គណៈកម្មាធិការដើម្បីការបោះឆ្នោតដោយសេរីនិងយុត្តិធម៌នៅកម្ពុជា ហៅកាត់ថា ខុមហ្វ្រែល ជំរុញឱ្យគណបក្សនយោបាយនៅកម្ពុជាបង្កើនចំនួនកូតាស្ត្រីនៅក្នុងវិស័យនយោបាយឱ្យបាន៥០% ខណៈគណបក្សនយោបាយខ្លះថាបញ្ហាសមត្ថភាពគឺជាឧបសគ្គដ៏ធំមួយ។
នៅក្នុងរបាយការណ៍ស្ទង់មតិមួយចេញផ្សាយនៅថ្ងៃទី២៤ ខែមិថុនានេះ អង្គការខុមហ្រ្វែលបានរកឃើញថា ស្ត្រីក្នុងឆាកនយោបាយទាំងនៅក្នុងគណបក្សកាន់អំណាច អតីតគណបក្សប្រឆាំង និងគណបក្សដទៃទៀត ចំនួន ៧១% បានប្រឈមនឹងអំពើហិង្សាជាច្រើនទម្រង់និងច្រើនកម្រិត។ ទោះជាយ៉ាងនេះក្តី របាយការណ៍ថា ស្ត្រី ៨៥% បានអះអាងថា ពួកគេនៅតែមានឆន្ទៈខ្ពស់ក្នុងការចូលរួមធ្វើនយោបាយដដែលនៅ២ទៅ៣ឆ្នាំខាងមុខនេះ។
អ្នកសម្របសម្រួលកម្មវិធីអប់រំ និងយេនឌ័រ នៃអង្គការខុមហ្រ្វែល លោកស្រី សឺនកេត សិរីលក្ខណ៍ បានថ្លែងថា ផ្អែកតាមលទ្ធផលនៃការស្ទង់មតិនេះ លោកស្រីស្នើឱ្យគណបក្សនយោបាយនៅកម្ពុជាបង្កើនចំនួនកូតាស្ត្រីនៅក្នុងវិស័យនយោបាយឱ្យបាន ៥០% តាមរយៈការដាក់បេក្ខជនឆ្លាស់គ្នាទាំងបេក្ខជនពេញសិទ្ធិនិងបេក្ខជនបម្រុងនៅក្នុងការបោះឆ្នោតនៅពេលខាងមុខនេះ។
លោកស្រី សឺនកេត សិរីលក្ខណ៍ មានប្រសាសន៍យ៉ាងដូច្នេះថា៖ «នៅប្រទេសកម្ពុជា ស្ត្រីធ្វើកិច្ចការនយោបាយហ្នឹងនៅតែរងការរើសអើង ហើយរើសអើងកាន់តែខ្លាំងនៅពេលស្ត្រីនោះឈរឈ្មោះជាបេក្ខជននៅលេខរៀងខាងលើហ្នឹង»។
គណៈកម្មាធិការដើម្បីការបោះឆ្នោតដោយសេរីនិងយុត្តិធម៌នៅកម្ពុជា ហៅកាត់ថា ខុមហ្វ្រែល បានធ្វើការស្ទង់មតិទៅលើស្ត្រីនៅក្នុងវិស័យនយោបាយប្រមាណជា១០០នាក់ នៅក្នុងខេត្ត-ក្រុងចំនួន៣ គឺរាជធានីភ្នំពេញ ខេត្តបាត់ដំបង និងខេត្តកំពង់ឆ្នាំង ចាប់ពីខែកញ្ញា ដល់ខែវិច្ឆិកា ឆ្នាំ២០២០។
របាយការណ៍នេះបានផ្តល់អនុសាសន៍ឱ្យគណបក្សនយោបាយទទួលស្គាល់នូវតម្រូវការ ដើម្បីបង្កើតបរិយាកាសនយោបាយប្រកបដោយសុវត្ថិភាព និងធ្វើឱ្យមានសុវត្ថិភាពនៅក្នុងគណបក្សសម្រាប់ស្ត្រី អនុញ្ញាតឱ្យមានការដាក់បញ្ចូលចំនួនសមាជិកគណបក្សជាស្ត្រីឱ្យបានច្រើននៅគណៈកម្មាធិការកណ្តាល គណៈកម្មាធិការជ្រើសរើស និងគណៈកម្មាធិការសភា។ ជាពិសេស ជំរុញឱ្យរដ្ឋសភានិងព្រឹទ្ធសភាធានាបង្កើតច្បាប់បោះឆ្នោតដែលឆ្លើយតបនឹងយេនឌ័រ ទាំងច្បាប់ស្តីពីការបោះឆ្នោតជ្រើសតាំងតំណាងរាស្ត្រ និងច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលជាវិធានការពិសេស ដើម្បីលើកកម្ពស់សមភាពយេនឌ័រ និងផ្តល់ឱកាសឱ្យស្ត្រីចូលរួមដោយស្មើភាពនៅក្នុងវិស័យនយោបាយនិងការអនុវត្តច្បាប់នេះបានល្អ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងថា គណបក្សកាន់អំណាចបានផ្តល់ឱកាសច្រើនដល់ស្ត្រីនៅក្នុងវិស័យនយោបាយប្រមាណជាង២០%។ ក៏ប៉ុន្តែលោកយល់ថា ស្ត្រីត្រូវបង្កើនសមត្ថភាពផ្ទាល់ខ្លួនផងដែរ។
លោកមានប្រសាសន៍យ៉ាងដូច្នេះថា៖ «ដោយសារស្ត្រីមានតួនាទីសំខាន់នៅក្នុងសេដ្ឋកិច្ចសង្គមកម្ពុជា ទើបគណបក្សប្រជាជនកម្ពុជាមានគោលនយោបាយលើកកម្ពស់តួនាទីស្ត្រីក្នុងសង្គមកម្ពុជា ដូចជា តាមស្ថាប័នរដ្ឋនានាសុទ្ធតែត្រូវបានតែងតាំងជាស្ត្រីមានអត្រាកើនឡើងខ្ពស់ជាងពីពេលមុនៗ ដូចយើងឃើញស្រាប់ហើយនៅក្នុងរដ្ឋសភាមានប្រមាណជាង ២០% នៅក្នុងព្រឹទ្ធសភាក៏មានជាង ២០% ហើយនៅក្នុងក្រុមប្រឹក្សាឃុំសង្កាត់ហ្នឹងក៏ជាង ២០% ហើយនៅតាមស្ថាប័នក្រសួងមន្ទីរនានា ការតែងតាំងស្ត្រីឱ្យជាមេដឹកនាំហ្នឹងក៏មានចំនួនកាន់តែច្រើនឡើងដែរ»។
ចំណែកលោក អ៊ុំ សមន្ថា អនុប្រធាន «គណបក្សខ្មែររួបរួមជាតិ» របស់លោក ញឹក ប៊ុនឆៃ បានថ្លែងដែរថា ការបង្កើនចំនួនកូតាស្ត្រីនៅក្នុងវិស័យនយោបាយឱ្យបាន៥០% ទំនងជាមិនទាន់អាចធ្វើបាននៅពេលនេះទេ។
លោកបានថ្លែងថា៖ «យើងមានគម្រោងធ្វើបែបនេះ ក៏ប៉ុន្តែជួនកាលលទ្ធភាពយើងស្ត្រីយើងមានការខ្វះដែរ ពីព្រោះបញ្ហាទាំងអស់ហ្នឹង វាស៊ីសងនឹងសមាជិករបស់យើងនៅថ្នាក់មូលដ្ឋានហ្នឹងលោកបានចូលរួមជាមួយយើង ហើយភាគច្រើនស្ត្រីគាត់នៅមានភាពស្រពេចស្រពិលខ្លះ អ៊ីចឹងហើយយើងមិនអាចបង្ខំគាត់បានទេដល់៥០លើ៥០%ហ្នឹង»។
រីឯកញ្ញា ស៊ិន ចាន់ពៅរ៉ូហ៊្សេត អតីតចៅសង្កាត់ជាប់ឆ្នោតអតីតគណបក្សសង្គ្រោះជាតិ បានថ្លែងថា ចាប់តាំងពីមានការរំលាយអតីតគណបក្សសង្គ្រោះជាតិមក កញ្ញាបានរងអំពើហិង្សាទាំងផ្លូវកាយនិងផ្លូវចិត្តជារឿយៗ។ កញ្ញាបានបន្តថា បរិយាកាសនយោបាយបច្ចុប្បន្ន គឺមិនអាចធ្វើឱ្យស្ត្រីចូលរួមនៅក្នុងឆាកនយោបាយច្រើននោះទេ។
កញ្ញាបានថ្លែងយ៉ាងដូច្នេះថា៖ «ចាប់តាំងពីរំលាយគណបក្សសង្គ្រោះជាតិ ខ្ញុំរងការគំរាមកំហែងផ្នែកសន្តិសុខផ្ទាល់ខ្លួនរបស់នាងខ្ញុំ និងផ្លូវចិត្តរបស់ខ្ញុំ ដូចអំពីនាងខ្ញុំមកធ្វើជាប្រជាពលរដ្ឋធម្មតា សាមញ្ញហើយ ក៏មានការយាយីពីសំណាក់ពួកអ្នកមានអំណាចដែលមាននិន្នាការនយោបាយផ្សេងគ្នា ការយល់ផ្សេងគ្នាផងដែរ ហើយមានអ្នករំខានគ្រប់រូបភាពទាំងអស់»។
បើតាមអង្គការខុមហ្រ្វែល ស្ត្រីកម្ពុជានៅតែប្រឈមមុខច្រើនទម្រង់នៃការរើសអើង និងអំពើហិង្សាប្រឆាំងនឹងពួកគេក្នុងការចូលរួមនិងផលប្រយោជន៍នយោបាយរបស់ពួកគេ ដែលនេះជាបញ្ហាធ្ងន់ធ្ងរ ទោះបីជាសិទ្ធិនយោបាយនិងការចូលរួមរបស់ពួកគេត្រូវបានធានាយ៉ាងពេញលេញដោយរដ្ឋធម្មនុញ្ញនៃព្រះរាជាណាចក្រកម្ពុជា និងអនុសញ្ញាអន្តរជាតិស្តីពីការលុបបំបាត់រាល់ទម្រង់នៃការរើសអើងប្រឆាំងនឹងស្ត្រី (CEDAW) ក៏ដោយ។ ភាពជាតំណាងនិងការចូលរួមប្រកបដោយអត្ថន័យរបស់ស្ត្រីកម្ពុជាក្នុងវិស័យនយោបាយនិងភាពជាអ្នកដឹកនាំនយោបាយនៅមានកម្រិតទាបនៅឡើយ បើប្រៀបធៀបជាមួយសមភាគីបុរសនៅគ្រប់កម្រិត៕
