ប្រជាពលរដ្ឋខ្មែរឥស្លាមរស់នៅភូមិចុងកោះ សង្កាត់ជ្រោយចង្វារ ខណ្ឌជ្រោយចង្វារ ស្នើអាជ្ញាធររាជធានីភ្នំពេញ ពន្យារពេលឱ្យគាត់រុះរើផ្ទះបណ្តែតទឹកដូចពលរដ្ឋជនជាតិវៀតណាមដែរ ខណៈអាជ្ញាធរទុកពេលឱ្យពួកគាត់រុះរើចេញត្រឹមរយៈពេល៣ថ្ងៃ។
តំណាងសហគមន៍នេសាទខ្មែរឥស្លាមនៅភូមិចុងកោះ សង្កាត់ជ្រោយចង្វារ លោក អ៊ី យូ មានប្រសាសន៍នៅថ្ងៃទី១៧ ខែមិថុនានេះថា អាជ្ញាធរខណ្ឌជ្រោយចង្វារ កាលពីថ្ងៃម្សិលមិញ បានប្រាប់ប្រជាពលរដ្ឋខ្មែរឥស្លាមជាង១៥០គ្រួសារឱ្យរុះរើផ្ទះបណ្តែតទឹករបស់ខ្លួនចេញពីមាត់ច្រាំងទន្លេក្នុងតំបន់នេះ ចាប់ពីថ្ងៃនេះទៅ ដោយទុករយៈពេលឱ្យត្រឹម៣ថ្ងៃប៉ុណ្ណោះ។
លោកបន្តថា៖ «ចំពោះគោលដៅដែលឱ្យទៅ [ភូមិសាស្រ្តតំបន់ក្អមសំណ] វាមិនអាចទៅបានទេ! អ៊ីចឹងប្រជាជនដែលគាត់នៅកន្លែងណា គឺនៅកន្លែងហ្នឹងសិនទៅ រកកន្លែងរៀងៗខ្លួនទៅ […] ទៅមិនបាន ព្រោះទន្លេវាធំ មានខ្យល់ភ្លៀងព្យុះ ទន្លេធំជាងទន្លេបួនមុខនៅមុខវាំងនេះទៅទៀត»។
បើតាមលោក អ៊ី យូ អាជ្ញាធរខណ្ឌបានប្រាប់ដល់ពលរដ្ឋខ្មែរឥស្លាមនៅតំបន់នោះឱ្យរុះរើនិងផ្លាស់ប្តូរទីតាំងផ្ទះបណ្តែតទឹករបស់ពួកគាត់ នៅតំបន់ក្អមសំណ ស្ថិតក្នុងស្រុកលើកដែក ខេត្តកណ្តាល ជាបណ្តោះអាសន្ន ប៉ុន្តែត្រូវពលរដ្ឋបដិសេធនិងតវ៉ាសុំពន្យារពេលការរុះរើនេះសិន។
ស្ត្រីជនជាតិខ្មែរឥស្លាម រស់នៅលើផ្ទះបណ្តែតទឹក ក្នុងខណ្ឌជ្រោយចង្វារ អ្នកស្រី មី ស៊ីម៉ាស់ បានលើកឡើងថា ពួកគាត់ធ្លាប់រស់នៅតំបន់នេះជាច្រើនឆ្នាំមកហើយ ហើយបើឱ្យពួកគាត់រុះរើចេញពីទីនេះ ពួកគាត់ពុំដឹងទៅរស់នៅទីណានោះទេ។ ករណីនេះ អ្នកស្រីបានស្នើដល់អាជ្ញាធរខណ្ឌដោះស្រាយទីតាំងថ្មីសម្រាប់ពួកគាត់បានរស់នៅសមរម្យ មុននឹងឱ្យពួកគាត់ធ្វើការរុះរើ។
អ្នកស្រីថា៖ «ខ្ញុំអត់ទៅណាទេ ទីតាំងខ្ញុំនៅហ្នឹង លុះត្រាតែខាងឃុំសង្កាត់ដោះស្រាយឱ្យខ្ញុំ។ ហើយសម័យកូវីដហ្នឹង ខ្ញុំទៅណាក៏គេមិនទទួលពួកខ្ញុំដែរ ទៅកន្លែងណាក៏គេដេញពួកខ្ញុំដែរ ហើយឱ្យពួកខ្ញុំទៅឯណា? យួនចេះពន្យារពេលឱ្យបាន ចុះខ្មែរឥស្លាមដូចជនជាតិខ្មែរដូចគ្នានេះ អត់រកកន្លែងឱ្យពួកខ្ញុំនៅ ហើយខ្ញុំបានកន្លែងណានៅ»។
ចំណែកពលរដ្ឋខ្មែរឥស្លាមម្នាក់ទៀត លោក យ៉ា សុខលិស ប្រាប់ វីអូឌី នៅថ្ងៃនេះថា ពលរដ្ឋមួយចំនួនក្នុងតំបន់នោះ បានរុះរើពីទីតាំងចាស់ជាបណ្តើរៗហើយ ទៅកាន់ទីតាំងថ្មីនៅចំណុចក្អមសំណ ក្រោយពីអាជ្ញាធរកំណត់ពន្យារពេលឱ្យពួកគាត់ត្រឹមតែ៣ថ្ងៃប៉ុណ្ណោះ។ ប៉ុន្តែលោកថា ក៏មានពលរដ្ឋខ្លះទៀតមិនបានទៅតាមគោលដៅដែលអាជ្ញាធរកំណត់ឱ្យដែរ ព្រោះទីនោះទឹកទន្លេធំ ដែលធ្វើឱ្យពួកគាត់ពិបាកក្នុងការរស់នៅនិងប្រកបរបរនេសាទដើម្បីចិញ្ចឹមជីវិត។
លោកបន្តថា៖ «មិនមែនពួកខ្ញុំមិនចង់រុះរើទៅទេ ប៉ុន្តែសុំឱ្យមានដំណោះស្រាយសមរម្យមួយទៀត គឺអ្នកដែលចង់ទៅខាងក្អមសំណ ឱ្យគេទៅៗ! អ្នកដែលមិនចង់ទៅក្អមសំណ សុំទៅនៅខាងខេត្តកណ្តាល ស្រុកស្អាង ជិតព្រែកអំបិលវិញ ទើបគាត់អាចទទួលយកបាន»។
តែយ៉ាងណា អភិបាលខណ្ឌជ្រោយចង្វារ លោក ឃ្លាំង ហួត មានប្រសាសន៍ថា អាជ្ញាធរមិនបានដាក់កំហិតឱ្យពលរដ្ឋរុះរើក្នុងរយៈពេល៣ថ្ងៃដូចការលើកឡើងនេះទេ។ លោកថា អាជ្ញាធរគ្រាន់តែជូនដំណឹងដល់ពួកគាត់ឱ្យធ្វើការរុះរើសំណង់មិនរៀបរយចេញពីតាមបណ្តោយដងទន្លេនេះប៉ុណ្ណោះ។
លោកបញ្ជាក់ថា៖ «អាហ្នឹងយើងទុកពេលវេលាឱ្យគាត់សមស្រប ដែលគាត់អាចរុះរើដោយខ្លួនឯង ដោយយើងមិនប្រើកម្លាំងរុះរើ ព្រោះថា ជាធម្មតា គឺវាត្រូវការពេលវេលាដើម្បីឱ្យគាត់អូស ឬសណ្ដោង ឬក៏មធ្យោបាយយ៉ាងម៉េច គឺជារឿងរបស់គាត់។ តែកន្លែងហ្នឹងគឺធ្វើម៉េចឱ្យវាស្អាត ដើម្បីឱ្យដងទន្លេមេគង្គមានសោភ័ណភាព»។
លោកបានបន្ថែមថា រដ្ឋបាលខណ្ឌបានឱ្យពលរដ្ឋទាំងនោះបម្លាស់ទីផ្ទះបណ្តែតទឹករបស់ពួកគាត់ទៅខាងក្រោយវត្តក្រួស ក្នុងខណ្ឌព្រែកព្នៅ ជាបណ្ដោះអាសន្នសិន។
អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក សឹង សែនករុណា មានប្រសាសន៍ថា រាល់ការអនុវត្តច្បាប់ទៅលើជនជាតិទាំងពីរនេះ អាជ្ញាធរគួរមានការពិនិត្យផ្នែកច្បាប់ឱ្យបានត្រឹមត្រូវ ដោយមិនគួរមានភាពលម្អៀងទៅខាងណានោះទេ ឬក៏អនុវត្តច្បាប់តាមបែបស្តង់ដារពីរនោះទេ ដែលនាំឱ្យមានការរិះគន់ពីមហាជន។
លោកបន្តថា៖ «អ្វីដែលសំខាន់ ចំពោះរឿងជម្លៀសជនជាតិឥស្លាម និងជនជាតិវៀតណាម ចេញពីមាត់ទន្លេ គួរតែមានការពិនិត្យផ្នែកច្បាប់ឱ្យបានច្បាស់លាស់ ដោយមិនមានភាពលម្អៀង និងឱ្យបានត្រឹមត្រូវស្របច្បាប់ ហើយស្របតាមអង្គការសិទ្ធិមនុស្ស មិនអនុញ្ញាតឱ្យមានការរើសអើងជាតិសាសន៍ក្នុងលក្ខណៈណាមួយនោះទេ។ គួរតែមានដំណោះស្រាយណាមួយដែលគាត់អាចទទួលយកបាន ដោយមានការគោរពសិទ្ធិពួកគាត់ក្នុងការសម្រេចចិត្តផងដែរ»៕