សមត្ថកិច្ចខេត្តកំពង់ស្ពឺ បានចាប់ខ្លួនអតីតមេឃុំជាប់ឆ្នោតរបស់គណបក្សប្រឆាំងម្នាក់ដែលធ្លាប់គេចខ្លួនទៅប្រទេសថៃ ពាក់ព័ន្ធនឹងបទ«ញុះញង់» បើទោះបីរដ្ឋាភិបាលធ្លាប់អំពាវនាវឱ្យចូលស្រុកវិញដោយមិនយកទោសពៃរ៍ក៏ដោយ។
អតីតមេឃុំជាប់ឆ្នោតឃុំត្រែងត្រយឹង ស្រុកភ្នំស្រួច កញ្ញា កឹម តុលា ត្រូវបានសមត្ថកិច្ចចាប់ខ្លួនកាលពីរសៀលថ្ងៃព្រហស្បតិ៍នេះ ក្រោយពីគាត់បានវិលត្រឡប់ពីប្រទេសថៃវិញ។
មន្ត្រីនគរបាលនៅស្នងការដ្ឋាននគរបាលខេត្តកំពង់ស្ពឺម្នាក់ សុំមិនប្រាប់ឈ្មោះ បានប្រាប់ VOD ថា គិតមកដល់រសៀលថ្ងៃសុក្រម្សិលមិញនេះ មន្ត្រីជំនាញកំពុងសាកសួរជនសង្ស័យឈ្មោះ កឹម តុលា នៅឡើយ។
ប៉ុន្តែលោកថា មិនបានដឹងពីបទចោទទេ ដោយឱ្យសួរទៅនាយការិយាល័យប្រឆាំងភេរវកម្មនៃស្នងការដ្ឋាននគរបាលខេត្តកំពង់ស្ពឺ លោក មួង លាង ដែលទទួលបន្ទុកកិច្ចការនេះវិញ តែ វីអូឌី មិនអាចទាក់ទងបាន។
លោកថា៖ «គេនៅសួរចម្លើយនៅកន្លែងស្នងការខេត្តនៅឡើយតើ! [គេចោទពីបទអីដែរ?] អត់ដឹងទេ! ព្រោះជំនាញគេធ្វើ គេលាក់ការ គេអត់ឱ្យយើងដឹងទេ»។
យ៉ាងណា អភិបាលខេត្តកំពង់ស្ពឺ លោក វ៉ី សំណាង ឱ្យដឹងថា ការចាប់ខ្លួនស្ត្រីរូបនេះជាការអនុវត្តសាលក្រមផ្តន្ទាទោសកំបាំងមុខ ចុះថ្ងៃទី២៨ ខែមេសា ឆ្នំា២០២១ ចោទពីបទ «ញុះញង់ឱ្យប្រព្រឹត្តបទល្មើសជាអាទិ៍» ប្រព្រឹត្តកាលពីខែមករា ឆ្នាំ២០១៩។
លោកថា៖ «សាលាដំបូងគេជម្រះហើយ គេសម្រេចផ្តន្ទាទោស កឹម តុលា ហ្នឹងដាក់ពន្ធនាគារ១ឆ្នាំ ហើយពិន័យជាប្រាក់២លានរៀល គិតចាប់ពីថ្ងៃចាប់ខ្លួន! គាត់ញុះញង់ឱ្យប្រព្រឹត្តបទល្មើសជាអាទិ៍ កាលដែលគាត់ប្រព្រឹត្តហ្នឹងនៅភូមិទី៣ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ កាលពីថ្ងៃទី១២ ខែមករា ឆ្នាំ២០១៩»។
អតីតប្រធានប្រតិបត្តិក្រុងច្បារមន នៃគណបក្សសង្គ្រោះជាតិ ខេត្តកំពង់ស្ពឺ ដែលកំពុងនិរទេសខ្លួននៅប្រទេសថៃ អ្នកស្រី ជុំ សោភ័ណ្ឌ មានប្រសាសន៍ថា កញ្ញា កឹម តុលា បានគេចខ្លួនទៅប្រទេសថៃជាមួយគាត់និងក្រុមការងារសរុប៧នាក់ទៀត កាលពីខែកុម្ភៈ ឆ្នាំ២០១៩ ក្រោយពីមានដីកាចោទប្រកាន់ពីតុលាការ ប៉ុន្តែក្រោយមក កញ្ញា កឹម តុលា បានត្រឡប់មកស្រុកកំណើតវិញ។
បើតាមអ្នកស្រី ជុំ សោភ័ណ្ឌ ពួកគេរងការចោទប្រកាន់ ក្រោយពីបានចូលរួមគាំទ្រការតែងតាំងលោក សម រង្ស៊ី ជាប្រធានស្តីទីគណបក្សសង្គ្រោះជាតិ និងធ្វើកម្មវិធីហូបនំបញ្ចុក អំឡុងលោក សម រង្ស៊ី ប្រកាសពីគម្រោងចូលកម្ពុជាវិញនៅថ្ងៃទី៩ ខែវិច្ឆិកា ឆ្នាំ២០១៩។
តែយ៉ាងណា លោកនាយករដ្ឋមន្ត្រី ហ៊ុន សែន កាលពីថ្ងៃទី១៤ ខែវិច្ឆិកា ឆ្នាំ២០១៩ អំឡុងសម្ពោធរោងចក្រផលិតស៊ីម៉ង់ត៍មួយនៅខេត្តកំពត បានអំពាវនាវឱ្យអ្នកដែលបានរត់គេចខ្លួនទៅប្រទេសថៃត្រឡប់មកកម្ពុជាវិញ ដោយថា រដ្ឋាភិបាលនឹងមិនយកទោសពៃរ៍នោះទេ ដោយថា អ្នកទាំងនោះជាអ្នកចាញ់បោកមេដឹកនាំរបស់ពួកគេប៉ុណ្ណោះ។
លោកថា៖ «ម៉ាចំនួនទៀតភ័យខ្លាចគេ[សមត្ថកិច្ច]ចាប់នៅក្នុងប្រទេស ក៏រត់ទៅក្នុងប្រទេសថៃ! ឥលូវសូមបងប្អូនវិលត្រឡប់មកកាន់ផ្ទះសម្បែងវិញ នៅក្នុងប្រទេសកម្ពុជាវិញ អត់មានទោសពៃរ៍អីទេ គ្មាននរណាចាប់ទេ! ហ៊ុន សែន បញ្ជារដ្ឋបាលថ្នាក់ក្រោមជាតិទាំងអស់មិនត្រូវចាប់ចងអ្នកដែលបានទៅលាក់ខ្លួននៅប្រទេសថៃនោះទេ»។
បន្ថែមពីនេះ លោកនាយករដ្ឋមន្ត្រី ហ៊ុន សែន បានស្នើឱ្យរដ្ឋមន្ត្រីក្រសួងយុត្តិធម៌ ធ្វើការជាមួយព្រះរាជអាជ្ញានិងតុលាការ ដើម្បីដោះលែងសកម្មជនអតីតបក្សប្រឆាំងដែលត្រូវបានចាប់ខ្លួនឱ្យនៅក្រៅឃុំបណ្តោះអាសន្ន ក្រោមការត្រួតពិនិត្យរបស់តុលាការ ទៅតាមរយៈការស្នើសុំរបស់សាម៉ីខ្លួន មេធាវី ឬក្រុមគ្រួសារ ជាអ្វីដែលលោកហៅថា ជាកិច្ចការចាំបាច់ត្រូវធ្វើក្នុងគោលដៅបង្រួបបង្រួមជាតិ រក្សាសន្តិភាព និងសេចក្តីសុខជូនប្រជាពលរដ្ឋ។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា ដីកាចាប់ខ្លួនរបស់តុលាការមិនអាចរលត់បានទេ បើរឿងរ៉ាវមិនទាន់ត្រូវបានបិទបញ្ចប់។ ប៉ុន្តែលោកថា ជាការកត់សម្គាល់ វិធានការនេះជាលំនាំចាស់ដែលគេចាត់ទុកថាជារឿងនយោបាយ ដោយសារតែចំណាត់ការចាប់សកម្មជននយោបាយនេះ វាបានកើតឡើងតែប៉ុន្មានថ្ងៃ ក្រោយពីលោក សម រង្ស៊ី អំពាវនាវពីក្រៅប្រទេសឱ្យពលរដ្ឋនិងកងកម្លាំងរួមគ្នាបង្កើតរដ្ឋាភិបាលរួបរួមជាតិ។
លោកថា៖ «បញ្ហានេះ វាមិនខុសអីពីទិដ្ឋភាពមុនៗទេ ព្រោះសំណុំរឿងនេះ ក៏ជាសំណុំរឿងចាស់ដែរ ដែលយើងយើញថា សហគមន៍អន្តរជាតិ ក៏ដូចជាក្រុមប្រឹក្សាសិទ្ធិមនុស្សអង្គការសហប្រជាជាតិ គេចាត់ទុកថា ជាការធ្វើទុក្ខបុកម្នេញដល់អតីតសកម្មជនបក្សប្រឆាំង ក៏ដូចជាការរំលោភបំពានទៅលើសេរីភាពជាមូលដ្ឋាន និងការចាប់ឃុំខ្លួនអីហ្នឹងជាហេតុផលនយោបាយច្រើនជាងការអនុវត្តច្បាប់»៕