រដ្ឋាភិបាលលើកឡើងថា ស្ត្រីនិងក្មេងស្រីជាក្រុមដែលងាយរងគ្រោះលើសុខភាពបន្តពូជ សុខភាពផ្លូវភេទ និងបញ្ហាបាត់បង់ការងារធ្វើ ដោយសារការអូសបន្លាយនៃការឆ្លងរាលដាលកូវីដ-១៩។
ក្នុងសារលិខិតរបស់រដ្ឋាភិបាលកម្ពុជា នៃឱកាសទិវាប្រជាជនពិភពលោកលើកទី៣២ កាលពីថ្ងៃទី១១ ខែកក្កដា ម្សិលមិញ ឱ្យដឹងថា ពិភពលោកកំពុងប្រយុទ្ធប្រឆាំងនឹងការរីករាលដាលនៃជំងឺផ្លូវដង្ហើមធ្ងន់ធ្ងរ (កូវីដ-១៩) ដែលធ្វើឱ្យប៉ះពាល់ធ្ងន់ធ្ងរដល់ជីវិតមនុស្ស សហគមន៍ សេដ្ឋកិច្ច និងសុខភាពសាធារណៈនៅគ្រប់ទិសទីទូទាំងពិភពលោក។
លិខិតដដែលបន្តថា ករណីនេះបានធ្វើឱ្យស្ត្រីនិងក្មេងស្រីងាយរងគ្រោះជាងគេក្នុងវិបត្តិជំងឺកូវីដ-១៩នេះ ជាពិសេសប៉ះពាល់ដល់សុខភាពបន្តពូជ សុខភាពផ្លូវភេទ និងប៉ះពាល់ដល់ការងារ ជាដើម។
សារលិខិតឱ្យដឹងទៀតថា៖ «ស្ត្រីនិងក្មេងស្រីដែលជាទូទៅមានចំណូលតិចតួចពីការងារដែលមិនសូវស្ថិតស្ថេរ កំពុងជួបផលវិបាកផ្នែកសេដ្ឋកិច្ចដែលបង្កដោយជំងឺកូវីដ-១៩ ហើយកំពុងប្រឈមនឹងហានិភ័យខ្ពស់ក្នុងបញ្ហាជីវភាពរស់នៅប្រចាំថ្ងៃ ដែលពួកគេងាយនឹងធ្លាក់ចូលក្នុងភាពក្រីក្រ ប្រឈមនឹងការកើនឡើងនូវបន្ទុកការងារដែលគ្មានប្រាក់ឈ្នួល ដែលរុញច្រានឱ្យស្ត្រីជាច្រើននាក់ចាកចេញពីកម្លាំងពលកម្មដែលមានប្រាក់ឈ្នួល»។
លោកនាយករដ្ឋមន្ត្រី ហ៊ុន សែន បញ្ជាក់ក្នុងលិខិតនោះទៀតថា វិស័យសុខភាពសាធារណៈ ជាពិសេសសុខភាពបន្តពូជនិងសុខភាពផ្លូវភេទ រដ្ឋាភិបាលបានយកចិត្តទុកដាក់និងផ្តល់អាទិភាពខ្ពស់តាំងពីមុនផ្ទុះឡើងនៃជំងឺកូវីដ-១៩មកម្ល៉េះ ជាពិសេសកាលពីឆ្នាំ២០១៧ ដល់ឆ្នាំ២០២០ កម្ពុជាបានជួយប្រជាជនរបស់ខ្លួនទទួលបានសិទ្ធិសុខភាពបន្តពូជ និងសុខភាពផ្លូវភេទរបស់ស្ត្រីនិងក្មេងស្រី បានអត្ថប្រយោជន៍កាន់តែច្រើន ដើម្បីកាត់បន្ថយការស្លាប់របស់ម្តាយជាដើម។
ដើម្បីឆ្លើយតបនឹងស្ថានភាពនៃការឆ្លងរាលដាលនៃជំងឺកូវីដ-១៩នាពេលបច្ចុប្បន្ននេះ លោកបានជំរុញឱ្យអនុវត្តគោលនយោបាយសង្គម និងដាក់ចេញវិធានការអន្តរាគមន៍ជំនួយសង្គមបន្ថែមទៀត ដើម្បីជួយសម្រួលដល់ការលំបាកនិងលើកកម្ពស់ជីវភាពរស់នៅរបស់ប្រជាជនដែលមានជីវភាពក្រីក្រ ជាពិសេសស្ត្រីនិងក្មេងស្រី។
សារលិខិតដដែលបញ្ជាក់ដូច្នេះថា៖ «រាជរដ្ឋាភិបាលបន្តឧបត្ថម្ភចំពោះកម្មការិនីដែលជាស្ត្រីមានផ្ទៃពោះ និងគ្រួសារដែលមានជីវភាពក្រីក្រ ការបង្កើនមូលធនថវិកា [សាច់ប្រាក់ពលកម្ម] ដើម្បីជួយដល់កម្មករនិយោជិតដែលបានព្យួរការងារអំឡុងពេលដែលរោងចក្រ សហគ្រាស គ្រឹះស្ថាន ក្នុងវិស័យកាត់ដេរនិងទេសចរណ៍មួយចំនួនផ្អាកដំណើរការ និងជួយឧបត្ថម្ភជាសាច់ប្រាក់ជូនគ្រួសារក្រីក្រងាយរងគ្រោះអំឡុងពេលកូវីដ-១៩»។
អ្នកស្រី កង ចាន់ថន ជាកម្មការិនីធ្វើការងារនៅរោងចក្រ ស្ថិតនៅសង្កាត់កន្ទោក ខណ្ឌកំបូល រាជធានីភ្នំពេញ នៅថ្ងៃចន្ទនេះ បង្ហាញក្តីរីករាយ បើរដ្ឋាភិបាលជួយអន្តរាគមន៍ផ្តល់ជំនួយសង្គមបន្ថែមទៀត ដើម្បីសម្រួលដល់ការលំបាកនិងលើកកម្ពស់ជីវភាពរស់នៅរបស់ប្រជាពលរដ្ឋក្រីក្រ។
ប៉ុន្តែអ្នកស្រីថា បើរដ្ឋាភិបាលមិនពន្លឿនការយកចិត្តទុកដាក់ជួយដល់ស្ត្រីនិងក្មេងស្រីទេ នឹងធ្វើឱ្យពួកគាត់កាន់តែជួបបញ្ហាប្រឈមច្រើនក្នុងជីវភាព ខណៈបច្ចុប្បន្ន រោងចក្ររបស់គាត់កំពុងប្រឈមនឹងការបិទទ្វារជាបណ្តោះអាសន្ន ដោយសារមានកម្មករឆ្លងច្រើន។
អ្នកស្រីនិយាយថា៖ «ខ្ញុំស្រមៃរូបភាពហ្នឹងមិនឃើញ បើអត់មានអ្នកជួយ មិនដឹងម៉េច! ព្រោះខ្លួនយើងតែមួយ [ធ្វើការចិញ្ចឹមគ្រួសារ] នៅមានកូនទៀត យើងគិតអ៊ីចឹង រាល់ថ្ងៃដោយសារមានប្រាក់រោងចក្រ។ ពេលដែលយើងមានបញ្ហា [បិទរោងចក្របណ្តោះអាសន្ន] គេគិតឱ្យយើង៥០ដុល្លារចាប់ពី២ខែមុនមក ហើយគេប្រាប់យើងហើយ [នៅខែ៨] គេលែងគិតឱ្យហើយ ខាងក្រសួងគេចុះមកប្រាប់យើង បើអត់ធ្វើការ ក៏អត់បានលុយដែរ»។
ប្រធានសម្ព័ន្ធសហជីពកម្ពុជា លោកស្រី យ៉ាង សុភ័ណ្ឌ ដែលធ្វើការងារស្និទ្ធជាមួយកម្មករ ជាពិសេសកម្មករស្ត្រីនោះ បានលើកឡើងថា អំឡុងពេលឆ្លងរាលដាលនៃជំងឺកូវីដ-១៩ ស្ត្រីនិងក្មេងស្រីមួយចំនួនធំបានបាត់បង់ការងារ ជំពាក់បំណុលធនាគារ និងខ្លះទៀតរងការប្រើអំពើហិង្សាទាំងផ្លូវកាយនិងផ្លូវភេទផងដែរ។
ករណីនេះ លោកស្រីយល់ថា បើសិនជារដ្ឋាភិបាលមិនពន្លឿននិងពង្រឹងយន្តការតាមដាន និងរកវិធីដោះស្រាយជូនពួកគាត់ឱ្យបានទាន់ពេលទេ បញ្ហាប្រឈមកាន់តែខ្លាំង បើស្ថានភាពកូវីដ-១៩នៅតែបន្តអូសបន្លាយ។
លោកស្រីមានប្រសាសន៍ថា៖ «បើស្ថានភាព [កូវីដ-១៩] បែបហ្នឹង នៅតែបន្តទៅមុខទៀត ខ្ញុំគិតថា គាត់អាចធ្លាក់ពីស្ថានភាពដែលពីមុនមកគាត់ធ្លាប់រស់នៅដែលមានជីវភាពប្រសើរ គាត់អាចធ្លាក់ជីវភាពកាន់តែដុនដាប ជួនកាលកើតជាអំពើហិង្សាក្នុងគ្រួសារជាដើម និងធ្លាក់ខ្លួនជំពាក់បំណុលក្រុមហ៊ុនមីក្រូហិរញ្ញវត្ថុបន្ថែមទៀត»។
សេចក្តីថ្លែងការណ៍មួយរបស់អង្គការសមាគមចំនួន២២ ចុះថ្ងៃទី១៧ ខែមិថុនា ឆ្នាំ២០២១ បានអំពាវនាវឱ្យរដ្ឋាភិបាល បង្កើនការយកចិត្តទុកដាក់ដល់កម្មករដែលបាត់បង់ការងារ ដោយសារការអូសបន្លាយនៃការឆ្លងរាលដាលកូវីដ-១៩ ដោយថា បញ្ហានេះកំពុងជំរុញឱ្យពួកគាត់ប្រឈមនឹងការកើនឡើងនូវបំណុលនិងបង្កឱ្យមានហានិភ័យដល់សុខភាពសាធារណៈ។
ចំណែក អង្គការសហប្រជាជាតិប្រចាំកម្ពុជា កាលពីពាក់កណ្តាលខែមិថុនា ឆ្នាំ២០២១ បានចេញផ្សាយអត្ថបទមួយថា «ខណៈដែលជំងឺកូវីដ-១៩ បានជះឥទ្ធិពលយ៉ាងខ្លាំងដល់ឧស្សាហកម្មកាត់ដេរនៅកម្ពុជា ស្ត្រីចំនួន៨០ភាគរយនៃកម្លាំងពលកម្មក្នុងវិស័យកាត់ដេរនេះ បានរងផលប៉ះពាល់ធ្ងន់ធ្ងរជាងគេ ដោយប្រឈមនឹងការកើនឡើងនូវវិសមភាពនិងភាពក្រីក្រ»។
អត្ថបទនោះបានគូសបញ្ជាក់ថា ការរាតត្បាតនៃជំងឺនេះធ្វើឱ្យរោងចក្រមួយចំនួនឈានទៅដល់ការបិទទ្វារជាបណ្តោះអាសន្ន បញ្ឈប់បុគ្គលិកពីការងារ និងការមិនទទួលបានប្រាក់ពេលឈប់សម្រាក បានប៉ះពាល់ដល់ការរស់នៅប្រចាំថ្ងៃរបស់កម្មករផ្នែកកាត់ដេរប្រមាណ៩០ម៉ឺននាក់។
អង្គការអន្តរជាតិមួយនេះបន្តទៀតថា វិបត្តិនេះក៏បានធ្វើឱ្យកម្មករជាច្រើនខ្វះលទ្ធភាពក្នុងការទទួលបានកញ្ចប់សុវត្ថិភាពសង្គម ដូចជា គ្មានការងារធ្វើ ប្រឈមនឹងការធ្លាក់ទៅក្នុងភាពក្រីក្រ និងភាពអត់ឃ្លាន ហើយបញ្ហានេះបានជះឥទ្ធិពលដល់សមាជិកគ្រួសាររបស់ពួកគេ និងអ្នកប្រកបរបរសេដ្ឋកិច្ចក្រៅប្រព័ន្ធជុំវិញរោងចក្រផងដែរ៕