ប្រមុខរដ្ឋាភិបាល ក្នុងព្រះរាជពិធីបុណ្យ«រុក្ខទិវា» ថ្ងៃ០៩ ខែកក្កដានេះ បានអំពាវនាវដល់ប្រជាពលរដ្ឋទាំងអស់ចូលរួមដាំដុះនិងការពារព្រៃឈើឱ្យបានគង់វង្ស ដើម្បីជាប្រយោជន៍សម្រាប់មនុស្សគ្រប់ជំនាន់។
លោកនាយករដ្ឋមន្ត្រី ហ៊ុន សែន បានសរសេរនៅលើទំព័រហ្វេសប៊ុករបស់លោកថា ព្រះរាជពិធីបុណ្យ «រុក្ខទិវា» ត្រូវបានបង្កើតឡើងនៅក្នុងឆ្នាំ១៩៥២ ក្រោមព្រះរាជកិច្ចដឹកនាំរបស់ព្រះបរមរតនកោដ ព្រះមហាវីរក្សត្រ ព្រះករុណា ព្រះបាទសម្តេចព្រះនរោត្តម សីហនុ ក្នុងគោលបំណងបំផុសចលនាដាំដើមឈើឡើងវិញ និងឱ្យប្រជាពលរដ្ឋចូលរួមថែរក្សាសម្បត្ដិព្រៃឈើ ជាពិសេសដើម្បីបណ្តុះគំនិតថែរក្សា ការពារ និងគំនិតស្រឡាញ់ព្រៃឈើនិងបរិស្ថានធម្មជាតិរបស់ប្រទេស។
លោកសរសេរបន្ថែមថា៖ «សូមបងប្អូនប្រជាពលរដ្ឋខ្មែរទូទាំងប្រទេសចូលរួមស្រឡាញ់ថែរក្សា ការពារព្រៃឈើ និងចូលរួមដាំដុះកូនឈើ ថែរក្សាការពារបរិស្ថានធម្មជាតិឱ្យបានគង់វង្សនៅគ្រប់ទីកន្លែង ដើម្បីជាប្រយោជន៍ដល់ការរស់នៅរបស់ខ្លួនយើងផង សហគមន៍យើងផង និងជីវិតសត្វព្រៃគ្រប់ប្រភេទផង ព្រមទាំងប្រព័ន្ធជីវចម្រុះជាច្រើនផង ដែលជាសម្បត្តិរបស់មនុស្សជាតិនៅគ្រប់ជំនាន់»។
ប្រធានសម្របសម្រួលគម្រោងនៃបណ្ដាញយុវជនកម្ពុជា ហៅកាត់ថា (ប យ ក) លោក អូត ឡាទីន សាទរចំពោះការអំពាវនាវរបស់ប្រមុខរដ្ឋាភិបាល។
ស្របពេលគ្នានេះ លោកក៏បានស្នើឱ្យទម្លាក់ចោលនូវការចោទប្រកាន់នានានិងការធ្វើទុក្ខបុកម្នេញទៅលើសម្មជនបរិស្ថានដែលជាអ្នកសកម្មក្នុងការការពារព្រៃឈើនិងបរិស្ថានផងដែរ ដើម្បីឱ្យស្របទៅនឹងការអំពាវនាវរបស់ប្រមុខរដ្ឋាភិបាលដែលឱ្យពលរដ្ឋចូលរួមការពារព្រៃឈើនិងបរិស្ថាន។
លោកថា៖ «ក្រៅពីហ្នឹង ក៏ស្នើឱ្យរាជរដ្ឋាភិបាលផ្ដល់ឱកាសឱ្យបានទូលំទូលាយដល់សកម្មជនដែលគាត់កំពុងតែចូលរួមចំណែកក្នុងកិច្ចការការពារធនធានធម្មជាតិហ្នឹង ហើយទន្ទឹមនឹងស្នើសុំឱ្យធ្វើការដោះលែងទម្លាក់ចោលការចោទប្រកាន់គ្រប់បែបយ៉ាងទៅលើក្រុមសកម្មជនដែលបានជាប់ឃុំឃាំង ព្រោះយើងឃើញថា មានការអំពាវនាវ តែទន្ទឹមនឹងមានការអំពាវនាវឱ្យចូលរួមហ្នឹង ក៏មានការឃាត់ខ្លួនសកម្មជន ដូចយើងឃើញពីរបីខែមុនហ្នឹង មានការឃាត់ខ្លួនជាបន្តបន្ទាប់»។
ជាមួយគ្នានេះដែរ លោកក៏បានជំរុញឱ្យរដ្ឋាភិបាលអនុវត្តច្បាប់ឱ្យមានប្រសិទ្ធភាពនិងគួរចាត់វិធានការច្បាប់ទៅលើជនល្មើសដែលកាប់បំផ្លាញព្រៃឈើនិងធនធានធម្មជាតិ មិនមែនទៅចាប់ចងឬធ្វើទុក្ខបុកម្នេញដល់អ្នកដែលព្យាយាមថែរក្សាធនធានធម្មជាតិនោះទេ។
កាលពីថ្ងៃទី៨ ខែកក្កដាម្សិលមិញ អង្គការពន្លកខ្មែរ និងប្រជាសហគមន៍ប្រមាណ២០០នាក់ដែលរស់នៅជុំវិញព្រៃព្រះរការ នៅខេត្តព្រះវិហារ ក៏បានប្រារព្ធព្រះរាជពិធីបុណ្យ«រុក្ខទិវា»នេះផងដែរ។
ប្រធានគ្រប់គ្រងកម្មវិធីនៃអង្គការពន្លកខ្មែរ លោក តែម វ៉េន បានឱ្យដឹងនៅថ្ងៃសុក្រនេះថា ការដែលពួកគេរៀបចំបុណ្យរុក្ខាទិវានេះឡើង ក្នុងគោលបំណងរំឭកគុណនិងឧទ្ទិសដល់ព្រៃឈើដែលបានផ្ដល់ផលប្រយោជន៍ទៅដល់ប្រជាសហគមន៍ និងកៀរគរពីគ្រប់មជ្ឈដ្ឋានឱ្យចូលរួមស្រឡាញ់ ថែរក្សា និងការពារព្រៃឈើឱ្យបានគង់វង្ស៕