រដ្ឋមន្ត្រីការបរទេសអង់គ្លេសបានសន្យាថា នឹងបញ្ជូនក្រុមបេសកកម្មជំនាញមកកម្ពុជា ដើម្បីសិក្សាពីតម្រូវការនិងជួយធ្វើឱ្យកាន់ប្រសើរឡើងនូវវិស័យបរិស្ថាននិងធនធានធម្មជាតិ។
ការលើកឡើងនេះ ធ្វើឡើងនៅក្នុងជំនួបពិភាក្សារវាងរដ្ឋមន្ត្រីការបរទេស និងអភិវឌ្ឍន៍ នៃចក្រភពអង់គ្លេស លោក ដូមីនិក រ៉ាអាប់ (Dominic Raab) និងរដ្ឋមន្ត្រីក្រសួងបរិស្ថាន លោក សាយ សំអាល់ នៅព្រឹកថ្ងៃទី២៣ ខែមិថុនា ឆ្នាំ២០២១ នៅទីស្តីការក្រសួងបរិស្ថាន ក្នុងអំឡុងពេលរដ្ឋមន្ត្រីរូបនេះកំពុងធ្វើទស្សនកិច្ចផ្លូវការនៅកម្ពុជា។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា បានប្រាប់ក្រុមអ្នកសារព័ត៌មានតាមបណ្តាញសង្គមតេឡេក្រាមថា ក្នុងជំនួបនោះ ភាគីទាំងពីរបានពិភាក្សាពីប្រធានបទមួយចំនួនទាក់ទងនឹងវិស័យបរិស្ថាន ដូចជា ការប្រយុទ្ធប្រឆាំងនឹងការប្រែប្រួលអាកាសធាតុ និងការចូលរួមរបស់កម្ពុជាក្នុងកិច្ចប្រជុំ COP26 ស្តីពីការប្រែប្រួលអាកាសធាតុ និងកិច្ចការអាទិភាពនានាដែលប្រទេសទាំងពីរនឹងធ្វើរួមគ្នាលើការអភិរក្សធនធានធម្មជាតិ ជីវចម្រុះ ការប្រយុទ្ធប្រឆាំងនឹងការជួញដូរសត្វព្រៃឆ្លងដែន និងការប្រើប្រាស់ថាមពលកកើតឡើងវិញជាដើម។
លោកបន្តថា ក្នុងជំនួបនោះដែរ រដ្ឋមន្ត្រីការបរទេសអង់គ្លេសសន្យាថា នឹងបញ្ជូនក្រុមបេសកកម្មជំនាញមកកម្ពុជា ដើម្បីសិក្សាពីតម្រូវការរបស់កម្ពុជា ដើម្បីធ្វើឱ្យកាន់តែប្រសើរឡើងក្នុងវិស័យបរិស្ថាននិងធនធានធម្មជាតិ។
អ្នកនាំពាក្យរូបនោះបន្តថា ជាការឆ្លើយតប រដ្ឋមន្ត្រីក្រសួងបរិស្ថានកម្ពុជាបានស្វាគមន៍ចំពោះគំនិតផ្តួចផ្តើមនេះ និងបានស្នើដល់ចក្រភពអង់គ្លេសជួយដល់ការបណ្តុះបណ្តាលធនធានមនុស្សក្នុងកិច្ចការបរិស្ថាននិងធនធានធម្មជាតិ បង្កើនភាពជាដៃគូផ្នែកពាណិជ្ជកម្ម និងទិញផលិតផលពីប្រទេសកម្ពុជា។
លោកបន្តទៀតថា ថ្នាក់ដឹកនាំក្រសួងក៏បានស្នើដល់អង់គ្លេសទិញឥណទានកាបូនពីកម្ពុជាផងដែរ ដោយថវិកាបានមកពីការលក់កាបូននោះ នឹងត្រូវប្រើប្រាស់ដើម្បីបម្រើឱ្យការអភិរក្សព្រៃឈើនិងសត្វព្រៃ និងការអភិវឌ្ឍសេដ្ឋកិច្ចមូលដ្ឋានតាមរយៈការផ្តល់ជម្រើសថ្មី មុខរបរ និងចំណូលសម្រាប់ប្រជាពលរដ្ឋ។
តាមគម្រោង រដ្ឋមន្ត្រីការបរទេសអង់គ្លេសនឹងបញ្ចប់ដំណើរទស្សនកិច្ចនៅកម្ពុជានៅថ្ងៃទី២៤ ខែមិថុនា ដោយបន្តដំណើរទៅកាន់ប្រទេសសិង្ហបុរី។
ក្នុងដំណើរទស្សនកិច្ចរបស់រដ្ឋមន្ត្រីការបរទេសអង់គ្លេសមកកម្ពុជា នៅថ្ងៃនេះ អង្គការឃ្លាំមើលសិទ្ធិមនុស្សអន្តរជាតិ (HRW) ក៏បានជំរុញឱ្យរដ្ឋមន្ត្រីការបរទេសអង់គ្លេស លោក ដូមីនិក រ៉ាអាប់ (Dominic Raab) លើកឡើងពីបញ្ហាសិទ្ធិមនុស្ស លំហលទ្ធិប្រជាធិបតេយ្យ និងទាមទារឱ្យអាជ្ញាធររដ្ឋាភិបាលកម្ពុជាទម្លាក់ចោលការចោទប្រកាន់និងដោះលែងដោយឥតលក្ខខណ្ឌចំពោះសកម្មជនបរិស្ថាននិងអ្នកទោសនយោបាយប្រមាណជា៧០នាក់ដែលកំពុងជាប់ពន្ធនាគារផងដែរ។
លោក ហ្វីល រ៉ូប៊ឺតសុន (Phil Robertson) បានរំឭកលោករដ្ឋមន្ត្រីការបរទេសអង់គ្លេសថា នៅមុនដំណើរទស្សនកិច្ចនេះ អាជ្ញាធររដ្ឋាភិបាលកម្ពុជាបានចោទប្រកាន់សកម្មជនបរិស្ថានមាតាធម្មជាតិ ៤នាក់ ពីបទ«ប្រមាថព្រះមហាក្សត្រ» និង «រួមគំនិតក្បត់»។ សកម្មជនបរិស្ថាន ៣នាក់ រួមមាន យុវជន លី ចាន់ដារ៉ាវុទ្ធ អាយុ២២ឆ្នាំ យុវជន យឹម លាងហ៊ី អាយុ៣២ឆ្នាំ និងកញ្ញា ស៊ុន រដ្ឋា អាយុ២៦ឆ្នាំ ត្រូវបញ្ជូនទៅឃុំខ្លួននៅក្នុងពន្ធនាគារព្រៃស ដើម្បីរង់ចាំការកាត់ទោស ខណៈយុវជនម្នាក់ទៀតត្រូវបានសមត្ថកិច្ចដោះលែងវិញ។
តែយ៉ាងណា បើតាមលទ្ធផលជំនួបដែលផ្សព្វផ្សាយដោយក្រសួងបរិស្ថាននេះ គឺពុំបានឃើញលើកឡើងពីបញ្ហាការចាប់ខ្លួនសកម្មជនបរិស្ថានវ័យក្មេងទាំង៣នាក់នោះទេ៕