ឯកអគ្គរាជទូតកម្ពុជាប្រចាំសាធាណរដ្ឋប្រជាធិបតេយ្យប្រជាមានិតឡាវ បានអំពាវនាវឱ្យប្រជាជនខ្មែរកំពុងរស់នៅនិងធ្វើការនៅទីនោះមានការប្រុងប្រយ័ត្នខ្ពស់ ចំពោះស្ថានភាពជំងឺកូវីដ-១៩ដែលកំពុងឆ្លងរាលដាលនៅតាមសហគមន៍។
សេចក្ដីជូនព័ត៌មានរបស់ស្ថានទូតកម្ពុជាប្រចាំនៅប្រទេសឡាវ ចេញផ្សាយនៅថ្ងៃទី២៣ ខែកក្កដា ឆ្នាំ២០២១នេះថា នៅពេលនេះ រដ្ឋាភិបាលឡាវនឹងបន្តដាក់វិធានការហាមឃាត់នៅកន្លែងមួយចំនួនដូចជា កន្លែងផឹកស៊ី ការស៊ីណូ ខារ៉ាអូខេ ក្លឹបកម្សាន្ត ល្បែងគ្រប់ប្រភេទ រោងភាពយន្ត និងហាមជួបជុំគ្នាកុះករ ជាដើម។ ចំណែកប្រជាពលរដ្ឋដែលមិនទាន់ទទួលបានការចាក់វ៉ាក់សាំង មិនអនុញ្ញាតឱ្យធ្វើដំណើរតាមរថយន្តនិងយន្តហោះនោះទេ។
ក្នុងសេចក្ដីប្រកាសដដែលបានបន្ថែមថា៖ «ស្ថានភាពជំងឺកូវីដ-១៩ នៅរដ្ឋធានីវៀងច័ន្ទន៍បានថយចុះជាលំដាប់។ ដោយឡែក នៅតាមបណ្ដាខេត្តមួយចំនួននៅតែបន្តរកឃើញការឆ្លងនៅតាមសហគមន៍ ខណៈរដ្ឋាភិបាលប្រទេសឡាវបានបន្តដាក់វិធានការគ្រប់គ្រងការពារការរាលដាលជំងឺកូវីដ-១៩ បន្ថែម១៥ថ្ងៃទៀត ចាប់ពីថ្ងៃទី២០ ខែកក្កដា រហូតដល់ថ្ងៃទី០៤ ខែសីហា ឆ្នាំ២០២១»។
សេចក្ដីប្រកាសនេះបានអំពាវនាវឱ្យប្រជាពលរដ្ឋ ពលករ រួមទាំងនិស្សិតខ្មែរទាំងអស់នៅក្នុងប្រទេសឡាវ ត្រូវអនុវត្តតាមសេចក្ដីណែនាំរបស់រដ្ឋាភិបាលឡាវ និងត្រូវរក្សាអនាម័យឱ្យបានល្អ ដោយអនុវត្តតាមវិធានការរបស់រដ្ឋាភិបាលកម្ពុជា «៣កុំ ៣ការពារ» ដើម្បីបង្ការនិងទប់ស្កាត់ការរីករាលដាលជំងឺកូវីដ-១៩ឱ្យមានប្រសិទ្ធភាព។
គិតត្រឹមថ្ងៃទី២២ ខែកក្កដា ម្សិលមិញនេះ ប្រទេសឡាវមានអ្នកផ្ទុកជំងឺកូវីដ-១៩សរុបចំនួន៤ ១១៩នាក់ ក្នុងនោះ ស្លាប់៥នាក់ ជាសះស្បើយចំនួន២ ១៧៤នាក់ និង១ ៩៤០នាក់កំពុងសម្រាកព្យាបាល៕