ក្រសួងសុខាភិបាលបានប្រកាសនៅថ្ងៃសៅរ៍នេះថា អ្នកជំងឺកូវីដ-១៩ ចំនួន ៣២ នាក់ទៀតបានស្លាប់ ដែលធ្វើឱ្យចំនួនអ្នកស្លាប់ដោយសារជំងឺកូវីដ-១៩ នៅកម្ពុជា កើនឡើងដល់ ១២៥៤នាក់ ហើយ។
សេចក្តីប្រកាសដដែលបានឱ្យដឹងថា ក្រសួងបានរកឃើញអ្នកឆ្លងថ្មីចំនួន ៨៦០ នាក់ ក្នុងនោះ ៣៩៥នាក់ ជាករណីនាំចូលពីក្រៅប្រទេស។ ប៉ុន្តែទន្ទឹមគ្នារកឃើញអ្នកឆ្លងថ្មី ៨៦០នាក់នេះ ចំនួនអ្នកព្យាបាលជាសះស្បើយមានចំនួន ១០៧៤នាក់។
គិតត្រឹមថ្ងៃសៅរ៍ ទី២៤ ខែកក្កដានេះ ចំនួនអ្នកឆ្លងជំងឺកូវីដ-១៩ សរុបនៅកម្ពុជាមានចំនួន ៧២ ១០៤ នាក់ ស្លាប់ ១២៥៤នាក់ និងកំពុងសម្រាកព្យាបាលចំនួន ៧ ៥៥៦នាក់។
កាលពីពាក់កណ្តាលខែកក្កដា ឆ្នាំ២០២១ បានប្រកាសថា អ្នកដំណើរចំនួន ៣៧ នាក់ បានរកឃើញវិជ្ជមានកូវីដ-១៩ បំប្លែងថ្មី B.1.617.2 (Delta) ដែលជាក្តីព្រួយបារម្ភមួយសម្រាប់អាជ្ញាធរសុខាភិបាលកម្ពុជា។ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល បានព្រមានជាថ្មីថា កម្ពុជាកំពុងប្រឈមការឆ្លងហួសពីបន្ទាត់ក្រហមហើយ។ ទន្ទឹមគ្នានេះ សោកនាដកម្មនៃសុខភាពសាធារណៈនៅកម្ពុជា អាចនឹងកើតឡើងក្នុងពេលខាងមុខនេះ។
បើតាមសេចក្តីជូនដំណឹងរបស់ក្រសួងសុខាភិបាល ជំងឺកូវីដ-១៩ ឈ្មោះ «ដែលតា (Delta)» នេះ ជាវីរុសបំប្លែងខ្លួនថ្មី មានភាពសាហាវជាងវីរុសបំប្លែងខ្លួនមុនៗចំនួនដល់ទៅ១៥ដង៕
