តុលាការខេត្តឧត្ដរមានជ័យ ចេញដីកាបង្គាប់ឱ្យពលរដ្ឋចំនួន១៣នាក់ចូលខ្លួនឆ្លើយបំភ្លឺនៅសប្តាហ៍ក្រោយ ពាក់ព័ន្ធការរុករានទន្ទ្រានកាន់កាប់ដីព្រៃរបស់រដ្ឋដោយខុសច្បាប់។
កាលពីថ្ងៃទី១៤ ខែកក្កដានេះ ចៅក្រមស៊ើបសួរសាលាដំបូងខេត្តឧត្ដរមានជ័យ លោក យិន វិសិដ្ឋ បានចេញដីកាបង្គាប់ឱ្យពលរដ្ឋចំនួន១៣នាក់ រួមមាន លោក ប្រម រី, លោក ឡាត ភូត, លោក ឡា ខន, លោក ឡុញ សុភាព, ឡោក ឆោម រ៉ា, លោក ឡា ដាង និងពលរដ្ឋផ្សេងទៀត រស់នៅសង្កាត់កូវក្រៀល ក្រុងសំរោង ចូលទៅបំភ្លឺនៅសាលាដំបូង នៅថ្ងៃទី៣ ខែសីហា ឆ្នាំ២០២១ ដើម្បីសាកសួរនិងឆ្លើយបំភ្លឺជុំវិញសំណុំរឿងកាប់រានដីព្រៃ ឈូសឆាយដីព្រៃ និងហ៊ុមព័ទ្ធកាន់កាប់ដីព្រៃ កាលពី៥ខែមុន ស្ថិតនៅភូមិស្រះកែវ ឃុំពង្រ ស្រុកចុងកាល់ ខេត្តឧត្ដរមានជ័យ។
ក្នុងដីកាដដែលនេះ តុលាការក៏បានដាក់ឱ្យពលរដ្ឋទាំង១៣នាក់នោះស្ថិតក្រោមការត្រួតពិនិត្យពីបទ «កាប់រានព្រៃ ឈូសឆាយដីព្រៃ និងហ៊ុមព័ទ្ធកាន់កាប់ដីព្រៃ» ដោយគ្មានច្បាប់អនុញ្ញាត។
លោក ឡាត ភួត រស់នៅភូមិតាម៉ាន សង្កាត់កូនក្រៀល ប្រាប់ វីអូឌី នៅថ្ងៃអង្គារនេះថា តុលាការបានកោះហៅរូបគាត់ឱ្យចូលបំភ្លឺ៣ដងរួចមកហើយ ប៉ុន្តែលោកបានដាក់ពាក្យសុំពន្យារពេលចូលបំភ្លឺរហូត ដោយសាររកមេធាវីជួយការពារក្តីមិនទាន់បាន។
ពលរដ្ឋរូបនេះបន្តថា សម្រាប់ការកោះហៅលើកនេះ ពួកគាត់ទាំង១៣នាក់នឹងចូលទៅបំភ្លឺចំពោះមុខតុលាការទាំងអស់គ្នា ដោយថា ពួកគាត់មិនបានប្រព្រឹត្តកំហុសដូចការចោទប្រកាន់ឡើយ។ លោកថា ដីស្រែនិងដីចម្ការនោះ គឺគ្រួសារលោកបានចូលទៅអាស្រ័យផលតាំងពីឆ្នាំ១៩៩៩ រហូតមកទល់បច្ចុប្បន្ននេះ។
លោកបន្ថែមថា៖ «ដីខ្ញុំអាស្រ័យផលខ្លួនឯង គាត់មកចោទអ៊ីចឹងម៉េចកើត! បើដីហ្នឹង ខ្ញុំចូលទៅអាស្រ័យផលតាំងពីឆ្នាំ១៩៩៩។ ពួកខ្ញុំបានដាំដុះ គាត់មកកាប់ដំណាំរបស់ពួកខ្ញុំចោល ពួកខ្ញុំតវ៉ាឱ្យជួយរកដំណោះស្រាយដល់ពួកខ្ញុំ បែរជាចេញដីកាកោះហៅឱ្យពួកខ្ញុំទៅឆ្លើយបំភ្លឺទៅវិញ។ ពេលដែលខ្ញុំទៅឆ្លើយបំភ្លឺ ខ្ញុំនឹងឆ្លើយថា ខ្ញុំអត់មានបានទៅទន្ទ្រានដីព្រៃនៅណាផង! ណាមួយគាត់ចោទខ្ញុំនេះ អត់មានភស្ភុតាងអីច្បាស់លាស់ផង»។
លោក ប្រម រី ដែលត្រូវបានតុលាការកោះហៅឱ្យចូលឆ្លើយបំភ្លឺម្នាក់ទៀត បានស្នើសុំទៅតុលាការកុំឱ្យចាត់ការលើបណ្តឹងប្រឆាំងពួកគាត់ពាក់ព័ន្ធនឹងជម្លោះដីធ្លីនេះ។ លោកថា គ្រួសារលោកមានដីប្រហែល៥ហិកតាសម្រាប់ធ្វើស្រែនិងដាំដំឡូងមី ដើម្បីចិញ្ចឹមជីវិត ដោយពុំមានដីកន្លែងផ្សេងទៀតសម្រាប់បង្កបង្កើនផលឡើយ។
បញ្ហានេះ លោកបានស្នើដល់អាជ្ញាធរចុះវាស់វែងដីធ្លីនោះនិងចេញបណ្ណកម្មសិទ្ធិជូនពលរដ្ឋ ហើយបញ្ឈប់ការគំរាមកំហែងចាប់ខ្លួនពលរដ្ឋដាក់ពន្ធនាគារបន្តទៀត។
លោកបន្ថែមថា៖ «ក្នុងដីកាហ្នឹង គេចោទខុសទេ! ដីពួកខ្ញុំអាស្រ័យផលហ្នឹងនៅភូមិតាម៉ាន ប៉ុន្តែក្នុងដីកា គេចោទខ្ញុំថា ទន្ទ្រានដីព្រៃនៅចុងវាំងនោះវិញ អ៊ីចឹងសុំកុំឱ្យតុលាការចាត់ការលើបណ្តឹងហ្នឹងប្រឆាំងពួកខ្ញុំអី»។
អភិបាលខេត្តឧត្ដរមានជ័យ លោក ប៉ែន កុសល មានប្រសាសន៍ថា រឿងពលរដ្ឋជាប់បណ្តឹងនៅតុលាការពាក់ព័ន្ធរុករានដីព្រៃដោយខុសច្បាប់ឬយ៉ាងណានោះ វាជាសមត្ថកិច្ចរបស់តុលាការ ដែលអាជ្ញាធរខេត្តមិនអាចលូកដៃបានឡើយ។
លោកបន្ថែមថា៖ «គោលការណ៍របស់ខេត្ត ក៏ដូចជារដ្ឋាភិបាលយើង មានត្រៀមដីសម្រាប់បែងចែកជាដីសង្គមកិច្ចឱ្យពួកគាត់អត់ឬខ្វះខាតដីមែន ប៉ុន្តែប្រសិនបើពួកគាត់ចូលទៅទន្ទ្រានយកដីរដ្ឋខុសច្បាប់ អាហ្នឹងរឿងផ្សេងមួយទៀត ដែលមានទោសទណ្ឌពាក់ព័ន្ធនឹងផ្លូវច្បាប់»។
មន្រ្តីការពារសិទ្ធិមនុស្សសមាគមអាដហុកប្រចាំខេត្តឧត្ដរមានជ័យ លោក ស្រី ណារ៉េន មានប្រសាសន៍ថា ការកោះហៅពលរដ្ឋ១៣នាក់ឱ្យចូលបំភ្លឺនេះ គឺចោទខុសទីតាំងដីមានជម្លោះ។ លោកថា ដីដែលប្រជាពលរដ្ឋចូលទៅអាស្រ័យផលនោះ ជាអតីតដីរបស់ក្រុមហ៊ុន អង្គរស៊ូហ្គឺ (Angkor Sugar) ស្ថិនៅភូមិតាម៉ាន សង្កាត់កូនក្រៀល ក្រុងសំរោង ប៉ុន្តែក្នុងដីកាចោទថា ប្រជាពលរដ្ឋទន្ទ្រានយកដីព្រៃ ប្រព្រឹត្តនៅភូមិស្រះកែវ ឃុំពង្រ ស្រុកចុងកាល់ ខេត្តឧត្ដរមានជ័យ ទៅវិញ។
មន្ត្រីសិទ្ធិមនុស្សរូបនេះឱ្យដឹងថា រហូតមកដល់ពេលនេះ រូបលោកក៏ដូចជាប្រជាពលរដ្ឋមិនទាន់ដឹងថា អ្នកណាជាដើមបណ្តឹងនៅឡើយទេ។ លោកបន្ថែមទៀតថា ខាងលោកនឹងជួបពិភាក្សាជាមួយប្រជាពលរដ្ឋ ដើម្បីផ្តល់មេធាវីជួយការពារក្តីជូនពួកគាត់។
លោកបន្ថែមថា៖ «ចំណុចដែលតុលាការចោទពួកគាត់ថា កាប់រានព្រៃ ឈូសឆាយដីព្រៃ និងហ៊ុមព័ទ្ធកាន់កាប់ដីព្រៃហ្នឹង វាអត់ត្រូវចំកន្លែងដីមានជម្លោះទេ។ ប្រជាពលរដ្ឋនៅភូមិតាម៉ានហ្នឹង គាត់ថា ពួកគាត់អត់ស្គាល់ចំណុចហ្នឹងទេ អ៊ីចឹងការចោទពួកគាត់នៅចំណុចហ្នឹង វាអត់ត្រូវទេ»។
កាលពីខែឧសភា ឆ្នាំ២០២១ ប្រជាពលរដ្ឋជាង១០០គ្រួសារ រស់នៅក្រុងសំរោង ខេត្តឧត្ដរមានជ័យ បានអំពាវនាវទៅអាជ្ញាធរពាក់ព័ន្ធជួយដោះស្រាយវិវាទដីធ្លីរបស់ពួកគាត់ និងស្នើសុំទៅតុលាការកុំឱ្យចាត់ការលើបណ្តឹងប្រឆាំងពលរដ្ឋ២នាក់ពាក់ព័ន្ធនឹងជម្លោះដីធ្លីនេះផងដែរ៕