ប្រទេសធំៗចំនួន៣ សន្យានឹងផ្តល់មូលនិធិប្រមាណ១៣លានដុល្លារអាមេរិក ឱ្យគណៈកម្មការទន្លេមេគង្គ (ហៅកាត់ថា MRC) ដើម្បីគាំទ្រដល់ប្រទេសកម្ពុជា ឡាវ ថៃ និងវៀតណាម ឆ្លើយតបទៅនឹងបញ្ហាប្រឈមជាបន្ទាន់នានានៅអាងទន្លេមេគង្គ និងធ្វើឱ្យជីវភាពរស់នៅរបស់ប្រជាពលរដ្ឋមានភាពប្រសើរឡើង។
យោងតាមសេចក្ដីប្រកាសព័ត៌មានរបស់គណៈកម្មការទន្លេមេគង្គ ចេញផ្សាយនៅថ្ងៃទី២៤ ខែមិថុនា ឆ្នាំ២០២១ ឱ្យដឹងថា មូលនិធិប្រមាណ១៣លានដុល្លារដែលនឹងផ្តល់ឱ្យ MRC ពីសំណាក់ប្រទេសធំៗចំនួន៣នោះ រួមមាន ប្រទេសអូស្ត្រាលី ប្រមាណ៣,៨លានដុល្លារ ដែលជំនួយនេះសម្រាប់រយៈពេល៥ឆ្នាំ ពីឆ្នាំ២០២១ដល់២០១៥ និងអាល្លឺម៉ង់ប្រមាណ៣,៥៥លានដុល្លារ សម្រាប់រយៈពេល៣ឆ្នាំ ចាប់ពីឆ្នាំ២០២២ និងប្រទេសស្វីស ប្រមាណ៥,៣លានដុល្លារ សម្រាប់គាំទ្រផែនការយុទ្ធសាស្ត្រថ្មីរយៈពេល៥ឆ្នាំ។
MRC បន្តថា ការផ្តល់វិភាគទាននេះ ធ្វើឡើងស្របពេលដែល MRC ចាប់ផ្តើមអនុវត្តផែនការយុទ្ធសាស្ត្រ៥ឆ្នាំ (២០២១-២០២៥) របស់ខ្លួន នៅក្រោមទិសដៅថ្មីមួយសំដៅយកឈ្នះលើការគំរាមកំហែងជាច្រើនដែលអាងទន្លេនេះកំពុងជួបប្រទះ។
ស្ថាប័ននេះ ក៏នឹងបន្តជំរុញកិច្ចសន្ទនាថ្នាក់តំបន់ក្នុងចំណោមប្រទេសតាមអាងទន្លេ និងធ្វើឱ្យការចូលរួមចំណែកជាមួយនឹងប្រទេសចិនកាន់តែស៊ីជម្រៅ ក៏ដូចជាជាមួយនឹងដៃគូផ្សេងៗទៀត តាមរយៈកិច្ចសហប្រតិបត្តិការអាស៊ាន និងឡានឆាង-មេគង្គ សម្រាប់ជាប្រយោជន៍ដល់សមាជិកទាំងអស់។
លោកបណ្ឌិត អាន ពេជ្រហត្ថដា នាយកប្រតិបត្តិនៃលេខាធិការដ្ឋាន MRC ត្រូវបានស្រង់ប្រសាសន៍តាមរយៈសេចក្តីប្រកាសព័ត៌មាននោះថា៖ «ការគាំទ្រនេះ មកទាន់ពេលវេលា និងមានសារៈសំខាន់ខ្លាំងណាស់សម្រាប់ MRC ក្នុងការអនុវត្តសកម្មភាពនានា ដែលធ្វើឱ្យមានតុល្យភាពលើតម្រូវការនៃការអភិវឌ្ឍសេដ្ឋកិច្ច ការធ្វើឱ្យសង្គមប្រសើរឡើង និងការគាំពារដល់បរិស្ថាន»។
ឯកអគ្គរដ្ឋទូតអូស្ត្រាលីប្រចាំប្រទេសឡាវ លោក ផល ខែលី (Paul Kelly) បានលើកឡើងក្នុងសេចក្តីព័ត៌មាននោះថា៖ «ជំនួយមូលនិធិទាំងនេះ នឹងជួយបង្កើនលទ្ធភាពដល់ MRC និងប្រទេសជាសមាជិកឱ្យប្រើប្រាស់ធនធានទឹកនិងធនធានពាក់ព័ន្ធនៃទន្លេមេគង្គ ប្រកបដោយបរិយាប័ន្ន និងដោយចីរភាព ដើម្បីជាចំណែកមួយជួយដល់ការស្តារសេដ្ឋកិច្ចឡើងវិញពីការរាតត្បាតជាសាកល ការកសាងភាពធន់ផ្នែកបរិស្ថាន និងការពង្រឹងកិច្ចសហប្រតិបត្តិការតំបន់»។
លោក ហ្សង់ហ្វង់ស័រ ឃូនូ (Jean-François Cuénod) នាយកតំបន់នៃទីភ្នាក់ងារស្វីសសម្រាប់អភិវឌ្ឍន៍ និងកិច្ចសហប្រតិបត្តិការ បានអបអរចំពោះ MRC ក្នុងការដាក់ឱ្យប្រើប្រាស់នូវយុទ្ធសាស្ត្រចក្ខុវិស័យថ្មីៗដែលចាំបាច់សម្រាប់អាងទន្លេមេគង្គ។
លោកថា៖ «យើងនឹងរួមសហការជាមួយនឹង MRC ប្រទេសជាសមាជិក និងដៃគូអភិវឌ្ឍន៍ផ្សេងទៀត ក្នុងការផ្លាស់ប្តូរតំបន់នេះឆ្ពោះទៅកាន់មាគ៌ាមួយដែលកាន់តែមានចីរភាពនិងភាពធន់ ដោយធានាថា គ្មាននរណាម្នាក់នឹងត្រូវបោះបង់ចោលនោះទេ»។
ចំណែកលោក យេនស៍ លូធខិនហែម (Jens Lütkenherm) ឯកអគ្គរដ្ឋទូតអាល្លឺម៉ង់ប្រចាំប្រទេសឡាវ បានថ្លែងថា មូលនិធិនេះនឹងជួយ MRC ឱ្យបង្កើតនូវបណ្តាញស្នូលសម្រាប់កិច្ចការតាមដានទន្លេក្នុងតំបន់ទន្លេមេគង្គ។
លោកថា៖ «ហើយជាលទ្ធផល វារួមចំណែកដល់ការសម្រេចចិត្តដោយផ្អែកលើព័ត៌មាន សម្រាប់ការគ្រប់គ្រងនិងអភិវឌ្ឍន៍ធនធានទឹក និងជួយបង្កើនសមត្ថភាព MRC ក្នុងការគ្រប់គ្រងគ្រោះទឹកជំនន់និងគ្រោះរាំងស្ងួតឱ្យកាន់តែមានប្រសិទ្ធភាព»។
បើតាមសេចក្តីជូនដំណឹង ផែនការយុទ្ធសាស្ត្រ៥ឆ្នាំរបស់ MRC ជាឧបករណ៍ដ៏ចាំបាច់មួយសម្រាប់ឱ្យគណៈកម្មការ អនុវត្តយុទ្ធសាស្ត្រអភិវឌ្ឍន៍អាងថ្មីមួយដែលមានរយៈពេល១០ឆ្នាំ ដែលតំណាងឱ្យរបត់ដ៏សំខាន់មួយសម្រាប់អាងទន្លេមេគង្គ៕