ប្រជាពលរដ្ឋមួយចំនួនរស់នៅស្រុកស្អាង ខេត្តកណ្តាល បានចោទក្រុមហ៊ុនឯកជនមួយថា បានដាក់គ្រឿងចក្រឈូសឆាយដីបឹងសហគមន៍ដែលពួកគាត់ជាង២០គ្រួសារកំពុងអាស្រ័យផលដាំចម្ការនិងធ្វើស្រែប្រាំង។
លោក សៀម សាន អាយុ៥០ឆ្នាំ រស់នៅឃុំស្វាយប្រទាល ស្រុកស្អាង បានប្រាប់ វីអូឌី នៅថ្ងៃចន្ទនេះថា ដីបឹងសហគមន៍ប្រហែល១០០ហិកតា គ្រប់គ្រងដោយប្រជាពលរដ្ឋជាង២០គ្រួសារ មកពីឃុំស្វាយប្រទាល និងឃុំត្រើយស្លា ត្រូវបានក្រុមហ៊ុនឯកជនមួយឈ្មោះ «ឈាងបាក់សួរ» កំពុងដាក់គ្រឿងចក្រឈូសឆាយយកធ្វើកម្មសិទ្ធិដោយគ្មានការទប់ស្កាត់ពីអាជ្ញាធរពាក់ព័ន្ធ។
ពលរដ្ឋរូបនេះឱ្យដឹងទៀតថា អ្នកភូមិបានចូលទៅអាស្រ័យផល ដោយបានដាំបន្លែត្រឡាច ល្ពៅ ធ្វើស្រែប្រាំង និងដំណាំកសិកម្មផ្សេងៗទៀតតាំងពីឆ្នាំ២០១៧ ដោយមានការអនុញ្ញាតពីអាជ្ញាធរ។ លោកបន្តថា អាជ្ញាធរមូលដ្ឋានក៏ធ្លាប់សន្យាដែរថា នឹងរក្សា «បឹងអាងយុវជន» នេះ ទុកសម្រាប់ប្រជាពលរដ្ឋអាស្រ័យផលផងដែរ។
លោកបន្ថែមថា៖ «មេកាក្រុមហ៊ុនបានជួលសមត្ថកិច្ចទៅគំរាមកំហែងនិងកម្ទេចរោងចម្ការរបស់ប្រជាពលរដ្ឋ ហើយបានឈូសឆាយដីចង់មួយចំហៀងបឹងហើយ! សមត្ថកិច្ចបានដាក់កាំភ្លើង៤ទៅ៥ដើមទៅកម្ទេចរោងហ្នឹង ហើយកន្លងមកទៀតបានឈូសឆាយដីពលរដ្ឋហ្នឹងទៅ»។
លោក កុង អៀក អាយុ៥៧ឆ្នាំ ជាពលរដ្ឋម្នាក់ទៀតរស់នៅឃុំត្រើយស្លា បានដាក់ការសង្ស័យថា បឹងសហគមន៍មួយនេះ អាចត្រូវបានអាជ្ញាធរលក់ទៅឱ្យក្រុមហ៊ុន។ លោកថា ប្រសិនបើអាជ្ញាធរលក់បឹងនោះទៅឱ្យក្រុមហ៊ុនមែន នោះរូបលោកនិងប្រជាពលរដ្ឋដែលកំពុងអាស្រ័យផល នឹងបាត់បង់មុខរបរ ដោយសារពុំមានដីសម្រាប់បង្កបង្កើនផលតទៅទៀត។
ពលរដ្ឋរូបនេះបន្តថា អ្នកភូមិទាមទារឱ្យអាជ្ញាធររក្សាបឹងនោះជាសម្បត្តិរដ្ឋ និងត្រូវអនុញ្ញាតឱ្យប្រជាពលរដ្ឋបានចូលទៅអាស្រ័យផលដូចដើមវិញ ដើម្បីដោះស្រាយជីវភាពគ្រួសារ។
លោកបន្ថែមថា៖ «បើរដ្ឋយកវិញ យកចុះ! ប៉ុន្តែបើក្រុមហ៊ុនយក ពួកខ្ញុំអត់ឱ្យធ្វើទេ ព្រោះការបាត់បង់ដីនេះបានធ្វើឱ្យប៉ះពាល់ដល់ប្រជាពលរដ្ឋយើងខ្លាំងណាស់។ ពួកខ្ញុំអ្នកដាំដុះ បើបាត់បង់ដីនេះហើយ បានអីធ្វើទៀត! ពួកខ្ញុំក្រីក្រណាស់ ហើយជំពាក់ធនាគារទៀត»។
វីអូឌី មិនអាចសុំការឆ្លើយតបពីតំណាងក្រុមហ៊ុន«ឈាងបាក់សួរ» ដែលរងការចោទប្រកាន់នេះបានទេ នៅថ្ងៃចន្ទនេះ។
មេឃុំត្រើយស្លា លោក ប៉ាវ ប៉េង អះអាងថា «បឹងអាងយុវជន» ដែលក្រុមហ៊ុន«ឈាងបាក់សួរ»កំពុងមានសកម្មភាពឈូសឆាយនោះ ជាបឹងរបស់រដ្ឋបានចុះបញ្ជីរួមហើយ ដោយគ្មានបុគ្គលណាម្នាក់អាចយកធ្វើជាកម្មសិទ្ធិបានឡើយ បើគ្មានការអនុញ្ញាតពីរដ្ឋាភិបាល។
មេឃុំរូបនេះបញ្ជាក់ថា ក្រុមហ៊ុនចូលធ្វើសកម្មភាពឈូសឆាយនោះ គឺធ្វើទៅតាមការបង្គាប់របស់ក្រសួងកសិកម្ម ដើម្បីកាយយកអាចម៍ដីទៅទប់ទំនប់អាងដែលបានបាក់ធ្លាយតែប៉ុណ្ណោះ។
ក្រៅពីនោះ លោក ប៉ាវ ប៉េង បានច្រានចោលចំពោះការចោទប្រកាន់របស់ប្រជាពលរដ្ឋ ដែលថា មេការក្រុមហ៊ុននិងសមត្ថកិច្ចប្រើប្រាស់កាំភ្លើងទៅគំរាមកំហែងប្រជាពលរដ្ឋ។
លោកបន្ថែមថា៖ «ដីអាងហ្នឹង ខាងសម្បត្តិរបស់រដ្ឋ គេបានចុះប្លង់រឹងហើយស្រេចហើយ អត់មានខាងណាយកបានទេ។ ប្រជាពលរដ្ឋទេដែលទៅទន្ទ្រានយកដីព្រៃនៅក្នុងបឹងអាងយុវជនដែលជាដីរបស់រដ្ឋ។ ហើយក្រុមហ៊ុនគេធ្វើនេះ គឺគេធ្វើទៅតាមការបង្គាប់របស់ក្រសួងកសិកម្ម ដោយខាងក្រុមហ៊ុនទៅឈូសព្រៃដើម្បីយកទៅអាចម៍ដីទៅទប់ទំនប់ដែលដាច់»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា ទាំងប្រជាពលរដ្ឋដែលអាស្រ័យផលលើដីសាធារណៈនិងឯកជនរបស់រដ្ឋ គឺពួកគេមានសិទ្ធិក្នុងការថែរក្សានិងដឹងឮរាល់ការអភិវឌ្ឍនានានៅលើដីនោះ ហើយថា រាល់ការអភិវឌ្ឍនានា រដ្ឋត្រូវជូនដំណឹងឱ្យប្រជាពលរដ្ឋបានដឹងផងដែរ។
លោកបន្ថែមថា៖ «អ៊ីចឹងប្រជាពលរដ្ឋដែលគាត់អាស្រ័យផលដីសាធារណៈឬដីឯកជនរបស់រដ្ឋក៏ដោយ គឺនៅពេលមានបញ្ហាវិនិយោគអីមួយ ត្រូវមានការប្រឹក្សាយោបល់ពីប្រជាពលរដ្ឋនៅជុំវិញហ្នឹង ពីព្រោះគាត់មានសិទ្ធិក្នុងការពារនិងថែរក្សាទ្រព្យសម្បត្តិទាំងអស់ហ្នឹង។ ហើយបើមានការគំរាមកំហែងពីអាជ្ញាធរទៀត អាហ្នឹងវាអត់ត្រឹមត្រូវទេ! វាជាទង្វើផ្ទុយនឹងច្បាប់ ដែលប្រជាពលរដ្ឋអាចដាក់ពាក្យប្តឹងបាន»៕