវិញ ដោយសារជំងឺកូវីដ-១៩បំប្លែងថ្មីនៅក្នុងប្រទេសថៃកំពុងរីករាលដាលខ្លាំង ធ្វើឱ្យពលករមួយចំនួនបាត់បង់ការងារ ខ្វះថវិកាផ្គត់ផ្គង់គ្រួសារ និងជួបបញ្ហាប្រឈមសុខភាព ជាដើម។
ករណីនេះ លោកជំរុញទៅរដ្ឋាភិបាលកម្ពុជាត្រូវសហការជាមួយភាគីថៃដោះស្រាយបញ្ហាប្រឈមជូនពលករចំណាកស្រុក និងអ្នកដែលត្រឡប់មកដល់ព្រំដែន ជាពិសេសត្រូវធ្វើមណ្ឌលចត្តាឡីស័កនៅតាមជាយដែនឱ្យបានច្រើន និងអនុវត្តវិធានការសុខាភិបាលឱ្យបានតឹងរ៉ឹង។
លោកមានប្រសាសន៍ថា៖ «បើសិនជាយើងរៀបចំនៅតាមជាយដែន មណ្ឌលចត្តាឡីស័កឱ្យបានច្រើន ហើយយើងអនុវត្តទៅតាមនិយាមសុវត្ថិភាពបានត្រឹមត្រូវ ខ្ញុំគិតថា វាមិនចេះតែឆ្លង ព្រោះមេរោគអស់នេះ វាអាចការពារបានដដែលទេ ឱ្យតែយើងរៀបចំការការពារឱ្យបានត្រឹមត្រូវ វាមិនចេះតែឆ្លងដូចយើងគិតនោះទេ»។
អ្នកនាំពាក្យក្រសួងការបរទេសកម្ពុជា លោក កុយ គួង ប្រាប់ វីអូឌី តាមប្រព័ន្ធតេឡេក្រាមនៅថ្ងៃអង្គារនះថា មន្ត្រីស្ថានអគ្គកុងស៊ុលកម្ពុជាប្រចាំខេត្តស្រះកែវ ប្រទេសថៃ កាលពីម្សិលមិញ បានចុះជួបសួរសុខទុក្ខពលករខ្មែរចំនួន២១៦នាក់ដែលបានធ្វើដំណើរពីខេត្តផ្សេងៗក្នុងប្រទេសនេះ និងចង់វិលមកកម្ពុជាវិញ។
លោកថា បច្ចុប្បន្ន ពលករខ្មែរទាំងនោះកំពុងជាប់នៅតាមព្រំដែនថៃ-កម្ពុជា ស្ថិតនៅស្រុកតាប្រាយ៉ា ខេត្តស្រះកែវ ទល់នឹងស្រុកថ្មពួក ខេត្តបន្ទាយមានជ័យ នៅឡើយ ដោយសារខេត្តបន្ទាយមានជ័យកំពុងបិទខ្ទប់ ដើម្បីទប់ស្កាត់ការរីករាលដាលជំងឺកូវីដ-១៩។ ប៉ុន្តែលោកថា មន្ត្រីស្ថានអគ្គកុងស៊ុលបានសហការជាមួយអាជ្ញាធរពាក់ព័ន្ធទាំងកម្ពុជា-ថៃ ដើម្បីដឹកជញ្ជូននិងរៀបចំកន្លែងស្នាក់នៅដែលមានសុវត្ថិភាពជូនពួកគាត់។
លោក កុយ គួង បន្តថា៖ «ក្នុងការចុះសួរសុខទុក្ខនេះ មន្ត្រីនៃស្ថានអគ្គកុងស៊ុលក៏បាននាំយកនូវស្បៀងអាហារមួយចំនួន និងមួយចំនួនទៀតជារបស់សប្បុរសជនខ្មែរនិងថៃ ជូនពួកគាត់ មានដូចជា នំបញ្ចុក បាយកញ្ចប់ អង្ករ ទឹកត្រី ទឹកស៊ីអ៊ីវ ត្រីខកំប៉ុង មីកញ្ចប់ ទឹកសុទ្ធ សម្រាប់ទទួលទាន និងរួមជាមួយម៉ាស់និងទឹកអាល់កុលលាងដៃសម្រាប់បង្ការការឆ្លងមេរោគកូវីដ-១៩ផងដែរ»។
លោក កុយ គួង បន្ថែមថា មន្ត្រីស្ថានអគ្គកុងស៊ុលកម្ពុជាក៏បានពន្យល់ណែនាំដល់ពួកគាត់ស្ដីពីការរឹតបន្ដឹងតាមបណ្ដោយព្រំដែនមួយរយៈ និងសុំឱ្យពួកគាត់មានការអត់ធ្មត់ និងជួយផ្សព្វផ្សាយបន្ដដល់ពលករដទៃទៀតកុំឱ្យមានការបម្លាស់ទីជាបណ្ដោះអាសន្ន ដើម្បីរាជរដ្ឋាភិបាលចាត់វិធានការការពារនិងទប់ស្កាត់ការរីករាលដាលនៃជំងឺកូវីដ-១៩ឱ្យបានប្រសើរជាមុនសិន។
ចំណែកអភិបាលរង និងជាអ្នកនាំពាក្យរដ្ឋបាលខេត្តបាត់ដំបង លោក សឿម ប៊ុនរិទ្ធ មានប្រសាសន៍ថា រដ្ឋាភិបាលកម្ពុជាសម្រេចបិទខ្ទប់មិនឱ្យពលករនិងពលរដ្ឋខ្មែរឆ្លងដែនចូលមកទឹកដីកំណើតរបស់ខ្លួន ដើម្បីទប់ស្កាត់ការនាំយកជំងឺកូវីដ-១៩បំប្លែងថ្មីចូលមកក្នុងសហគមន៍កម្ពុជា ខណៈជំងឺនេះកាចសាវហាវនិងចម្លងលឿនជាងជំងឺកូវីដ-១៩ធម្មតា។
ទោះបីជាបែបនេះក្តី អ្នកនាំពាក្យរូបនេះអះអាងថា អាជ្ញាធរកម្ពុជានៅតាមព្រំដែនក៏បានសហការជាមួយអាជ្ញាធរថៃ ហើយអាជ្ញាធរថៃបានរៀបចំកន្លែងចត្តាឡីស័កចំនួន៣ទីតាំងជូនពលករខ្មែរដែលបម្រុងឆ្លងដែនមកកម្ពុជាផងដែរ ។
លោកមានប្រសាសន៍ថា៖ «មិនមែនមានន័យថា ទៅរាំងខ្ទប់ប្រជាពលរដ្ឋទេ ប៉ុន្តែរយៈពេល១៤ថ្ងៃនេះ ទុកឱកាសដើម្បីឱ្យបណ្តាខេត្តជួរមុខនិងបណ្តាខេត្តជួរក្រោយ ឱ្យបានត្រៀមលក្ខណៈឱ្យបានច្បាស់លាស់សិន។ ហើយយើងបានធ្វើការជាមួយអាជ្ញាធរថៃ ហើយខាងថៃគេបានរៀបចំមណ្ឌលទទួលពលករឱ្យស្នាក់នៅមណ្ឌលចត្តាឡីស័កដែលគេបានរៀបចំដល់ទៅ៣កន្លែង។ បើដល់ពេលផុតរយៈពេល១៤ថ្ងៃដែលកម្ពុជាបិទខ្ទប់ភូមិសាស្ត្រ៨ខេត្តនេះ គឺនឹងបើកឱ្យចូលមកកម្ពុជាវិញហើយ»។
កាលពីចុងខែកក្កដា រដ្ឋាភិបាលកម្ពុជាបានសម្រេចបិទខ្ទប់ខេត្តចំនួន៨ រួមមាន ខេត្តបាត់ដំបង ប៉ៃលិន បន្ទាយមានជ័យ សៀមរាប ឧត្ដរមានជ័យ និងខេត្តព្រះវិហារ រយៈពេល១៤ថ្ងៃ ចាប់ពីថ្ងៃទី២៩ ខែកក្កដា រហូតដល់ថ្ងៃទី១២ ខែសីហា ដើម្បីទប់ស្កាត់ការនាំចូលមេរោគកូវីដ-១៩បំប្លែងថ្មីប្រភេទ”ដែលតា” ចូលទៅក្នុងសហគមន៍ បន្ទាប់ពីមានការកើនឡើងចំនួនអ្នកឆ្លងមេរោគកូវីដ-១៩បំប្លែងថ្មីនេះជាបន្តបន្ទាប់។
បើតាមក្រសួងសុខាភិបាល គិតចាប់តាំងពីថ្ងៃទី៣១ ខែមីនា ដល់ថ្ងៃទី០១ ខែសីហា ឆ្នាំ២០២១នេះ ក្រសួងបានរកឃើញករណីឆ្លងវីរុសបំប្លែងថ្មីប្រភេទ “ដែលតា” សរុបចំនួន២២៣ករណីហើយ។ ក្រសួងថា អ្នកជំងឺទាំងនោះជាពលករទើបនឹងត្រឡប់មកពីប្រទេសថៃ និងករណីឆ្លងចូលសហគមន៍នៅក្នុងរាជធានី-ខេត្តចំនួន១០ ខណៈនៅរាជធានីភ្នំពេញ ក្រសួងរកឃើញមានករណីឆ្លងជំងឺកូវីដ-១៩ បំប្លែងថ្មី ចំនួន៥ករណីផងដែរ៕
