ពលរដ្ឋមួយចំនួននៅឃុំព្រៃតូច ស្រុកមោងឫស្សី ខេត្តបាត់ដំបង បារម្ភពីការបាត់បង់ដីធ្លី និងបានស្នើឱ្យមានការដោះស្រាយ ខណៈអាជ្ញាធរបោះបង្គោលកំណត់តំបន់ការពារព្រៃលិចទឹក ប៉ះពាល់លើដីអាស្រ័យផលរបស់ពួកគេជាច្រើនហិកតា។
ពាក់ព័ន្ធនឹងករណីនេះដែរ ពលរដ្ឋប្រហែល៥០នាក់នៅឃុំព្រៃតូចនេះ ក៏បានប្រមូលផ្តុំគ្នាតវ៉ានៅលើដីកំពុងមានជម្លោះកាលពីថ្ងៃម្សិលមិញដែរ ដោយពួកគេបានអំពាវនាវទៅប្រមុខរដ្ឋាភិបាលឱ្យដោះស្រាយ ដើម្បីឱ្យពួកគេបានបន្តកាន់កាប់និងអាស្រ័យផល។
លោក ធា ពិសិដ្ឋ រស់នៅភូមិព្រៃដំរី ឃុំព្រៃតូច ប្រាប់ វីអូឌី ថា ថ្មីៗនេះ អាជ្ញាធរពាក់ព័ន្ធនៅខេត្តបាត់ដំបងបានចុះបោះបង្គោលថ្មី ដើម្បីកំណត់ព្រំតំបន់ការពារព្រៃលិចទឹក ដោយប៉ះពាល់ដីស្រែប្រហែល៥០០ហិកតារបស់ប្រជាពលរដ្ឋជាង៥០គ្រួសារ។
លោក ធា ពិសិដ្ឋ ដែលអះអាងថា ដីរបស់ខ្លួនបានរងផលប៉ះពាល់១២ហិកតាពីការវាស់ព្រំដីនេះ និយាយបន្តថា ពលរដ្ឋមួយចំនួនបានចូលអាស្រ័យផលនិងទិញតគ្នាជាបន្តបន្ទាប់តាំងឆ្នាំ១៩៩០ ដោយពលរដ្ឋខ្លះធ្វើស្រែប្រាំង ដាំពោត និងដំណាំកសិកម្មផ្សេងទៀត។
លោកថា កាលពីឆ្នាំ២០១១ អាជ្ញាធរពាក់ព័ន្ធបានចុះបោះបង្គោលកំណត់ព្រំតំបន់ការពារព្រៃលិចទឹកនេះរួចម្តងមកហើយ ដោយមិនប៉ះពាល់ដីប្រជាពលរដ្ឋដែលកំពុងអាស្រ័យផលឡើយ ប៉ុន្តែការបោះបង្គោលកំណត់ព្រំនៅឆ្នាំ២០២១នេះ គឺហួសកន្លែងចាស់ជាង២គីឡូម៉ែត្រ ដែលធ្វើឱ្យប៉ះពាល់ដល់ដីពលរដ្ឋជាច្រើនហិកតាបែបនេះ។
លោកបន្ថែមថា៖ «ពួកខ្ញុំបារម្ភខ្លាចអាជ្ញាធរហាមឃាត់មិនឱ្យពួកខ្ញុំធ្វើអាស្រ័យផល ពីព្រោះដីហ្នឹងមួយចំនួនមានប្លង់ និងមួយចំនួនទៀតមានលិខិតបញ្ជាក់ការកាន់កាប់ដីធ្លី។ ពួកយើងសុំឱ្យគាត់ដាក់នៅកន្លែងបង្គោលចាស់ដែលអាជ្ញាធរបានបោះកាលពីឆ្នាំ២០១១ កុំឱ្យមានការរំកិលបង្គោលមកលើទៀត។ យើងសុំតែប៉ុណ្ណឹងទេ។»
ពលរដ្ឋម្នាក់ទៀតរស់នៅភូមិកូនខ្លុង លោក ម៉ន រេព និយាយថា ប្រសិនបើអាជ្ញាធរដកហូតយកដីនោះវិញ នឹងធ្វើឱ្យប្រជាពលរដ្ឋមានបញ្ហាជីវភាព ដោយសារគ្មានដីសម្រាប់បង្កបង្កើនផល ហើយថា ប្រជាពលរដ្ឋមួយចំនួនបានយកប្លង់ដីនោះទៅបញ្ចាំនៅធនាគារសម្រាប់ខ្ចីលុយយកមករកស៊ីផ្សេងៗក៏មានដែរ។
ពលរដ្ឋរូបនេះអះអាងថា ដីដែលអាជ្ញាធរបោះបង្គោលព័ទ្ធយកនោះជាដីវាលគ្មានព្រៃនោះទេ ហើយប្រជាពលរដ្ឋបានកាន់កាប់និងអាស្រ័យផលលើដីនោះជិត៣០ឆ្នាំទៅហើយ។
លោកបន្ថែមថា៖ «ប៉ះពាល់ធ្ងន់ធ្ងរណាស់ ដូចខ្ញុំបានយកប្លង់ដីហ្នឹងទៅបញ្ចាំនៅធនាគាររយៈពេល១០ឆ្នាំ ហើយប្រជាពលរដ្ឋបានដីស្រែហ្នឹងហើយសម្រាប់ធ្វើកសិកម្ម ប្រកបមុខរបរចិញ្ចឹមជីវិត និងបានយកដីស្រែនោះទៅដាក់នៅធនាគារដើម្បីបានទុនទៅរកស៊ីនេះទៅរកស៊ីនោះ។ ដល់ពេលអស់ដីហ្នឹង តើប្រជាពលរដ្ឋមានអីទៀត?»
មេឃុំព្រៃតូច អ្នកស្រី សុខ សុខា មានប្រសាសន៍ថា តាមព័ត៌មានដែលអ្នកស្រីទទួលបានពីថ្នាក់លើ គឺការបោះបង្គោលថ្មី ដើម្បីកំណត់ព្រំតំបន់ការពារព្រៃលិចទឹកនេះ ធ្វើទៅតាមអនុក្រឹត្យលេខ១២៧ កាលពីឆ្នាំ២០១១។ អ្នកស្រីមិនច្បាស់ពីទំហំដីសរុបដែលប៉ះពាល់ទេ ប៉ុន្តែសម្រាប់ប្រជាពលរដ្ឋវិញ អ្នកស្រីថា មាន៥២គ្រួសារប៉ុណ្ណោះ។
មេឃុំរូបនេះក៏មិនច្បាស់ថា ដីប្រជាពលរដ្ឋដែលរងផលប៉ះពាល់នោះជាដីមានបណ្ណកម្មសិទ្ធិឬយ៉ាងណាដែរ ដោយសារអ្នកស្រីទើបឡើងកាន់តំណែងជាមេឃុំថ្មី។
ប៉ុន្តែយ៉ាងណា ជុំវិញបញ្ហានេះ អ្នកស្រីបានធ្វើរបាយការណ៍រួចហើយ ហើយនឹងដាក់ជូនអភិបាលស្រុកពិនិត្យមើលនៅថ្ងៃសុក្រនេះ ដើម្បីមានវិធានការដោះស្រាយ។
អ្នកស្រីបន្ថែមថា៖ «ខ្ញុំអត់ជាក់លាក់រឿងបោះបង្គោលហ្នឹងទេ។ ការបោះកាលពីឆ្នាំ២០១១ហ្នឹង ខ្ញុំនៅជាក្រុមប្រឹក្សាឃុំនៅឡើយ មិនមែនជាមេឃុំដូចឥលូវនេះទេ។ ការបោះកាលហ្នឹងមានការចូលរួមតែលោកមេឃុំចាស់ លោកអភិបាលស្រុក មានជលផល និងមន្ត្រីមន្ទីរធនធានទឹក និងប្រជាពលរដ្ឋមួយចំនួន។ ឥលូវយើងកំពុងរង់ចាំមើលថ្នាក់លើថាគាត់មានចំណាត់ការអីក្នុងការដោះស្រាយរឿងនេះ»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត សង្កេតឃើញថា កន្លងមក បញ្ហាជម្លោះដីធ្លីកើតឡើងដោយសារអាជ្ញាធរពាក់ព័ន្ធមួយចំនួនបានគប់គិតគ្នាជាមួយក្រុមហ៊ុនឬមន្ត្រីមានលុយមានអំណាចរំលោភយកដីពលរដ្ឋ។
ចំពោះរឿងជម្លោះដីធ្លីនៅស្រុកមោងឫស្សី ខេត្តបាត់ដំបងនេះ លោក វណ្ណ សុផាត បានស្នើដល់ប្រជាពលរដ្ឋឱ្យដាក់លិខិតទៅគណៈកម្មការដោះស្រាយវិវាទដីធ្លីទាំងថ្នាក់ខេត្ត ឬថ្នាក់ជាតិ និងតុលាការផងដែរ ដើម្បីរកអន្តរាគមន៍ជួយដោះស្រាយ។ លោកថា បើសិនអាជ្ញាធរមិនដោះស្រាយជូនពលរដ្ឋទេ វានឹងរំលោភលើសិទ្ធិទទួលបានការកាន់កាប់ដីធ្លីរបស់ពួកគេ។
លោកបន្ថែមថា៖ «មិនមែនយកក្នុងអំឡុងពេលកូវីដ-១៩ហ្នឹង មិនឱ្យពួកគាត់តវ៉ាដីធ្លី ហើយឆ្លៀតពេលហ្នឹងទៅបោះបង្គោលព្រំយកដីពលរដ្ឋ អាហ្នឹងរំលោភសិទ្ធិមនុស្សធ្ងន់ធ្ងរណាស់ ដែលរដ្ឋាភិបាល ជាពិសេសប្រមុខដឹកនាំរដ្ឋាភិបាល ត្រូវតែចាត់វិធានការចំពោះមន្ត្រីដែលឆ្លៀតឱកាសគប់គិតយកដីប្រជាពលរដ្ឋហ្នឹង ត្រូវចាត់វិធានការច្បាប់ឱ្យតឹងរ៉ឹង»៕
