អង្គការគាំពារអ្នកកាសែតចំនួនពីរ បានអំពាវនាវឱ្យអាជ្ញាធរកម្ពុជាបញ្ឈប់ការគំរាមកំហែង និងធ្វើទុក្ខបុកម្នេញទៅលើអ្នកសារព័ត៌មានឯករាជ្យនៅពេលពួកគេចុះបំពេញការងារ។
នៅក្នុងសេចក្តីថ្លែងការណ៍របស់ខ្លួននៅថ្ងៃទី១៩ ខែមិថុនានេះ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងសមាគមសម្ព័ន្ធអ្នកសារព័ត៌មានកម្ពុជា (ខេមបូចា) បានបង្ហាញការព្រួយបារម្ភជាខ្លាំង បន្ទាប់ពីអ្នកសារព័ត៌មានវីអូឌី (VOD) ត្រូវបានអាជ្ញាធររារាំង និងគំរាមកំហែងជាបន្តបន្ទាប់ នៅពេលពួកគេចុះទៅបំពេញការងារ។
បើតាមសេចក្តីថ្លែងការណ៍របស់អង្គការគាំពារអ្នកកាសែតទាំងពីរខាងលើនេះបានឱ្យដឹងថា កាលពីថ្ងៃទី១៨ ខែមិថុនា ម្សិលមិញនេះ អាជ្ញាធរខណ្ឌព្រែកព្នៅជាង១០នាក់ ដឹកនាំដោយអភិបាលខណ្ឌ បានរារាំងនិងគំរាមអ្នកថតវីដេអូម្នាក់របស់វីអូឌីនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ដែលបានចុះទៅផ្ដិតយកទិដ្ឋភាពចំណតបណ្ដោះអាសន្ននៃផ្ទះបណ្ដែតទឹកនិងបែចិញ្ចឹមត្រីរបស់ជនជាតិវៀតណាមដែលអាជ្ញាធរជម្លៀសចេញពីទីតាំងមួយចំនួននៅក្នុងរាជធានីភ្នំពេញ។ លើសពីនេះ ក្រុមសមត្ថកិច្ចក៏បានថតរូបនិងបណ្ណសម្គាល់ខ្លួនរបស់អ្នកថតវីដេអូរូបនេះ ហើយគំរាមថា គាត់នឹងមានបញ្ហាប្រសិនបើមានរូបភាព ឬវីដេអូណាមួយត្រូវបានផ្សព្វផ្សាយ។
ករណីនេះបានកើតឡើងតែមួយសប្ដាហ៍ប៉ុណ្ណោះ បន្ទាប់ពីអ្នកសារព័ត៌មានវីអូឌីផ្សេងទៀត ត្រូវបានរារាំងនិងគំរាមកំហែងក្នុងហេតុការណ៍ដាច់ដោយឡែកមួយទៀត។ កាលពីព្រឹកថ្ងៃទី១១ ខែមិថុនា អ្នកសារព័ត៌មាននិងអ្នកថតវីដេអូរបស់វីអូឌីបានចុះទៅរាយការណ៍អំពីការដាក់ញត្តិរបស់ភរិយាអតីតសកម្មជនគណបក្សសង្គ្រោះជាតិប្រមាណ១០នាក់ ទៅកាន់តំណាងសហគមន៍អឺរ៉ុប (EU)។ អាជ្ញាធរខណ្ឌដូនពេញដែលមានគ្នាប្រមាណ៦០នាក់ បានហាមមិនឱ្យអ្នកសារព័ត៌មានថតរូបនិងវីដេអូ ដោយព្រមានថា នឹងដកសម្ភារៈ និងបញ្ជូនទៅសាលាខណ្ឌប្រសិនជាហ៊ានល្មើស។ ចំណែកកាលពីថ្ងៃទី១១ ខែឧសភាកន្លងទៅ អាជ្ញាធរខេត្តពោធិ៍សាត់ដែលដឹកនាំដោយអភិបាលរងខេត្តម្នាក់ ក៏បានដកយកសម្ភារៈនិងហាមឃាត់អ្នកសារព័ត៌មានវីអូឌីម្នាក់មិនឱ្យថតរូប សកម្មភាពពលរដ្ឋនៅខេត្តកំពង់ឆ្នាំងតវ៉ាបិទកំណាត់ផ្លូវជាតិលេខ៥ ដែលជាប់ព្រំប្រទល់ខេត្តពោធិ៍សាត់ ដើម្បីទាមទារឱ្យអាជ្ញាធរដោះស្រាយវិវាទដីធ្លីរបស់ពួកគេផងដែរ។
សកម្មភាពរារាំង និងការគំរាមកំហែងទាំងអស់ខាងលើនេះពីសំណាក់អាជ្ញាធរ គឺជាការគំរាមកំហែងយ៉ាងធ្ងន់ធ្ងរដល់សេរីភាពសារព័ត៌មាន ដែលផ្ទុយនឹងរដ្ឋធម្មនុញ្ញនិងច្បាប់ស្ដីពីរបបសារព័ត៌មានដែលបានធានាដល់សិទ្ធិសេរីភាពនិងវិជ្ជាជីវៈសារព័ត៌មាន។
ស៊ីស៊ីអាយអឹម (CCIM) ដែលជាអង្គការមិនមែនរដ្ឋាភិបាលលើកកម្ពស់សារព័ត៌មានឯករាជ្យនិងសេរីភាពបញ្ចេញមតិ និងខេមបូចា (CamboJA) ដែលមានសមាជិកសមាជិកាជា អ្នកសារព័ត៌មានប្រមាណជាង១០០នាក់ ជំរុញជាថ្មីដល់រាជរដ្ឋាភិបាលឱ្យបញ្ឈប់នូវសកម្មភាពរបស់សមត្ថកិច្ចដែលធ្វើទុក្ខបុកម្នេញអ្នកសារព័ត៌មានដោយជំនួសមកវិញនូវការធានាសុវត្ថិភាពនិងសន្តិសុខដល់អ្នកសារព័ត៌មានគ្រប់រូប ដើម្បីឱ្យពួកគេអាចអនុវត្តសិទ្ធិសេរីភាព និងបំពេញវិជ្ជាជីវៈបានត្រឹមត្រូវ ដើម្បីចូលរួមរាយការណ៍ពីរឿងរ៉ាវ និងបទល្មើសនានាដែលកំពុងកើតមានឡើងនៅក្នុងសង្គមដោយមិនមានការភ័យខ្លាច។
ក្រៅពីមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងសមាគមសម្ព័ន្ធអ្នកសារព័ត៌មានកម្ពុជា (ខេមបូចា) សហព័ន្ធអ្នកកាសែតអន្តរជាតិ (IFJ) និងបណ្តាញអ្នកកាសែតអាស៊ីអាគ្នេយ៍ ក៏បានចេញសេចក្តីថ្លែងការណ៍មួយកាលពីថ្ងៃទី១៨ ខែមិថុនា ម្សិលមិញនេះ បានអំពាវនាវឱ្យរដ្ឋាភិបាលនៅក្នុងប្រទេសនីមួយនៅក្នុងតំបន់អាស៊ាន ត្រូវការពារអ្នកកាសែតក្នុងពេលចុះបំពេញការងារ ខណៈការរីករាលដាលនៃជំងឺកូវីដ១៩។ សេចក្តីថ្លែងការណ៍នេះ បានធ្វើឡើងបន្ទាប់ពីមានកិច្ចប្រជុំសមាជិកអ្នកកាសែតមកពីប្រទេសកម្ពុជា ឥណ្ឌូនេស៊ី ម៉ាឡេស៊ី មីយ៉ាន់ម៉ា ហ្វ៊ីលីពីន ទីម័រខាងកើត និងអ្នកកាសែតមកពីប្រទេសថៃផងដែរ។
វីអូឌី ទាក់ទងសុំការឆ្លើយតបពីអ្នកនាំពាក្យក្រសួងព័ត៌មានលោក មាស សុភ័ណ្ឌ មិនទាន់បាននៅឡើយទេ គិតត្រឹមល្ងាចសៅរ៍ ទី១៩ ខែមិថុនានេះ។ ចំណែកលោក ផៃ ស៊ីផាន អ្នកនាំពាក្យរដ្ឋាភិបាលក៏មិនអាចទាក់ទងសុំការបំភ្លឺជុំវិញការបំពេញការងាររបស់អាជ្ញាធរមូលដ្ឋាននេះ។
កាលពីខែមេសា ឆ្នាំ២០២១ អង្គការអ្នកកាសែតគ្មានព្រំដែន បានបន្តផ្តល់ចំណាត់ថ្នាក់សេរីភាពសារព័ត៌មាននៅកម្ពុជា ឆ្នាំ២០២០ ស្ថិតនៅលេខរៀងទី១៤៤ ក្នុងចំណោម១៨០ប្រទេស នៅលើពិភពលោក ដែលចំណាត់ថ្នាក់នេះ ស្ថិតនៅក្នុងស្ថានភាពលំបាកដដែលបើប្រៀបធៀបនឹងឆ្នាំ២០១៩។ យោងតាមសន្ទស្សន៍សេរីភាពសារព័ត៌មានពិភពលោក របស់ អង្គការអ្នកកាសែតគ្មានព្រំដែន នៅឆ្នាំ២០២០នេះ បានរកឃើញថា ការងាររបស់អ្នកសារព័ត៌មានត្រូវបានរារាំងទាំងស្រុងឬយ៉ាងធ្ងន់ធ្ងរ នៅក្នុងប្រទេសចំនួន៧៣ ខណៈការរារាំងនៅក្នុងប្រទេសចំនួន៥៩ផ្សេងទៀតមានសភាពដោយផ្នែក។ បើតាម អង្គការអ្នកកាសែតគ្មានព្រំដែន រដ្ឋាភិបាលនៃប្រទេសជាច្រើនបានប្រើប្រាស់វិធានការទប់ស្កាត់ការរាតត្បាតនៃជំងឺឆ្លងកូវីដ-១៩ ដើម្បីបង្កើនការបង្ក្រាបទៅលើអ្នកសារព័ត៌មាន។ ក្នុងចំណោមប្រទេស១០នៅអាស៊ាន ប្រទេសថៃបានកើនឡើង៣លេខ ស្ថិតនៅចំណាត់ថ្នាក់ទី១៣៧ ហ្វីលីពីនធ្លាក់ចុះ២លេខ ស្ថិតនៅចំណាត់ថ្នាក់ទី១៣៨ ឥណ្ឌូនេស៊ីកើន៦លេខ ស្ថិតនៅចំណាត់ថ្នាក់ទី១១៣ ខណៈប្រទេសកម្ពុជាស្ថិតនៅចំណាត់ថ្នាក់លេខ១៤៤៕
