អ្នកសារព័ត៌មានម្នាក់របស់អង្គភាពសារព័ត៌មាន CHRTV Online អះអាងថា ខ្លួនត្រូវជនមិនស្គាល់មុខទូរសព្ទគំរាមប្តឹងទៅតុលាការ ក្រោយពីផ្សព្វផ្សាយព័ត៌មានពាក់ព័ន្ធការទន្ទ្រានយកដីព្រៃរបស់រដ្ឋធ្វើកម្មសិទ្ធិ ស្ថិតក្នុងស្រុកជីក្រែង ខេត្តសៀមរាប។
ក្នុងខែកក្កដា ឆ្នាំ២០២១នេះ អង្គភាពសារព័ត៌មាន CHRTV Online បានផ្សព្វផ្សាយជាបន្តបន្ទាប់ ដោយចោទថា លោក គង់ វុន ជាថៅកែភ្លើងនៅស្រុកជីក្រែង ខេត្តសៀមរាប បានដាក់គ្រឿងចក្រឈូសឆាយដីព្រៃបម្រុងទុករបស់រដ្ឋអស់រាប់រយហិកតា ស្ថិតនៅក្នុងឃុំល្វែងឫស្សី ស្រុកជីក្រែង ដោយគ្មានការទប់ស្កាត់ពីអាជ្ញាធរពាក់ព័ន្ធ។
អគ្គនាយកទូរទស្សន៍ CHRTV Online លោក សួស ចំរើន ប្រាប់ វីអូឌី នៅថ្ងៃចន្ទនេះថា ក្រោយអង្គភាពរបស់លោកផ្សព្វផ្សាយរឿងនេះមក ក៏មានជនមិនស្គាល់មុខម្នាក់បានទូរសព្ទទៅលោក កាលពីថ្ងៃទី២៧ ខែកក្កដា ឆ្នាំ២០២១ ឱ្យបញ្ឈប់ការផ្សព្វផ្សាយរឿងបញ្ហាដីធ្លីនោះទៀត និងបានគំរាមប្តឹងលោកទៅតុលាការថែមទៀត។
លោក សួស ចំរើន បានចាត់ទុកការគំរាមប្តឹងលោកទៅតុលាការនេះ គឺជាការគំរាមកំហែងនិងជាបំភិតបំភ័យចំពោះអ្នកសារព័ត៌មានមិនឱ្យផ្សព្វផ្សាយរឿងអ្នកមានលុយមានអំណាចរំលោភយកដីធ្លីរបស់រដ្ឋធ្វើកម្មសិទ្ធិ។ លោកថា ជនមិនស្គាល់មុខដែលទូរសព្ទទៅគំរាមរូបលោកនោះ គឺម្តងប្រាប់ថាជាអ្នកសារព័ត៌មាន និងម្តងទៀតប្រាប់ថាជាបងធម៌របស់លោក គង់ វុន ដោយអះអាងថា ដីជាង១០០ហិកតាដែលលោក គង់ វុន កំពុងឈូសឆាយនោះជាដីដែលបានទិញពីប្រជាពលរដ្ឋ។
លោកបន្ថែមថា៖ «គេគំរាមខ្ញុំ ទី១ គេថា បើសិនជាអ្នកឯងមិនលុបចោលវិញទេ អ្នកឯងមានបញ្ហាហើយ។ ទី២ គេថា គេនឹងប្តឹងរឿងនេះទៅរដ្ឋមន្ត្រីក្រសួងព័ត៌មាន គេថាឈ្មោះខ្ញុំហ្នឹងមិនទាន់បានចុះបញ្ជីត្រឹមត្រូវក្នុងនាមជាអ្នកសារព័ត៌មានទេ។ ករណីនេះ ប្រសិនជាបងប្អូនអ្នកសារព័ត៌មានយើងមិនធ្លាប់បានឆ្លងកាត់ពាក់ព័ន្ធនឹងបញ្ហាហ្នឹងទេ គាត់នឹងមានការភ័យខ្លាច ប៉ុន្តែសម្រាប់អ្នកសារព័ត៌មាន គាត់មានមូលដ្ឋានគ្រឹះច្បាស់លាស់ គាត់មិនភ័យខ្លាចទេ ព្រោះវាជារឿងពិត»។
លោក សួស ចំរើន ឱ្យដឹងថា លោកបានថតសំឡេងសន្ទនារវាងលោកនិងជនមិនស្គាល់មុខទុកហើយ ប៉ុន្តែលោកសុំមិនបញ្ចេញឬចែកបន្តទេ ហើយក៏មិនទាន់ដាក់ពាក្យប្តឹងទៅសមត្ថកិច្ចនៅឡើយដែរ ដោយរង់ចាំមើលសកម្មភាពបន្តទៀតពាក់ព័ន្ធរឿងនេះ។
វីអូឌី បានសុំការឆ្លើយតបពីលោក គង់ វុន ដែលរងការចោទថាឈូសឆាយដីរដ្ឋនោះដែរ ប៉ុន្តែពុំអាចទាក់ទងបាន ដោយសារលេខទូរសព្ទនោះ ត្រូវបានស្ត្រីម្នាក់លើកដោយគ្រាន់តែបញ្ជាក់យ៉ាងខ្លីថា ខ្លួនគ្រាន់តែជាបុគ្គលិកនៅអគ្គិសនី គង់ វុន នៅឃុំប្រឡាយ ស្រុកជីក្រែង តែប៉ុណ្ណោះ។
អ្នកនាំពាក្យក្រសួងព័ត៌មាន លោក មាស សុភ័ណ្ឌ សុំមិនធ្វើអត្ថាធិប្បាយលើរឿងនេះទេ ដោយលោកថា មិនទាន់ទទួលបានព័ត៌មាននិងរង់ចាំតាមដានសិន។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លោក ណុប វី បានចាត់ទុកករណីនេះថា ជាការគំរាមកំហែងធ្វើឱ្យប៉ះពាល់ធ្ងន់ធរទៅដល់ការអនុវត្តការងារ តួនាទី ភារកិច្ច និងសេរីភាពសារព័ត៌មាន ដែលមានចែងនិងគាំទ្រដោយច្បាប់អន្តរជាតិនិងរដ្ឋធម្មនុញ្ញកម្ពុជា។
លោក ណុប វី បន្ថែមថា ការគំរាមកំហែងនេះបានបង្ហាញជាថ្មីទៀតថា មន្ត្រីឬក្រុមអ្នកប្រព្រឹត្តបទល្មើសដែលគំរាមកំហែងទៅលើអ្នកសារព័ត៌មានតាមរូបភាពផ្សេងៗនោះ នៅតែមិនទាន់ត្រូវបានចាត់វិធានការឬផ្តន្ទាទោសដោយសមត្ថកិច្ចឬតុលាការនៅឡើយ។
លោក ណុប វី ឱ្យដឹងថា តាមកំណត់ត្រា គឺរយៈពេល៦ខែឆ្នាំ២០២១នេះ មានអ្នកសារព័ត៌មានជាង៣០រូបបានរងការគំរាមកំហែងនិងរូបភាពវាយប្រហារផ្សេងៗ។
លោកបន្ថែមថា៖ «អ៊ីចឹងយើងពិនិត្យឃើញថា ការគំរាមកំហែងហើយនិងការប្រើប្រាស់រូបភាពផ្សេងៗមកលើអ្នកព័ត៌មានហ្នឹង គឺនៅតែបន្តកើតមានឡើង ដែលធ្វើឱ្យយើងមានការព្រួយបារម្ភ ហើយយើងនៅតែទទូចឱ្យសមត្ថកិច្ចនិងតុលាការ គឺត្រូវតែតាមដានឃ្លាំមើល ហើយនិងចាត់វិធានការចំពោះបទល្មើសទាំងឡាយប្រឆាំងជាមួយអ្នកសារព័ត៌មាន»។
អង្គការអ្នកកាសែតគ្មានព្រំដែន កាលពីពេលថ្មីៗនេះ បានបន្តផ្តល់ចំណាត់ថ្នាក់សេរីភាពសារព័ត៌មាននៅកម្ពុជា ឆ្នាំ២០២១ ស្ថិតនៅក្នុងរូបភាពអាក្រក់ដដែល ដោយនៅលេខរៀងទី១៤៤ ក្នុងចំណោម១៨០ប្រទេសនៅលើពិភពលោក។
សេរីភាពសារព័ត៌មានដែលអង្គការនេះវាយតម្លៃ បង្ហាញថា កម្ពុជាបានធ្លាក់ចុះ៣ឆ្នាំជាប់ៗគ្នាចាប់តាំងពីឆ្នាំ២០១៧មក ពោលគឺចំណាត់ថ្នាក់លេខ១៤២ នៅឆ្នាំ២០១៨ ចំណាត់ថ្នាក់លេខ១៤៣ នៅឆ្នាំ២០១៩ និងចំណាត់ថ្នាក់លេខ១៤៤ នៅឆ្នាំ២០២០និងឆ្នាំ២០២១នេះ៕
