ជនជាតិដើមភាគតិចខេត្តមណ្ឌលគិរី បង្ហាញការខកចិត្តចំពោះតុលាការប្រទេសបារាំងដែលបានច្រានចោលបណ្តឹងរបស់ពួកគាត់ដែលប្តឹងក្រុមហ៊ុន ប៊ុឡឺរ៉េ កន្លងមក និងបានបង្គាប់ឱ្យជនជាតិដើមភាគតិចបង់ប្រាក់ពិន័យជាង២ម៉ឺនអឺរ៉ូ ទៅឱ្យក្រុមហ៊ុនមេមួយនេះទៀតផង។
ការខកចិត្តនេះ បន្ទាប់ពីតុលាការណង់ទែរ នៅទីក្រុងប៉ារីស ប្រទេសបារាំង កាលពីថ្ងៃទី២ ខែកក្កដា បានសម្រេចច្រានចោលបណ្តឹងរបស់ក្រុមជនជាតិដើមភាគតិចខេត្តមណ្ឌលគិរី និងបង្គាប់ឱ្យបង់ប្រាក់ជាង២ម៉ឺនអឺរ៉ូ ទៅក្រុមហ៊ុន ប៊ុឡឺរ៉េ របស់បារាំងទៀតផង។
កាលពីឆ្នាំ២០១៩ តំណាងជនជាតិដើមភាគតិចចំនួន៩រូបបាននាំគ្នាទៅតតាំងក្ដីនៅតុលាការប្រទេសបារាំង បន្ទាប់ពីដាក់ពាក្យបណ្ដឹងនៅឆ្នាំ២០១៥ ដោយប្ដឹងក្រុមហ៊ុន ប៊ុឡឺរ៉េ ដែលជាម្ចាស់ជំនួយធំរបស់ក្រុមហ៊ុនចំនួន៣ រួមមាន ក្រុមហ៊ុនឈ្មោះ កូវីផាម៉ា, វ៉ារ៉ាណាស៊ី និង សេដ្ឋីកូឡា ប៉ុន្តែក្រុមហ៊ុនទាំង៣នេះបានលក់ភាគហ៊ុនទៅឱ្យក្រុមហ៊ុន សុកហ្វ៊ិន បន្ត។
ក្នុងសេចក្ដីថ្លែងការណ៍របស់សហគមន៍ជនជាតិដើមភាគតិចពូនង ខេត្តមណ្ឌលគិរី ចំនួន៩៧គ្រួសារ នៅថ្ងៃទី១៤ ខែកក្កដា ឆ្នាំ២០២១ បានហៅការសម្រេចរបស់តុលាការណង់ទែរ នៅទីក្រុងប៉ារីសនេះ ជារឿងអយុត្តិធម៌ និងមិនអាចទទួលយកបាន។
ក្រុមជនជាតិដើមភាគតិច លើកឡើងក្នុងសេចក្ដីថ្លែងការណ៍នោះថា ពួកគេមិនអាចទទួលយកសម្អាងហេតុរបស់តុលាការបារាំង ដែលថា ជនជាតិភាគតិចពូនងនៅឃុំប៊ូស្រា មិនមានសិទ្ធិកាន់កាប់ដីស្របច្បាប់នៅប្រទេសកម្ពុជាឡើយ។ ការសម្អាងហេតុបែបនេះ ក្រុមជនជាតិដើមភាគតិច ហៅថា ជារឿងផ្ទុយពីច្បាប់ភូមិបាលកម្ពុជា និងសេចក្ដីប្រកាសជាសកល ស្ដីពីសិទ្ធិជនជាតិដើមភាគតិចផងដែរ។
បើតាមសេចក្ដីថ្លែងការណ៍ បញ្ជាក់ថា ក្រុមហ៊ុន ប៊ុឡឺរ៉េ ដែលបច្ចុប្បន្ន ម្ចាស់ក្រុមហ៊ុន សុកហ្វ៊ិន នៅកម្ពុជា បានបោះ ទុនវិនិយោគដំណាំកៅស៊ូលើដីចម្ការរបស់ជនជាតិដើមភាគតិចពូនងបានអាស្រ័យផល និងដីព្រៃជំនឿរបស់ពួកគាត់តាំងពីឆ្នាំ២០០៨ មកដល់បច្ចុប្បន្ននេះ។
ប្រភពដដែលអះអាងថា ក្រោយពីទទួលបានសិទ្ធិវិនិយោគមក ក្រុមហ៊ុននេះបានឈូសឆាយព្រៃដែលជាព្រៃជំនឿ ព្រៃត្រណម និងកន្លែងប្រភពអាហារប្រចាំថ្ងៃរបស់ជនជាតិដើមភាគតិច ដោយមិនបានដោះស្រាយសំណងឱ្យពួកគេឡើយ។
ក្រៅពីឈូសឆាយហើយ ប្រជាសហគមន៍ចំនួន១៥នាក់ត្រូវជាប់បណ្ដឹងនៅតុលាការ និងខ្លះទៀតកំពុងជាប់ឃុំនៅឡើយ ដោយសារក្រុមហ៊ុននេះបានប្ដឹងពួកគាត់បន្ទាប់ពីពួកគាត់បាននាំគ្នាតវ៉ាប្រឆាំងនឹងការឈូសឆាយដីនិងព្រៃដែលពួកគាត់ពឹងអាស្រ័យផលនោះ។
អ្នកសម្របសម្រួលផ្នែកសិទ្ធិមនុស្ស ដីធ្លី និងព្រៃឈើ នៃបណ្ដាញសហគមន៍ជនជាតិដើមភាគតិចខេត្តមណ្ឌលគិរី លោក គ្រើង តុលា លើកឡើងថា ពួកគាត់និងមេធាវីបានប្ដឹងជំទាស់ចំពោះសេចក្ដីសម្រេចរបស់តុលាការណង់ទែរ ទៅសាលាឧទ្ធរណ៍រួចហើយ ដោយសង្ឃឹមថា តុលាការថ្នាក់ខ្ពស់នឹងជួយរកយុត្តិធម៌ជូនពួកគាត់។
លោកថា៖ «យើងសង្ឃឹមថា សាលាឧទ្ធរណ៍នៅប្រទេសបារាំងហ្នឹង គេនឹងវិនិច្ឆ័យ គេនឹងយកច្បាប់ជនជាតិដើមភាគតិច និងពិចារណាច្បាប់អន្តរជាតិ។ អ៊ីចឹងយើងនឹងមានយុត្តិធម៌ ពីព្រោះប្រជាពលរដ្ឋយើងពិតជារងគ្រោះពិតបា្រកដមែន យើងជាម្ចាស់ដីពិតបា្រកដមែន មិនមែនដូចតុលាការបារាំងថាយើងមិនមែនប្រជាពលរដ្ឋរស់នៅក្នុងឃុំប៊ូស្រា ស្រុកពេជ្រាដា ខេត្តមណ្ឌលគិរីទេ ហើយជាជនចំណាកស្រុកជាដើម អ៊ីចឹងការច្រានរបស់ពួកគេយើង មិនអាចទទួលបានទេ»។
មន្រ្តីកម្មវិធីពង្រឹងអំណាចសហគមន៍នៃសមាគមការពារសិទ្ធិមនុស្សអាដហុក លោក ប៉ែន ប៊ុណ្ណារ៍ ចាត់ទុកការសម្រេចរបស់តុលាការបារាំងនេះ ថាជារឿងអយុត្តិធម៌សម្រាប់ជនជាតិដើមភាគតិច។ មួយវិញទៀត កត្តាដែលនាំឱ្យជនជាតិដើមភាគតិចរងគ្រោះបែបនេះ លោកថា ដោយសាររដ្ឋាភិបាលផ្ដល់ដីសម្បទានសេដ្ឋកិច្ចដល់ក្រុមហ៊ុនដោយមិនបានសិក្សាពីផលប៉ះពាល់របស់ប្រជាពលរដ្ឋ។
លោកថា៖ «ត្រូវហើយ! ការផ្ដល់សម្បទានមួយៗត្រូវមានសិក្សាពីផលប៉ះពាល់! ហើយបានចែងច្បាស់ហើយ អ្នកដឹកនាំ លោកធ្លាប់និយាយហើយថា មិនយកដើមកៅស៊ូទៅដូរជាព្រៃស្រោងទេ អ៊ីចឹងយើងឃើញថា វាផ្ទុយពីការតាំងចិត្តរបស់រដ្ឋាភិបាលដែលផ្ដល់សម្បទានសេដ្ឋកិច្ចមិនឱ្យប៉ះពាល់ដីព្រៃស្រោង និងពាក់កណ្ដាលស្រោង ជាពិសេសតំបន់ជនជាតិដើមភាគតិច ដីព្រៃកប់សព! ហើយវាមិនត្រឹមប៉ះពាល់ព្រៃទេ គឺប៉ះពាល់ប្រពៃណីដូនតារបស់គាត់ដែលគាត់បានថែរក្សារាប់ឆ្នាំហើយ»។
លោក ប៉ែន ប៊ុណ្ណារ៍ ជំរុញឱ្យរដ្ឋាភិបាលកម្ពុជាធ្វើការសិក្សា ស្រាវជ្រាវ និងដោះស្រាយផលប៉ះពាល់ជូនប្រជាពលរដ្ឋឱ្យបានរួចមុននឹងសម្រេចផ្ដល់ដីសម្បទានដល់ក្រុមហ៊ុនណាមួយធ្វើការអភិវឌ្ឍ ដើម្បីកុំឱ្យប្រជាពលរដ្ឋទទួលរងគ្រោះបន្តទៀត៕