ក្រសួងទេសចរណ៍ណែនាំឱ្យផ្អាកសកម្មភាពរមណីយដ្ឋានទេសចរណ៍នៅទូទាំងប្រទេសជាបណ្តោះអាសន្នរយៈពេល១៤ថ្ងៃ ដោយចាប់ផ្តើមពីថ្ងៃនេះទៅ ដើម្បីចូលរួមយុទ្ធនាការពង្រឹងវិធានការប្រយុទ្ធនិងទប់ស្កាត់ការឆ្លងរាលដាលជំងឺកូវីដ-១៩។
ក្នុងលិខិតផ្ញើជូនប្រធានមន្ទីរទេសចរណ៍រាជធានី-ខេត្តនៅថ្ងៃនេះ រដ្ឋមន្ត្រីក្រសួងទេសចរណ៍ លោក ថោង ខុន បានណែនាំទៅមន្ត្រីរបស់ខ្លួនឱ្យសហការជាមួយរដ្ឋបាលរាជធានី-ខេត្តនិងអាជ្ញាធរមូលដ្ឋាន ក្នុងការផ្អាកសកម្មភាពរមណីយដ្ឋានទេសចរណ៍ គោលដៅទេសចរណ៍ សហគមន៍ទេសចរណ៍ និងកន្លែងដែលមានសក្តានុពលទេសចរណ៍ទូទាំងប្រទេសជាបណ្តោះអាសន្ន ចាប់ពីថ្ងៃទី២៩ ខែកក្កដា ដល់ថ្ងៃទី១២ ខែសីហា ឆ្នាំ២០២១ ជាកំហិត។
រដ្ឋមន្ត្រីរូបនេះក៏បានណែនាំទៅមន្ទីរទេសចរណ៍រាជធានី-ខេត្ត ត្រូវចាត់តាំងក្រុមការងារដើម្បីត្រួតពិនិត្យកិច្ចការនេះឱ្យបានម៉ត់ចត់ ដោយមិនត្រូវអនុញ្ញាតឱ្យមានសកម្មភាពទេសចរណ៍ណាមួយនៅទីតាំងទេសចរណ៍ទាំងអស់ដែលមាននៅក្នុងមូលដ្ឋានរបស់ខ្លួន ក្នុងអំឡុងពេលផ្អាកនេះឡើយ។
នៅថ្ងៃនេះដែរ អាជ្ញាធរជាតិអប្សរា និងគ្រឹះស្ថានអង្គរ ក៏ចេញសេចក្តីជូនដំណឹងរួមមួយស្តីពីការបិទការទស្សនាប្រាសាទនានា និងផ្អាកការលក់សំបុត្រចូលទស្សនាក្នុងរមណីយដ្ឋានអង្គរក្នុងខេត្តសៀមរាប ចាប់ពីថ្ងៃទី៣០ ខែកក្កដា ដល់ថ្ងៃទី១២ ខែសីហា ឆ្នាំ២០២១ ផងដែរ។
សេចក្តីជូនដំណឹងនោះបន្តថា ការសម្រេចនេះគឺធ្វើឡើងអនុលោមតាមសេចក្តីសម្រេចរបស់រដ្ឋាភិបាល ចុះថ្ងៃទី២៨ ខែកក្កដា ឆ្នាំ២០២១ ស្តីពីការបិទខ្ទប់ភូមិសាស្ត្រខេត្តកោះកុង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្ដរមានជ័យ ព្រះវិហារ និងសៀមរាប ដើម្បីទប់ស្កាត់ការឆ្លងរាលដាលវីរុសកូវីដ-១៩បំប្លែងថ្មីប្រភេទ Delta នៅក្នុងសហគមន៍។
តាមរបាយការណ៍ពីក្រសួងសុខាភិបាល នៅថ្ងៃទី២៧ ខែកក្កដា ឆ្នាំ២០២១ កម្ពុជាបានរកឃើញវីរុស “ដែលតា” នៅសប្តាហ៍នេះ ចំនួន៣៩ករណី ដោយក្នុងនោះ ឆ្លងក្នុងសហគមន៍មាន៨ករណី ដោយ៥ករណីរកឃើញក្នុងខេត្តឧត្ដរមានជ័យ ២ករណីក្នុងខេត្តសៀមរាប និង១ករណីក្នុងខេត្តកំពង់ធំ។
ការរកឃើញថ្មីនេះ ធ្វើឱ្យតួលេខឆ្លងវីរុសកូវីដ-១៩ ប្រភេទ “ដែលតា” បានកើនដល់១៥៣ករណី ដោយគិតចាប់ពីការរកឃើញដំបូងចំនួន៣ករណី នៅថ្ងៃទី២៩ ខែមីនា ឆ្នាំ២០២១។
កាលពីខែមេសា ឆ្នាំ២០២១ ក្រសួងទេសចរណ៍ ធ្លាប់បានប្រកាសផ្អាកដំណើរការរមណីយដ្ឋានទេសចរណ៍ទូទាំងប្រទេសជាបណ្តោះអាសន្នម្តងរួចមកហើយ ដើម្បីទប់ស្កាត់ការឆ្លងរាលដាលជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ និងបានអនុញ្ញាតឱ្យដំណើរការឡើងវិញជាបណ្តើរៗនៅចុងខែឧសភា ដោយតម្រូវឱ្យអនុវត្តយ៉ាងម៉ត់ចត់នូវវិធានការការពារ “៣កុំ ៣ការពារ” រួមជាមួយវិធានសុវត្ថិភាពទេសចរណ៍ក្នុងការទប់ស្កាត់ជំងឺផ្លូវដង្ហើមមួយនេះ៕