សាលារាជធានីភ្នំពេញ បន្តផ្អាកការជួបជុំ ឬការប្រមូលផ្ដុំលក្ខណៈឯកជន និងសកម្មភាពការងារ មុខរបរ ឬអាជីវកម្ម ដែលមានហានិភ័យខ្ពស់ក្នុងភូមិសាស្ដ្ររាជធានីភ្នំពេញរយៈពេល១៤ថ្ងៃទៀត ដើម្បីទប់ស្កាត់ការឆ្លងរីករាយដាលជំងឺកូវីដ-១៩។
ក្នុងសេចក្ដីសម្រេចរបស់សាលារាជធានីភ្នំពេញផ្សាយនៅថ្ងៃទី២៣ ខែកក្កដា ម្សិលមិញឱ្យដឹងថា សកម្មភាពការងារ មុខរបរ ឬអាជីវកម្ម ដែលត្រូវបានផ្អាក ចាប់ពីថ្ងៃទី២៤ ខែកក្កដា រហូតដល់ថ្ងៃទី០៦ ខែសីហា ឆ្នាំ២០២១នោះ រួមមាន សាលារៀន រួមទាំងសាលាបណ្ដុះបណ្ដាលវិជ្ជាជីវៈទាំងរដ្ឋ និងឯកជន លើកលែងសាលារៀនដែលធ្វើការបណ្ដុះបណ្ដាលតាមប្រព័ន្ធអនឡាញ។ ក្រៅពីសាលារៀននោះ ក៏មាន អាជីវកម្មក្លឹបកម្សាន្ដគ្រប់ប្រភេទ មានជាអាទិ៍៖ ខារ៉ាអូខេ រង្គសាល ឌីស្កូតែក បៀហ្គាឌិន និងកាស៊ីណូ, រមណីយដ្ឋាន សារមន្ទីរ និងសួនកម្សាន្ដនានា, អាជីវកម្មម៉ាស្សា និងរោងភាពយន្ដ រោងសម្ដែងសិល្បៈ ក្លឹបហាត់ប្រាណ និងមជ្ឈមណ្ឌលកីឡាជាដើម។
លើសពីនេះ អាជ្ញាធរនឹងពិនិត្យផ្អាកសកម្មភាពការងារ មុខរបរ និងអាជីវកម្មផ្សេងទៀត ទៅតាមស្ថានភាពវិវឌ្ឍន៍ជាក់ស្ដែង ដោយអនុលោមតាមតម្រូវការចាំបាច់ក្នុងការប្រយុទ្ធ និងទប់ស្កាត់ការឆ្លងរាលដាល នៃជំងឺកូវីដ-១៩។ ការដាក់ចេញវិធានការបែបនេះ ធ្វើឡើងបន្ទាប់ពីក្រសួងសុខាភិបាលនៅតែបន្តរកឃើញអ្នកឆ្លងជំងឺកូវីដ-១៩ នៅតែមានចំនួនច្រើន ខណៈអ្នកស្លាប់នៅមិនទាន់ថយចុះដែរ។ បើតាមក្រសួងសុខាភិបាល គិតត្រឹមថ្ងៃទី២៤ ខែកក្កដា ឆ្នាំ២០២១នេះ កម្ពុជារកឃើញអ្នកឆ្លងជំងឺកូវីដ-១៩ សរុប ៧២ ១០៤នាក់ ក្នុងនោះករណីនាំចូលពីក្រៅប្រទេស ៨ ២៥៤នាក់ និង អ្នកជំងឺព្យាបាលជាសះស្បើយសរុប ៦៤ ៥៤៨នាក់ ខណៈអ្នកស្លាប់កើនឡើង ១២៥៤នាក់៕