មន្ត្រីសហព័ន្ធកីឡាប្រដាល់គុនខ្មែរមួយរូបថា ខ្លួនរងភាពអយុត្តិធម៌ដោយត្រូវទទួលការពិន័យផ្អាកការងារពីសហព័ន្ធតែម្នាក់ឯង ខណៈដែលមន្ត្រីពាក់ព័ន្ធផ្សេងទៀតរួចផុតពីការពិន័យនេះ បន្ទាប់ពីការកាត់សេចក្តីមិនប្រកាសលទ្ធផលគូប្រកួតខ្សែក្រវាត់មួយនៅលើកញ្ចក់ទូរទស្សន៍ CNC។
សហព័ន្ធកីឡាប្រដាល់គុនខ្មែរ បានសម្រេចពិន័យផ្អាកការងារមន្ត្រីសហព័ន្ធ២រូប រួមមាន គណៈកម្មការប្រតិបត្តិនៃសហព័ន្ធកីឡាប្រដាល់គុនខ្មែរ និងជាស្នងការប្រកួតប្រចាំស្ថានីយទូរទស្សន៍ CNC លោក មាស សុគ្រី ចំនួន៦សប្តាហ៍ និងចៅក្រមអាជ្ញាកណ្តាល លោក រាម កុសល ចំនួន៤សប្តាហ៍ ដោយហេតុមានកំហុសឆ្គងក្នុងការកាត់ក្តីការប្រកួតខ្សែក្រវាត់រវាងកីឡាករ ឃឹម បូរ៉ា និង ម៉ឺន មេឃា កាលពីថ្ងៃទី១០ ខែកក្កដាកន្លងទៅ។
នៅក្នុងការប្រកួតនោះ លោកនាយករដ្ឋមន្ត្រី ហ៊ុន សែន បានរិះគន់ការសម្រេចចិត្តរបស់គណៈកម្មការរៀបចំការប្រកួតដែលសម្រេចលើកពេលប្រកួតទៅពេលក្រោយ បើទោះបីជាកីឡាករ ម៉ឺន មេឃា បានរំលោភលើលក្ខន្តិកៈប្រកួតដោយចាប់កីឡាករ ឃឹម បូរ៉ា បោកស្ទើរបាក់កក្តី។ ក៏ប៉ុន្តែ ក្រោយពីមានការរិះគន់ពីលោកនាយករដ្ឋមន្ត្រី ហ៊ុន សែន មក គណៈកម្មាធិការរៀបចំការប្រកួត បានសម្រេចផ្តល់ជ័យជម្នះដល់កីឡាករ ឃឹម បូរ៉ា ជាម្ចាស់ខ្សែក្រវាត់ អមដោយទឹកប្រាក់៥ពាន់ដុល្លារអាមេរិក។
លោក មាស សុគ្រី ដែលជាគណៈកម្មការប្រតិបត្តិនៃសហព័ន្ធកីឡាប្រដាល់គុនខ្មែរ និងជាស្នងការប្រកួតប្រចាំស្ថានីយទូរទស្សន៍ CNC លើកឡើងថា ជារឿងអយុត្តិធម៌ដែលលោកត្រូវទទួលការពិន័យពីសហព័ន្ធតែម្នាក់ឯង ដែលធ្វើឱ្យប៉ះពាល់កិត្តិយសលោកនិងគ្រួសារ ខណៈដែលមន្ត្រីពាក់ព័ន្ធដែលជំនុំសម្រេចកាត់ក្តីរួមគ្នាផ្សេងទៀត មិនត្រូវបានសហព័ន្ធកីឡាប្រដាល់គុនខ្មែរពិន័យនោះទេ។ លោកបន្តថា លោកទទួលស្គាល់ថាមានកំហុស ប៉ុន្តែពេលសម្រេចកាត់ក្តីលើការប្រកួតរវាងកីឡាករ ឃឹម បូរ៉ា និង ម៉ឺន មេឃា គឺធ្វើរួមគ្នា ដូច្នេះបើការសម្រេចនោះមានកំហុស គឺត្រូវទទួលខុសត្រូវទាំងអស់គ្នា។
លោកថា៖ «គេសម្រេចឱ្យឈ្នះចាញ់យុត្តិធម៌ តែសម្រេចដាក់កំហុសខ្ញុំ មិនយុត្តិធម៌តែឯង! បើសិនជាដាក់ជារួមទៅ គ្រូអត់តូចចិត្តទេ កំហុសវាមាន មិនមែនអត់ទេ! កម្មវិធីនេះ វារលូនកើតឡើងដោយសារយើងសហការគ្នា គ្មានអ្នកណាមួយធ្វើដោយចិត្តឯងទេ គឺយើងធ្វើដោយប្រព័ន្ធរួមគ្នា បើខុសៗទាំងអស់គ្នាទៅ កុំឆ្លើយដាក់ម្នាក់ៗ វាអត់ល្អមើលទេ! មិនមែនគ្រូអ្នកសម្រេចទេ គេធ្វើការតាមប្រព័ន្ធប្រធានវិនិច្ឆយ មានស្នងការ មានអនុប្រធានសហព័ន្ធ មានស្ព័នស័រ មានស្ថានីយ។ អ្វីក៏ដោយ ពេលអ្នកណាសម្រេចទាំងអស់គ្នា ត្រូវទទួលកំហុសទាំងអស់គ្នា ដើម្បីកាត់សេចក្តី តែចំណែកអស់លោកខ្លះ គាត់នៅស្ងៀម គាត់ធ្វើមិនដឹង គាត់ចាំតែពេលបានលុយទៅ ដល់ពេលមានរឿង គាត់ឆ្លើយយករួចខ្លួន ដល់ពេលមានមុខមានមាត់ គេចប់ខ្សែក្រវាត់ គាត់មានមុខមាត់រហូត»។
គណៈកម្មការប្រតិបត្តិនៃសហព័ន្ធកីឡាប្រដាល់គុនខ្មែររូបនេះ បានសំណូមពរឱ្យសហព័ន្ធបែងចែកច្បាប់ឱ្យដាច់ដោយឡែកតាមតួនាទី ដើម្បីសម្រេចជុំវិញបញ្ហានានានៃការប្រកួត ចៀសវាងធ្វើសេចក្តីសម្រេចរួមគ្នា តែពេលមានបញ្ហា ទម្លាក់ឱ្យបុគ្គលម្នាក់ៗ។
លោក មាស សុគ្រី បន្តថា៖ «ថ្ងៃក្រោយ ខ្ញុំសូមថាឱ្យមានច្បាប់ដាច់ដោយឡែក សូមឱ្យមានច្បាប់ដាច់ដោយឡែក ឱ្យមើលឃើញកំហុសអ្វីមួយ ត្រូវប្រគល់ឱ្យអ្នកណាៗមួយ កុំបាច់ត្រូវជំនុំគ្នា ជម្រះគ្នា! សូមឱ្យមន្ត្រីគ្រាប់ល្ង ខិលខូចហ្នឹង កុំចូលចិត្តយកកំហុសយកទៅដាក់បុគ្គលម្នាក់ៗឯង។ ធ្វើការក្នុងរួមគ្នា សូមឱ្យចេះទួលខុសត្រូវអ្នកដែលគេធ្វើផង»។
ម្ចាស់ក្លឹបប្រដាល់ជ្រៃសែនជ័យខេត្តកំពង់ស្ពឺរូបនេះ បន្តទៀតថា លោកមិនចង់បន្តវែងឆ្ងាយទេ ប៉ុន្តែគ្រាន់តែចង់រកយុត្តិធម៌និងរក្សាកិត្តិយសដែលលោកខិតខំសាងជិត៤០ឆ្នាំលើវិថីគុនខ្មែរ ជូនខ្លួនឯងនិងគ្រួសារតែប៉ុណ្ណោះ។ លោកថា ចំពោះរឿងដែលកើតឡើងហើយ សហព័ន្ធកីឡាប្រដាល់គុនខ្មែរ មិនគួរទម្លាក់កំហុសទៅលើបុគ្គលម្នាក់ៗនោះទេ គួរតែធ្វើលិខិតមួយស្នើទៅលោកនាយករដ្ឋមន្ត្រី ហ៊ុន សែន ដើម្បីធានាបានថា នឹងពង្រឹងសមត្ថភាពគណៈកម្មការរបស់សហព័ន្ធបន្ថែមទៀត។
ជាមួយគ្នានេះដែរ លោកក៏បានសុំអភ័យទោសចំពោះកំហុសដែលកើតមាន និងថ្លែងអំណរគុណដល់ប្រមុខរដ្ឋាភិបាល ដែលតែងផ្តល់អនុសាសន៍ល្អៗនិងយកចិត្តទុកដាក់ចំពោះគុនខ្មែរ។
ជាមួយគ្នានេះដែរ អគ្គលេខាធិការសហព័ន្ធកីឡាប្រដាល់គុនខ្មែរ លោក ម៉ិល កាដូ បានរៀបរាប់ថា សហព័ន្ធកីឡាប្រដាល់គុនខ្មែរមានច្បាប់និងបទបញ្ជាច្បាស់លាស់ក្នុងការបែងចែកកិច្ចការនិងដោះស្រាយបញ្ហាជាប្រព័ន្ធពីលើមកក្រោមទៅតាមតួនាទី ដោយមិនមាននរណាម្នាក់អាចធ្វើខុសពីបទបញ្ជានេះឡើយ។
លោក ម៉ិល កាដូ និយាយថា៖ «នៅក្នុងលក្ខន្តិកៈរបស់យើងក្តី នៅក្នុងបទបញ្ជារបស់យើងក្តី សហព័ន្ធលោកបានចែងច្បាស់ហើយ វាជាលក្ខន្តិកៈ ជាបទបញ្ជារបស់សហព័ន្ធ អត់មានអ្នកណាមួយអាចធ្វើខុសពីលក្ខន្តិកៈបទបញ្ជារបស់ខ្លួនដែលបានចែងហ្នឹងទេ។ ហើយម្នាក់ៗសុទ្ធតែគោរព សុទ្ធតែប្រតិបត្តិទៅតាមអីគេហៅថាលក្ខន្តិកៈបទបញ្ជា ដូចយើងហៅថា រដ្ឋធម្មនុញ្ញយើងអ៊ីចឹង»។
អគ្គលេខាធិការសហព័ន្ធកីឡាប្រដាល់គុនខ្មែររូបនេះ បន្ថែមថា ការសម្រេចពិន័យរបស់សហព័ន្ធកីឡាប្រដាល់គុនខ្មែរជារឿងត្រឹមត្រូវ។ លោកថា អ្នកធ្វើខុសតែងតែមិនពេញចិត្ត និងបដិសេធដោយមិនទទួលស្គាល់កំហុសរបស់ខ្លួន។
លោកថា៖ «អ្នកដែលធ្វើខុសមិនដែលទទួលថាខ្លួនឯងធ្វើខុសទេ! រៀននៅក្នុងសាលាអីជាដើម នៅពេលដែលលោកគ្រូគាត់ស្តីឱ្យ គាត់ថាឱ្យ យើងខឹងគ្រូហ្នឹងថា វាយតែគាត់ ស្តីឱ្យតែគាត់! ដល់ពេលក្រោយមក បានដឹងថា ជាកំហុសរបស់យើង។ យ៉ាងណាមិញ យើងគ្រប់រូបក៏ដូចគ្នាអ៊ីចឹងដែរ អ្វីមួយដែលអាក្រក់ យើងពិបាកទទួលណាស់ គេស្តីឱ្យ ពិបាកទទួលណាស់ តែបើគេសរសើរ គេលើកសរសើរ យើងរីករាយ លក្ខណៈមនុស្សយើងភាគច្រើនអ៊ីចឹង កាលណាគេថាឱ្យ យើងពិបាកទទួល»៕
អត្ថបទ៖ ប៉ា តុងចិន